1 John5
1Hê vu lây tôq pành Siđăch Yêsu cồ Candranh Krit nŏq gĕh dĕh lŭh a Siđăch Trôq, en hê vu lây sinđach Candranh lăq dĕh lŭh nơm nŏq khoi sinđach tamun lăq gĕh dĕh lŭh don a Siđăch.2Don păch heq, vơn gưt pành nơm sinđach ŏh con Siđăch Trôq cồ lăm vơn sinđach Siđăch Trôq bây jơ bây khây ravwŏq Nĕh de.3Mvăc heq cồ sinlơ tôq sinđach Siđăch Trôq, nŏq cồ vơn jơ bây khây ravwŏq Nĕh de. Khây ravwŏq Nĕh de đăng gal cồ canjâq canjơng.4Mvăc hê vu lây gĕh dĕh lŭh a Siđăch Trôq nŏq pâm sa dông dưnya. Bây heq cồ păch chĕq vơn vui hơn, nŏq cồ sinlơ tôq vơn de, cồ sinlơ lăq pâm sa dông a dưnya.5En vu lây cồ tamun pâm sa dông dưnya, hê đăng gal tamun tôq pành Siđăch Yêsu cồ Con Siđăch Trôq?6Nŏq cồ Candranh lăq tât don a daq bây n'ham: Candranh Krit Yêsu — đăng ayh don a daq, nŏq cồ don a daq bây don a n'ham. Bây Siđăch Wênh cồ Candranh candân, mvăc Siđăch Wênh cồ sinlơ dip gal.7Canŏq, gĕh pe sinlơ ôp candân:8Siđăch Wênh nggâm bây daq nggâm n'ham, nŏq lĕq pe sinlơ heq cồ ayh muôi ngăn. 9Hê vơn wŏq camvŭm candân con tamun de, nŏq camvŭm candân Siđăch Trôq de cồ măq prĭh. Mvăc heq cồ camvŭm candân Siđăch Trôq de, nŏq cồ Siđăch lăq candân sĭq Con Nĕh.10Vu lây tôq u Con Siđăch Trôq nŏq gĕh camvŭm candân nŏq sŭng tamun nŏq. Vu lây đăng tôq Siđăch Trôq en an Siđăch cồ tamun nhai mvâr mviq, mvăc tamun nŏq đăng tôq u camvŭm candân cồ Siđăch Trôq lăq dơp lŭh sĭq Con Nĕh.11En heq cồ camvŭm candân, nŏq cồ Siđăch Trôq lăq paq an vơn sinlơ rĭh wân lawân, bây sinlơ rĭh nŏq gŭq sŭng Con Nĕh.12Vu lây gĕh Con nŏq gĕh sinlơ rĭh. Vu lây đăng gĕh Con Siđăch Trôq nŏq đăng gĕh sinlơ rĭh.13Ănh lăq chêr khây camvŭm heq an pôp ŏh, cồ an khây tamun tôq u săq Con Siđăch Trôq, chĕq pôp ŏh gưt pành nơm gĕh sinlơ rĭh wân lawân.14Hôm heq cồ sinlơ tôq camvân cồ vơn gĕh u sŭng Siđăch, nŏq cồ hê vơn cuôl wĭnh du sinlơ lây nŏq bây nuih cơnh Nĕh, nŏq Nĕh iêt chăng vơn.15En hê vơn gưt pành Nĕh iêt vơn an vơn cuôl wĭnh păch lây, nŏq vơn gưt pành nơm wŏq gĕh ăp sinlơ cuôl wĭnh nŏq nơm lăq cuôl wĭnh a Nĕh.16Hê vu lây sây pôp ŏh nơm ôp du bưn bap đăng tât daq chưt, nŏq tamun nŏq saq cuôl wĭnh, en Siđăch Trôq nhâng paq sinlơ rĭh an pôp ŏh tĭq, cồ tamun bưn bap đăng tât daq chưt. Gĕh du bưn bap tât daq chưt; ănh đăng nhai pành tamun nŏq căh vơu ngwân sĭq bap nŏq.17Ăp sinlơ đăng yăh sŏng nŏq cồ bưn bap, en gĕh bưn bap đăng tât daq chưt.18Vơn gưt pành hê vu lây lăq gĕh dĕh lŭh a Siđăch Trôq nŏq đăng ôp diêt bưn bap, nŏq Candranh cồ dĕh lŭh a Siđăch Trôq jơ sên tamun nŏq, bây chaq camhôch đăng tagoq tât nĕh gĕh.19Vơn gưt pành nơm sĭq maq Siđăch Trôq, hôm lĕq dưnya ôp bây prơn chaq camhôch.20Nŏq vơn gưt pành Con Siđăch Trôq lăq tât nggâm gĕh paq an vơn sinlơ vanŏh, chĕq vơn nhâng gưt Candranh Nhâng Bâng. Bây vơn gŭq sŭng Candranh Nhâng Bâng, nŏq cồ sŭng Con Siđăch, cồ Candranh Krit Yêsu. Con nŏq cồ Siđăch Trôq nhâng bâng, bây cồ sinlơ rĭh wân lawân.21Ơ khây con, căh jơ nơm an ntrăch a rup chaq yang.
FAR EAST BROADCASTING COMPANY