Mukanda wu Pawuli ku bisi- Loma8
Kuzinga ha kimosi na Mpeve yi Nzambi
1Bwabu, kusiidi dyaka nsembolo ko ku yobobo badi mu Yesu-Klisto.2Mu dyambu ti, musiku wu Mpeve wukwe haananga luzingu mu Yesu-Klisto, wunkudidi mu musiku wu masumu na wu lufwa.3Nzambi wulungisa misamu bemyomyo milembana Misiku mi Mose, mu dyambu ti, lebakani di kinsuni di mumanisa lulendo: mu katula masumu, ni kasemba mo bu katambika Mwana andi mwanki kazinga mu lunitu lu muntu wufwanakani na muntu wu masumu,4Nzambi kasila bobo mwanki lunungu, mu nzila yi Misiku, lulunga mu yeto tukwe lembolo zinganga mu luyaalu lu kinsuni, kansi lu Mpeve.5Yobobo badi mu nsuni, nsatu zawu mu bima bi kinsuni, kansi, yobobo badi mu Mpeve, nsatu zawu mu bima bi kimpeve.6Nsatu zi nsuni zikwe natanga ku lufwa, kansi nsatu zi Mpeve zikwe natanga ku luzingu na kiyenge.7Mu dyambu ti nsatu zi nsuni, zikwe natanga kitantu na Nzambi, mpe zikwe tumiminanga Misiku mi Nzambi ko, na zilendi mye sadila ko.8Yobobo badi ku nsye luyaalu lu nsuni, balendi yangidika Nzambi ko.9Yeno, ludi ku nsye luyaalu lu nsuni ko, kansi lu Mpeve, mu dyambu ti Mpeve yi Nzambi yii mu yeno. Tala ti muntu kadi na Mpeve yi Klisto ko, kadi muntu andi ko.10Mpe tala ti Klisto wuu mu yeno, nitu eno yaafwa kaka mu dyambu di masumu, kansi Mpeve yidi luzingu mu yeno, mu dyambu ti baalukitula bantu balunungu ha ntadisi yi Nzambi.11Mpe tala ti Mpeve yi yondowo wufulukisa Yesu-Klisto mu bafwa yina zinga mu yeno, Nzambi wufulukisa Yesu-Klisto mu bafwa, waahaana mpe mu nzila yi Mpeve andi yikwe zinganga mu yeno, luzingu ku nitu zeno zi lufwa.12Ni hahoho, zimpangi zani, mfuka yii neto. Kansi, tulendi zinga bonso buna tumina nsuni eto ko.13Mu dyambu ti, tala ti luna zinga mu kinsuni, lwaafwa. kansi tala ti mu Mpeve, luna honda ndyatulu eno yi kinsuni, mpe luna zinga.14Bantu bamvimba bana twadusu ku Mpeve yi Nzambi, baala ba Nzambi badi.15Mu dyambu ti Mpeve yilutambula, yikwe lukitulanga mindongo ko mwanki luba na bunkuta, kansi Mpeve Yilongo yilutambula, yikwe lukitulanga baala ba Nzambi. Mpe mu Mpeve beyoyo, tuna looka ti: «Aba, mpila mosi, Tata!»16Mpeve yi Nzambi yikwe tanga yandi bende kimbangi ku mpeve eto ti, baala ba Nzambi tudi.17Ni hahoho, tala ti baala bandi tudi, buna twaabyadila fwa, na twaabyadila fwa di Nzambi, mpe twaabyadila fwa ha kimosi na Klisto, mu dyambu ti, tala ti tuna yena mpasi ha kimosi nandi, mpe mbo tutambula kikunku ki nkembo andi.Nkembo wuna kwiza
