2 Moyanjuwwiinkaa Maxaafa20
Hiziqiyaasi Elagophe
1Eettenne yanna'ni Hiziqiyaasi jaba qico ela gopheexxi reyo shiqeemmani. Amootsiki belti wabeek Issayaasi uushshotee mareexxi «Duuchchi Woddik Gootti ‹Rertaatteni malee yooni gata gophphattaxxe duuchchiinxa yaane giissi› hiyye'eni» hiyye kule.2Hiziqiyaasinna alba gimotiba'a wirri assedheexxi; Duuchchi Woddike Goottibaa hiyye soodatee qici,3«Duuchchi Woddike Goottaa! Xuurameesummatinna mitte godobinni ati'a ergatemennexxa; ati gammaddattoxxa yaane assennexxa hedi» hiyya'ni Hiziqqiyaasi hiiqise oodhe.4Issayaasi oddotixxe weldennaba sa'e me'ebaangi Duuchchi Woddike Goottik hiyyichchi isibaa hiyya'n dagee qici;5«Udumi'a higgettexxi ardi ankika sooresa Hiziqiyaasi hitatto qici, ‹Edike anni atikiki Daawwitiki Duuchchi Woddik Gootti Mageni hiya'nee qici: soodachcho atixxa laqeenneni: indiddo atixxanna uudeenneni; ani ate fayyisannoni: sase barra uduma Duuchchi Woddike Goottike galmibaa martattoni.6Wogga atixxe'ni hana tommenna onde wogga ati'a lebannoni: ateenna konne qachcha Asoorike moyanjiinxe anganaa'ni anjirannoni; ani ifixxeenna anke erganjo Daawwitixxe hiyye; konne qachcha gollannoni.› »7Ookkoneechchi uduma Issayaasi, «Balasetika xalta qophpheesse» hiyye. Insa'nenna qophpheessineexxi miserake'ni hana uggine; isinna fayye.8Moyanji Hiziqiyaasinna Issayaasii'i «Duuchchi Woddik Gootti anee fayyiseexxa; sase barra uduma galmi isikibaa me'annoki beessisi maachcho?» hiyye Issayyaasi qore.9Issayaasinna «Duuchchi Woddik Gootti hiyye addachchiiseexxa muuxaaki beessisikiteni. Gaaddiddo tomme takkaarro edi'a saxxa? Yookaani tomme takkaarro udumi'a higgaa?» hiyye qore.10Hiziqiyaasinna hiisseexxi, «Gaaddido tomme takkaarro edi'aa me'aa shollexxaammaxxe tenne mannii'n tomme takkaarro udumi'a higgowwaali» hiyye.11Ookkonneechchchi uduma wabeek Issayaasinna Duuchchi Woddike Goottibaa soodate: Duuchchi Woddiki Goottinna moyanjo Akaazi tarkafatemmaxxe takkaarronaa'n tomme takkaarro udumi'a higgaashsha asse.Baabilooni'ni Dageeka Erganjuwwa
12Eettene yanna'ni Baabiloonik moyanji Baaladanika belto Meroda-Baaladani, moyanji Hiziqiyaasi ela gopheexxa laqemmaxxe; tennexxe borro borreesseexxini mitteba uwwa Hiziqiyaasi'a erge.13Hiziqiyaasinna erganjuwwa gammashshoti qophedhe; miya mase'nammake mine'ni hedheechcho duuchcha, birretika siblijo, worqe, qimamuwwanna fiixxeexxa zayite, loliinke miyuwwika minenna wele miya masse'nammake mine'ni hedheechcho duuchcha insa'ne'n leelishe. Mootummatike mine'ni hedheechchonna kadi boga isike duuchcha'ni hedheechcho Hiziqiyaasi insa'ne'n leelishebaaki gateechchi mittichchinna hedhebaani.14Ookkoneechchi uduma wabeek Issayaasi moyanjo Hiziqiyaasiba'a mareexxi, «Kunni manni habaa'n dageeke? Maa ate'ni hiyye?» hiyye qore. Hiziqiyaasinna hiisseexxi «Insa'ne dange'ebi Baabilooni hiyyemabaa'ni bayyi boganaa'niteni» hiyye hiisse.15Wabeek Issayyaasinna «Mootummatike atike mini giddo maachchota uunde» hiyye qore.Hiziqiyaasinna «Mootummatike anke mine'ni hedheechcho duuchcha uunde'eni: miya massinammake mini giddo hexxeexxe karra duuchchanaa'ni insa'ne'n lelishebe'nochchi mittichchinna hedhebaani» hiyye.16Ookkoneechchi uduma Issayaasinna Hiziqiyaasi'i, «Duuchchi Woddike Goottika hiyyichcho laqi;17Mootummatike atike mine'ni hedheechchi duuchchi ediki annuwwi atiki telchi qico'ni tuleechcho duuchcha Baabiloon'a adhdhine me'inaaxxe barra dhugaanden daggaani; mittilchi gataachchi hedhebaani hiyya'neeni Duuchchi Woddik Gootti»18Atixxe horte giddii'ni mitti mitti Baabilooni'a boojiine adhdhine me'inaaxxi Baabiloonike mootummatike mine'ni kolaasseme ergatemaashsha assemaan.19Moyanji Hiziqiyaasinna «Hitetteki Duuchchi Woddike Goottik hiyyichchi elokeni» hiyye hiisse; «Ani hedhenne qico'ni nage'ikinna dhugaa hexxeexxe kaddoole kadeexxi kaddowwaali» hiyye.
Moyanjo Hiziqiyaasixxe Mootummaxxa Muuxensha (2 Odo. 32:32-33)
20Hiziqiyaasi moyemmake baro'ni hujeexxi; wele asse muuxeexxi yaane duuchcha jannuntetinna ittani wodi'i kofemaaka booncho hitta asse hujeexxanna qachchi giddi'a wode'e aassate'e unsiise buttini giddii'ni dareera hujiseexxi duuchchi Yihudake moyanjuwwiinke jirtetike maxaafa'ni borreessende hexxeexxebaata?21Hiziqiyaasinna edike annuwwishshanni reye; belti iski Minaase isixxe bakka'ni mowe.The Word for the World International