อ่านหนังสือ Laakkossiinka 32

Laakkossiinka32

Yoordaanosii'ni Boroti Darre Hixxeexxa Gosa

¹Roobelinna Gaadik gosatik mini mini hadi yo'oshsha heddo, lalo, gedhebo, re'e, Iyyazeerinna Gele'adik bogi horekee'e eloke booncho kadeexxa anfe.²Tennexxe'e Muusebaanna Ali'aazariba iittanni wele tuutatike akeekisanjuwwibaa dangeexxi hinee qici:³«Tinni Isira'eelito dhaaldaashsha Duuchchi Woddik Gootti gargareek Axaarotiki, Dibooniki, Iyyazeeriki, Nimiiraki, Haseeboniki, Eli'aaleki, Siibimaki, Neebokinna Beetsooniki qachchuwwi afemaak bogi horekee eloken, no'onna heddo hore anfeenen.⁴Kunni boguwwi, Duuchchi Woddik Gootti Isira'eelike ardi edo injifatemaashsha asseemmak horeke'e eloken; no'oonna erganjuwwi atiki hore anfeennen.⁵No'o atixxe ille'ni» insa'nenna hiissinexxi, «elle alfinoonnole kunni bogi no'o atike erganjuwwi'a qadaadummati uwwemowwaal, Yordaanoosii foonfannoshsha no'o'o mee assi.»

⁶Muusenna, Gaadikanna Roobelika gosatika minika manna hiyyeeqici, «Ha'nook dayyuwwi Isira'elik ardi bagediinbaa me'a wodda ha'no konnoo'o gattino'atee?⁷Isira'eelik ardi foofe Duuchchi Woddik Gootti insa'ne'a uwweemmake boga'n e'yinabaashsha godoba gurraashsha mayee assitina?⁸Annuwwi ha'nooki boga dooyyinaashsha Qaadesi Berinee'ni insa'ne'e ergenne wodda insa'nenna tennende assineemman.⁹Insa'ne Eshikoolixxa dhooqa marreexxi boga uunde illeema hingeechchi uduma Duuchchi Woddik Gootti uwweemmake bogiba'n Isira'eelik ardi godoba gure e'yabaashsha assine.¹⁰Eeteneenni barra Duuchchi Woddiki Gootti yo'oshsha aare hiyye kakateeqic:¹¹‹Mitte godobinni anee'e hordofa gonpheemmaxxe'e Gibtsee'ni fulleeke, wogga insa'neexxinna lame tommenna ookoneechi iima hedheeke mannanaa'n mittikinna Abiraami'a, Yisaaqi'anna Ya'iqoobi'a uwwonaa'a kako aagenneka boga uundabaan;¹²Duuchchi Woddika Gootta mitte godobinni hordonfeemmaxxe'e Qenezichcho Yoofonika belto Kaalebiinna Neweka belto Iyyaasu gadho mittikinna boga ookone'e uudabaan.›¹³Duuchchi Woddike Goottixxi aare Isira'eelike arda'ni bubbeemmaxxe'e, isi edo fuggoxxa assitemmaxxi iiti ila duuchchi muddaaqico'ni insa'ne shoole tomme wogga qiila gammooje boga'ni gadaadoonnaashsha asse.

¹⁴«Ha'no cubbaaleyyetixxi oose kunse ha'no'o annuwwi ha'nookixxe bakka'ni higgineexxi Duuchchi Woddiki Gootti Isira'eelike arda'ni hara lebe mufataashsha assitina'neen.¹⁵Isoo'o hordofatena'ni illeema higginoole ta'anna isi konnee arda duuchcha qiila gammooje'ni waalaan; ha'nonna konne arda'n geeltaaxxe ba'ne'a laqendinaan.»

¹⁶Ookoneechchi uduma insa'ne isiba'a dangee'e iso'n hineeqic, «Kaba hore no'oke'e dalla'a, melaalle no'oxxeenna oose no'oxxe'e qachcha ijaara hansaannen.¹⁷Yaane kinni no'o Isira'eelito booncho insa'neeke'n e'yinannoqico'n ka'line insa'ne edo me'inona'a qixxeeffanteennen; Ookkone wodda melaalle no'oxxe'nina oose no'oxxe'n ookone bogiki manni rakko geessisabaashsha konnee dalla'ike qachchuwwa'ni he'naani.¹⁸No'onna mitti mitting Isira'eelik ardi qadaadda ifika adhdhaqico'n ifi ifike minibaa'a hingabe'non.¹⁹No'o qoobbo ifikanna Yordaanoosike galaanina'n boroti darree'ni alfineennaxxe'e, Yordaanoosi wido insa'nenaa'n alfinannok mitti qadaadinna hedhabaan.»