18Nazebi ti mpasi zi tuna yena ntangu beyiyi, zilendi fwanakana na nkembo waatulonka Nzambi ko.19Mu dyambu ti, bima bimvimba bihidika Nzambi, bina kingila mu mpwila yiyingi nkembo wu Nzambi wu kaayenikisa ku baala bandi.20Mu dyambu ti, bima bimvimba bihidika Nzambi, biyekolo ku nsye luyaalu lulembolo ba mfunu. Ka mu luzolo lwandi ko, kansi mu luzolo lu Nzambi wuyekola byo. Kivuvu kidi ti:21bima bimvimba bebyobyo bihidika Nzambi, byaakuuluka mu kinkole ki lulendo luna mwangisa byo, mu baka kimpwanza na nkembo wu baala ba Nzambi.22Tuzebi ti natee mu kilokola bekiki, bima bimvimba bihidika Nzambi, bina kunga bonso mukento wuu na misongo mye butila.23Ka bima bimvimba bihidika Nzambi kaka ko bina yena mpasi, kansi yeto mpe tutambula Mpeve Yilongo bonso kikunku kintete ki minkayulu mi tusila Nzambi nsilulu, tuna kunga ku nsye mutima, tekila Nzambi katukitula baala bandi mpe kakuula nitu zeto mu mpasi zawu.24Mu dyambu ti tubaka mpulusu, kansi mu kivuvu kaka. Tala ti tuna sa kivuvu mu bima bi tuna yena, kisidi dyaka kivuvu ko. Nani bwabu lenda sa dyaka kivuvu mu bima bi kana yena e?25Kansi tala ti tuna sa kivuvu mu bima bi tuna lembolo yena, tuna kingila byo mu luvibudulu.26Bumosi mpe, Mpeve yikwe tusadisanga tala ti tulebakani, mu dyambu ti, tuzebi mu sambila ko bonso bufwanakani. Kansi, Mpeve yandi bende kwe tusambidilanga mu zimpova muntu zi kalendi lembolo duukisa.27mpe Nzambi wukwe toma sungiminanga mitima, zebi mbanzulu zi Mpeve: bwabobo Mpeve kakwe sambidilanga bantu balongo bonso budi luzolo lu Nzambi.28Tuzebi ti bima bimvimba bina lonka mambote ku yobobo batiidi Nzambi, yobobo bakatumisa bonso budi makani mandi.29Mu dyambu ti, Nzambi wuteka basoola na wukana ntete mu bafwanikisa na Mwana andi, mwanki yandi kaba kihunda ki zimpangi zizingi.30Yobobo bakasoola ntete, wubatumisa mpe. Yobobo bakatumisa, wubakitula bantu balunungu. Mpe yobobo bakakitula bantu balunungu, wubakembisa.Nki bilendi tuhambisa na luzolo lu Nzambi
31Nki tulendi ta bwabu dyaka e?Tala ti Nzambi wuu ku sambu dyeto, nani waatubela e?32Yandi wulembolo tanina Mwana wu yandi bende, kansi wumuyekola mu dyambu di yeto bamvimba.Bila nki, mu lusakumunu lwandi kaalembolo tuhaanina bima bimvimba ha kimosi na Mwana andi e?33Nani waafunda bantu basoola Nzambi e? Ni Nzambi wubasoola baba bantu balunungu.34Nani waababedisa e? Mu dyambu ti Yesu-Klisto wufwa, mpe wufuluka, wuu wuzakala ha lweka lu kooko ku lubakala lu Nzambi, mpe kwe tusambidilanga!35Nani lenda tuhambisa mu luzolo lu Klisto e? Mpasi hoti nzungu, mfyetokoso hoti nsatu, bumputu, nsisi hoti mbele yi mvita e?36Bonso bu wusonama ti :«Mu dyambu dyaku bana tuhondila kilumbu kimvimba,bana tubongila bonso mameme mafweti zengo ngongodinga.»37Kansi, mu mimvimba bemyomyo, tunungini mu nzila yi yondowo wututya.38Ee, nkwikidi ti kunaani kima kilendi tuhambisa na luzolo lu Nzambi : ni luba lufwa, luzingu, zimbazi, bimfumu, bima bi ntangu beyiyi na bina kwiza, lulendo,39ngolo zi yulu na zi butoto, mpe kani kima kihiika kihidika Nzambi kilenda tuhambisa na luzolo lu Nzambi luyenikini mu Yesu-Klisto, Mfumu eto.Wycliffe Bible Translators, Inc.