2 Peter2
1Nhâng canŏq, dân ca khây tiêng tri mvâr gĕh gŭq u sŭng văl ganơ, nŏq khây gru pađau mvâr khoi gŭq u sŭng pôp ŏh, nŏq cồ khây tamun tăm pôn gŭq cŏch văt lăp ăp sipơp mvâr mviq ôp talŭng talay bây mvăc di mo Tamun Tơm cồ gĕh vro nơm lŭh, nŏq wŏq sinlơ chưt ji an nơm sô lŭng.2Gŏq ndu pơch bây ăp vrŭq ôp bưn bap khây nĕh de, nŏq mvăc khây tamun nŏq nŏq con trong dip gal nĕh vlam vu nhai săm.3Payh ơ nuih talaq cơnh can'hir, don a khây camvŭm mvâr mviq, khây nĕh gĕh sŏq păch caya pôp ŏh de, nŏq sinlơ ôp dôih chĕq ân an khây nĕh chŭp mvrêq ndŏh hwât chĕq uy, bây sinlơ chưt ji khây nĕh de đăng vĭq lu.4Mvăc hê Siđăch Trôq lăq đăng palay an khây con gŭn ôp bưn bap, nŏq hwât jưr tŭq jru tănchăp chhe sênh u tŭq vi jingo, Siđăch dơp khây tamun cồ vlam vu jơ sên nŏq an sinlơ ôp dôih; 5Siđăch khoi đăng palay an dưnya ađơm, nŏq jơ sên pham ndu, gĕh Nô-ê, cồ tamun yảng pađau yăh sŏng, lăm Siđăch rung daq lĭch jưr dưnya khây tamun đăng tôq nŏq;6en lăm ŭnh sŏh roq khây palây Sô-đôm bây Gô-mô-rơ lŭh vuh ntĕh, Siđăch lăq dơp lŭh du păng sirăq nhai dôih panjwăch, ôp du dŭng sĭq ăp sinlơ dơp tât an khây tamun đăng tôq;7nŏq Siđăch lăq yơt Lót yăh sŏng, lăm gĕh vlam sinlơ lŏh sat mvăc sa hŭch gŭq sŭng cani camăn khây tamun chhŭq chhau de,8(mvăc tamun yăh sŏng heq lăm rĭh năr heq tât năr tĭq sŭng khây nĕh lăq vlam sinlơ jicôr sŭng wênh nggui yăh sŏng nơm de mvăc sây bây iêt ăp vrŭq cani camăn);9nŏq Cô Voq gưt ôp lăm lây yơt tamun tôq camvân lŭh ntrăch a sinlơ long ngăn bây nhŭp jơ tamun chin'hâc chĕq vlam sinlơ ôp dôih sŭng năr ôp dôih,10nŏq canjâq dông lĕq bây khây tamun gŭq diêt sŭng ăp sinlơ cơnh can'hir tih wil bây săq swan bây sên dêh prơn camhlăng. Khây tamun mvâr ta gat kranh vôq kranh nco, khây nĕh đăng prênh poq lăm nhai chhâc khây candranh sindraq sindil;11sŭng lăm khây con gŭn gĕh prơn camhlăng bây prơn gŭn măq dông đăng thêng dơp lŭh camvŭm nhai an prênh poq, chŏl sĭq vlâq khây candranh nŏq u măt Siđăch.12Hôm khây nĕh heq, dân ca khây sưr so đăng gĕh chhu vôq, bây gŏng n'ham gĕh dĕh lŭh chĕq vu nhŭp bây tachưt, nhai bap tât ăp sinlơ cồ khây nĕh đăng đom gưt, khây nĕh nŏq khoi gĕh vlam panjwăch dân ca sinlơ chưt ji khây sưr so tĭq de,13lăm vlam sinlơ trŏh sĭq vlâq bây jên ôp sĭq sinlơ chin'hâc, mvăc sên sinlơ lêng vôt dân ca sa hŭch u sŭng dŭng năr; khây nĕh cồ ăp tŭq sâq vơm bây viêm vôt, vui hơn sŭng sinlơ mvâr mviq nơm de lăm tât tŭq sa war bây pôp ŏh; 14gĕh ăp canong măt vênh sinlơ cani camăn bây đăng pâh sên lăp sinlơ bưn bap, kêt cuôl khây wênh nggui đăng kram ôp păch tih wil, bây gĕh nuih talaq gĕh sŭmmrăp an păch cơnh can'hir, cồ ŏh con sĭq sinlơ raq pandai.15Mvăc hwât chĕq con trong yăh sŏng, khây nĕh vlam sinlơ tih wil lăm saq bây con trong Ba-la-am de, con klô Bê-ô, tamun cơnh jên prơn sinlơ đăng yăh sŏng. 16Nŏq nĕh lăq wŏq sinlơ chih lăh mvăc bưn bap nơm de — du asĕh răch cammlo lăq păng khăq sinlơ nrui gala nhi tiêng tri de lăm nhai don a mŭnh con tamun.17Khây tamun heq cồ phong đăng gĕh daq bây cồ sitŭq vlam chhal ramvưt khlôm saq, cồ khây tamun nŏq tŭq vi jingo tĭq tưl lăq gĕh sŭmmrăp sindăc.18Mvăc, lăm nhai ăp camvŭm lơq vôq vâq vâq, mvăc nuih cơnh can'hir săq swan de, khây nĕh lamvoch khây tamun cồ me lŭh ntrăch a văl ganơ rĭh sŭng sinlơ tih wil,19pănggân sinlơ lahông an khây tamun nŏq, sŭng lăm nơm khây nĕh cồ ôp dĭch sinlơ viêm vôt. (Mvăc vu lây chĕq păch lây pâm sa dông, nŏq vu nŏq ôp dĭch an sinlơ nŏq.)20Mvăc hê lăq lŭh ntrăch a sinlơ ôm lêch dưnya de don a đom gưt Siđăch bây Siđăch Yơt vơn, cồ Candranh Krit Yêsu, nŏq takêp lăp nŏq sĭq vlâq, nŏq khây tamun nŏq lăq vlam sinlơ vông hlâq, en nơm nĕh alưr heq nggâm bây khây nĕh jêng lŭh viêm dông a daq vôq.21Nhâng cồ păch yăh dông an khây nĕh lăm đăng gưt con trong yăh sŏng dông a lăq gưt en nŏq pale ncơi bây ravwŏq gŭn cồ gĕh nhai an nơm.22Camvŭm nhâng bâng camvŭm pănđŭp de heq lăq ôp lŭh an khây nĕh: “So layĕp sĭq vlâq păch cồ nĕh hoq lŭh” bây “sưr gĕh tan ŭm jrŏh en vĭq palăm sŭng vŏq.”
FAR EAST BROADCASTING COMPANY