²⁰Ookonechchi uduma Muuse insa'ne'e hiyyeeqic, «Ha'no tenne'e assitinoole Duuchchi Woddike Gootti edo lolake'e ka'litine qixxeefatinoole,²¹iittanni naapha ifika ifi edii'n shorre fulchaaqico'ni ha'no duuchchiing Duuchchi Woddike Gootti edo lolake'e qixxefatine Yordaanoosi'i fooffinoole,²²Duuchchi Woddike Gootti injifate ookkonee boga adhdhaaqico'n ha'no loliyyo hasissaan; iitta assitinoole illee iima higa dandeettinaan; Duuchchi Woddike Gootti'anna Isira'eeli'a ha'no assiyyo hasissaaxxa yaane assitinen hiyyoten; kunni boginna Duuchchi Woddike Gootti edo ha'nooke qadaada kadaan.

²³«Tennee'e assa gophphinoole kinni ha'noonna Duuchchi Woddike Gootta'n cubbo hujjine'een. Cubbo ha'no'o abiddaaxxa ege'ne.²⁴Oose ha'nooxxeenna melaalle ha'nooxxe'e qachcha ijaarre, gedhebokeenna re'etee'e goodhe ijaarre; assitino'a addachchiissinemmaxxa yaane kinni muuxxe.»

²⁵Gaadikinna Roobeliki manni kinni Muuse'n hiyyeeqic, «No'o erganjuwwi atik gootti ajajemmaxxa assinannon.²⁶Oose no'oxxinna aruwwa no'oxxi, gedhebiinkanna re'etika ittanni lali no'okinna kaban Gele'adike qachcha'ni gantaan.²⁷No'o atixxi garboole ati hitetteshshani mitti mitting no'o kinni lolatee qixxeeffante Duuchchi Woddike Gootti edo adhetee'e Yordaanosi'i foonfaannon.»

²⁸Ookkoneechchi uduma insa'nee'e uudaaxxenni Muuse qeessichcho Ali'aazaari'n, Neweke belto Iyyaasu'ninna Isira'eelike mini mini hadike annuwwa'ni hiyyeexxi ajajeqic,²⁹Muusenna insa'ne'e hiyyee qici «Gaadikinna Roobelki labballi duuchchi, mitti mitting bogedokee'e qixxeeffatati Duuchchi Woddike Gootti edo ha'nnooni welti Yordaanoosika galaana fofoole, ookkone boga abixxitinaa wodda qadaada insa'neke kado'a Gele'adika boga insa'ne'a uwwe.³⁰Yaane kinni lolatee qixxeeffante Yordanoosika galaana ha'non welti foofa gonphoole ha'noshshanni Kenaanike boga'n qadaada insa'nee geyamaka adhdhiyyo hasissaani.»

³¹Gaadikinna Roobelki manni hiyyeeqic, «Erganjuwwi atik no'o Duuchchi Woddik Gootti hiyyeexxa assinannon;³²lolakee'e qixxeeffante Duuchchi Woddike Gootti edo Kenaani'a foonfannon; yaane kinni no'o'o geyaak qadaadi kaba Yordaanoosi kayya kaddaan.»³³Ookkoneechhci uduma Muusse, Amoorik moyanji Sewooninni galchammakanna Baasaanik moyanji Oogi galchammaka boga duuchcha qarqarake'n hedhemake shiixxara qachchuwwinninni mitteba Gaadikenna Roobelke gosatike mini mini hadduww'n, ittanni belto Yooseefike, Minaaseke gosatike mini hadi'a gamisa uwwe.³⁴Gaadik gosatik mini, Diboonika qachcha, Axaarotika, Aro'eereenka,³⁵Axirotishoofanenika, Iyyazeerikanna, Yogibihaanika,³⁶Beetinimiraninna Beetiharanika qachchuwwa, qammalchine; gedhebokeenna re'e ifixxe goodhe ijaarre.³⁷Roobelik manni Haseebonika qachcha, Eli'aalekanna Qeriyatayimika,³⁸Neeboni, uudmii'ni summi jijjiiremeki Ba'aalimetsooneninna Siibimaaneka qachchuwwa qammalchine. Insa'nenna konne qachchcuwwi'anna haaroka summa fulchine.³⁹Minaasek belto, Makiirixxi horte Gele'adi'a marteexxi boga abixxati ooko'o hedhemmaka Amooraka manna shorrine.⁴⁰Tennexxee Muusse Gele'adika boga Makiirixe horte'a Minaaseke belti'a uwwe, insa'nenna ooko ofolle.⁴¹Minaasexxe hortek Iyya'iire insa'neeka heddo qachchuwwa adheexxi, Iyya'iirike qachchuwwa hiyye summa jijjiiire fulche.⁴²Ittanni Noobahi Qenaatika qachchanna qarqarake'n hedheeka shiixaramma qachchuwwa abixxeexxi ifike summinni, Noobahi hiyye jijjiire summa fulche.

The Word for the World International

https://app.library.bible/content/2b894378475c6aea