Uremu1
Furumiñeti uremu
1Lubuidun-agei lani Salomón poema.2Chubei niyuma lau biyumaaru! Bímetimati basupahan sügǘ tau diwéin.3Buiti líhemen bibiñe, ibiñein áwiyuruti bíribei. Ligía bínsiñebei houn hiñaruñu!4Barübana búmagua furese! Barübana birumunrugun urúei! Koru: Wéiribei wagundan buma; busenwabei basupahan sügǘ tau diwéin ligía bínsiñebei houn hiñaruñu!5Hiñaruñu Herusalénna, wuriyumatina ani magadiñetina; wuriyumatina kei likianpun Kedarü wéndetina kei likorutinan Salomón.6Meberesen humá lau wuriyuma nan, ni lau churá laali lan weyu nura. Gáñirügühaña meha níbirigu numa aba híchugunina óunigira beibei-agei, aba madaani nan lun nóunigiruni nubeibein-agei guánarügü.7Ariñagabéi nun eyeri hínsiñeti nun, halía san bóunigiraña bilügüniña mudún? Halía banügaña emeraagua amidirugu? Ka uagu mosu lubéi néibugun kei aban éibugañahadügütu harugabu halügüniña bíbirigu?8Anhein ibidiñe lubéi bun, buguya to magadiñeboun hadan magadiñetiña, falabei hagudárigi bilügüniña mudún, adundehabaña bilügüniña gábara turugabun haban amainirutiña mudún.9Ítara biña nun kei gabayu fínutu to tuáguboun likarün urúei Ehiptuna.10Wéndeti bubuyubu tabadinagua barigeila! Wéndeti bigiina labadinagua biñari!11Wadügüba barigeila lau golu, ábame wewendedagüdünu lau pülata.12Sun aniha lan urúei balañu, aba lígiragüdüni nufulurin líhemen.13Ítara liña númari nun kei aban tiraüraü sagü mira to naniguaguboun súnwandan.14Ítara liña númari nun kei lufulurin alühéña tidan beibei-agei to En-gadüboun.15Magadiñetibu númari, úatu magadiñetu kei buguya! Ámirihati bagu lau ínsiñeni!16Magadiñetibu númari! Úati magadiñeti kei buguya! Ligía: Sagadi hilumati wabararibei!17Hibúari tíndaanutebei waban, sipürési ligía tábulugubei le adouragubei wau.Bible Society of Honduras