2 Lúrudu7
Gürigia ha lanúadirubaña Bungiu
1—Líchugubei Wabureme le Hubungiute ageiraü le lunbei hárügüdüni hun, ábame labugagun sedü néchanigu ñéingiñe, ha lunbei hagagibudagun hama, wéinamutimatiña ani héretima hagía huéi: Étüna, Hérühesina, Amoruna, Kananna, Féresüna, Eweuna hama Hebusuna.2Danme ábürügüda laaña Bungiu néchanigu ha labun hubafu, lunti hagünrinchaguniña, moun lumuti hadügün ni ka luwuyeri daradu hama ni lun gudemehabu humá houn.3Moun lumuti giñe hádaragun hungua hamoun ni lun hamarieidagüdüniña hirahüñü hama harahüñü gürigia hagía,4lugundun hadisedagüdübaña hirahüñü luéi Bungiu ábame háhuduragun houn amu búngiugu; ábameti liabin ligañi Bungiu huagun, ábame lagünrinchagunün lidan murusun dan.5Le lunbei hadügüni, lun haguludaguni hani burí latarü, günringua humeime burí dübü luma burí tonpu le unbei háhuduragua, gudá humañame sun haguariuan.6Lugundun huguya, gürigia ha lanúadirun Wabureme le Hubungiute; anúadira laadün Bungiu hádangiñe híbiri gürigia ubouagu lun lánibadün lan.7—Anhein himei laadün lubéi Bungiu ani anúadiralaün, mama ladüga huguyatima lan wéiribei hádangiñe sun néchanigu, lugundun huguya ñǘraütimabei.8Lasagarunbalün Bungiu Ehiptugiñe le meha ñein lubéi idamuni humá, aba lesefurunün lábugiñegiñe lubafu urúei Ehiptuna lau óunwenbu ubafu, ladüga hínsiñe lun, luma lun lagunfuliruni füramasei le meha ladügübei houn hagüchagu.9Subudi huméi lubeiti luagu Bungiu lan le Hubungiute ligía lan Búngiubei le inarüniti, le agunfulirubalin lidaradun lau úaraguni hámagiñe inebanfangu hamoun inebanfangu, houn ha hínsiñehabubaña lun ani gúnfuli haméi lugumadin;10gama lumoun günringua lumutiña ha iyereehabúbaña lun lau líchuguni le hadünabei houn. Madarasahanti lun labeichuniña ani günringualaña.11Gúnfuli huméi lubeiti lugumadin, luma lilurudun le uágubei nariñaga hun uguñe weyu lun hadügüni.Abiniruni houn ha gaganbadibaña
12—Lárigiñe haganbuni gumadi burí le, anhein hagunfulira, lagunfulirubei giñe Wabureme le Hubungiute daradu luma füramasei le ladügübei hama hagüchagu.13Hínsiñebadün lun, labinirubadün ladügüba lun hagibedagun; labinirubaña hirahüñü, hinadüri, heigan türigu, huniñe diwéin luma higaraban, harahüñü hilügüniña bágasu hama mudún, lidan ageiraü le uágubei meha láfiñura houn hagüchagu luagu líchugubei lan hun.14Habinirúba sügǘ hau sun híbiri gürigia, úabaña würiña ni wügüriña maraüheitiña haganagua, ni animaalugu maraüheitiña hadan hibiñanigu.15Ladisedagüdübei Bungiu sun sandi luma sun hanarime burí igei ha lóunahabaña luagun Ehiptu huéi, gama lumoun lasufuriragüdübaña háganiñu lau sun burí sandi hama igei hagía.16Gama lumoun lunti hagumuchun hau sun gürigia ha lederegerun Wabureme le Hubungiute húhaburugun; magudemeda hamá hun máhuduragun huguyame houn habungiutegu, lugundun anhein hadüga ítara, heferidiruba.17—Háfuga haritaguba, hariñagame: “Gíbetiña néchanigu ha wawéi, ida luba gayara lan wasagaruniña?”18Manufudeda humá hawéi! Haritagua humá luagun le meha ladügübei Bungiu lau urúei Ehiptuna luma houn sun Ehiptuna.19Samina humá luagu burí luéinamun katei le ladügübei Bungiu lábugiñe harihin, luagu burí seini luma burí milaguru luma óunwenbu ubafu le larufudubei Wabureme le Hubungiute dan le lasagarunbalün Ehiptugiñe ítarameme luba ladüga Bungiu hau sun gürigia ha uéibaña hanufudeda.20Lóunahaba giñe Bungiu aban lanarime anufudei hadoun, le lunbei lagumuchun hau ha erederubaña o ha lan aramudagubaña.21Madadagara humá lubeiti hagibugiñe, lugundun anihein Wabureme le Hubungiute huma, Bungiu le wéiritimabei ani hanarime.22Asagaheina lubaña Bungiu néchani ha murusun murusun, siñabei hagumuchun hau lidan aban wéiyaasu, lugundun anhein asusereda ítara, hagibedaguba animaalugu áraabuna geyegua hau ábame hábürühan huagun.23Gama lumoun líchugubaña Wabureme le Hubungiute néchanigu ha húhaburugun, ábame agumuchaguagüdeina humaniña darí hagumuchagun sunsuinagubei.24Ha harúeitegu líchugubaña Bungiu labun hubafu, adüga ligíame lun maritawagúnhali lanme hawagun ubouagu. Úabei ni aban hádangiñe awandutün, hagumuchaguagüdübaña sun hagía.25Hágudaguañame guáriua ha habungiutegu, gama lumoun moucha humatia herederun lau hagolun ni lau pülata le aubei hafurarúa guáriua hagía, anhein hadüga ítara hábürühaba lidoun iyereehabúni ligibugiñe Bungiu.26Manüga huma lubeiti ni kata le iyereehabúti lun Bungiu húbiñoun, luéi giñe hagünrinchawaguniwa. Lunti lagünrinchawagun katei burí le, lunti lubeiti hanügüni kei katei iyereehabúti.Bible Society of Honduras