2 Moyanjuwwiinkaa Maxaafa21
Yihudiinka Moyanjo Minaase'e
1Minaase moyee wodda wogga isixxi tommenna lametemmani; Iyyerusaalemi ofo'leexxi onde tommenna onde wogga moye galche; ama isixxinna Hefitsiba hiyyendaaxxemmani.2Isinna Duuchchi Woddik Gootti, Isira'eel edii'ni fulche shorreemmake gosa gosake ardixxa diqachchiissaaxxa aada hordofeexxi Duuchchi Woddike Gootti edo elobaaxxa yaane asse.3Minaasenna anni isiki Hiziqiyaasi diigemmaka tullichchuwwake'ni magenoonfantammaka booncho hiisse ijaare; Isira'eeliki moyanji Aki'aab assemmaxxa duuchcha isinna Ba'aalite hiyyemaake magenuwwi'aa tolichimalcho giisse; Asheeraxxe fakkexxa soodo giisse. Iittanni urjuwwa duuchchanna sagade, magenoonfate.4Duuchchi Woddik Gootti «Summa anka Iyyerusaalemi uggannoni» hiyyemmaba Duuchchi Woddike Goottike galma'ni tolchimalchuwwa giisse.5Lamiinge Duuchchi Woddike Goottike galmiinke ba'linnuwwa'ni iimatixxe urjuwwa duuchchi'a tolchimalchuwwa giisse.6Isi i'leenga belto ciincatike tolchi'a shiqishe; gojo hujaakenna moraake kade'e; ekedha haaseessammakanna moro morammaka manna morsiirsa'nemmani; Duuchchi Woddike Gootti edo mufachchiissaaxxa elobaaxxa huje huje.7Isi qunqumende giissendeexxa Asheeraxxe fakkexxa sooddo aadheexxi Galmi giddo ugge; kunninna Duuchchi Woddik Gootti Daawwiti'ninna belto isike Solomooni'n, «Konne galma'ninna Iyyerusaalemike qachcha'n summi ank duuchchi woddi'a hedho'a Isira'eelike gosatike mini duuchchanaa'ni ani fileenneke boonchon.8Ittani ani ajajennexxa duuchcha xexxe'achchoti muuxiyyot ank erganji Muuse uwweeka seera duuchcha heqqedhate'n jabaanto malee'e yooni Isira'eelixxi lekka annuwwa insa'neke uwwennake boganaa'ni fuldee doonsa kiyya hinaashsha assabe'noni» hiyyeexxi konne boonchi'aateni.9Ardi kinni laqebaani; Duuchchi Woddik Gootti Isira'eeli edi'ni biremmake gosa gosake ardi caala elobaaxxa huje hunjaashsha Minaase insa'ne dedhise.10Duuchchi Woddik Goottinna erganjuwa ifixxe wabeeko darree'n hiyye haaso'ee qici:11«Yihudik moyanji Minaase tenne'e diqachiissaaxxa yaane cubbo duuchcha huje'eni; isi edi wodda hedhemmakie Amoorake ardi caala elobaaxxa huje huje'eni. Yihudakanna fakke magenoonfantaashsha asse cubbote'ni ibise.12Tennexxe Isira'eeliki Duuchchi Woddike Goottika Mageno laqaake manji duuchchixxi mansha gibbaashsha assaaka fuggoxxa rakko Iyyerusaalemi'ninna Yihudake'ni iyyedagannoni.13Semaariya mikennexxa wodaro Aki'aabike mi'ne mikennexxe tunbe Iyyerusaalemi hana diriirsannon; mitti manji qore fiyammashsha fiyeechchi uduma gonbisammashsha aninna Iyyerusaalemi fiye isee gonbisannoni.14Ba'netenaa'ni gateeka anka arda waalannon; naapha insa'neekixxe anga'ni sa'isse uwwannoni: insa'nenna boojji'naani; karra inisa'neexxanna saammani.15Insa'ne'ni tennee duuchcha assaannelchi ediki annuwwi inasa'neeki Gibtsee'ni fulleexxe yannanaa'ni ke'issine techchi qico'ni ani edo elobaaxxa assineemmaxxeenna mufatannoshsha ane assinemmaxxeeteni.»16Higgeeni Minaase Duuchchi Woddike Gootti edo elobaaxxa huje hunjaashsha Yihudaka arda dedhisemmaxxe cubbo gadho, Iyyerusaalemi'i kasakenaa'ni kasiini qico'ni heddo nage'iinke mannixxa munde dunne.17Minaase moyemmake baro'ni hujeexxa, wele yaanenna; hujeexxe cubboni welti asseexxi; hujeexxi huje duuchchi Yihudake moyyanjuwwike jirtetike maxaafa'ni borreessende hexxeexxebaata?18Minaasenna reye: «Uuzake hiddichchuwwiinke fichcha» hiyyemaaba mootummatike hiddichchiinke fichchi giddo moogeme. Belti isiki Amooninna isixxe bakaa'ni moye.Yihudaki Moyanji Amooni
19Amooni moyee wodda wogga isixxi lame tommenna lametemmani Iyyerusaalemi ofo'leexxi lame wogga moye galche; ama isixxinna Mesolaamiti hiyyedaaxxeni; isenna Yaaxxibake bogixxe manjichcho Haaruusixxe beltommani.20Anni isiki Minaase assemmaxxa duuchcha isinna Duuchchi Woddike Gootti edo elobaaxxa yaane asse.21Anni isikika elobaaka adaba duuchcha hordofe: anni magenoonfatemmaka magenuwwa magenoofate, sagade.22Edike annuwwika Duuchchi Woddika Gootta Mageno waale; Duuchchi Woddike Goottike hiyyichchi'a ajajema gibe.23Amooniki ja'laabuwwi fuggoxxini iso'ni ke'e; mootummatike mini giddo isoo shinne.24Ookkoneechchi uduma bogiinki ardi moyanjo Amooni'ni fuggoxxini ke'emmaka duuchcha shinne; belto isika Iyyosiyaasinna bakka isixxe'ni mowaashsha assine.25Amooni moyemmake baro'ni asseexxi wele yaane duuchchi; Yihudake moyanjuwwiinke jirtetike maxaafa'ni borreessende afedaaxxebaata?26Isinna, Uuzake hiddichchiinke fichchi giddo hedheeke hirreessa'ni moogeme; belti isiki Iyyosiyaasi isixxe bakka'ni moye.The Word for the World International