2 Lúrudu8
Mámarügüñein tau fein labagarida wügüri
1—Gúnfuli huméi gumadi burí le uágubei nariñaga hun uguñe, lun gayaraabei lan habagaridun ani gíbegua huguyame, ragǘ humeime ageiraü le, le füramase lubéi Bungiu houn hagüchagu.2Haritagua humá luagun sun üma le léibugagüdübei Wabureme le Hubungiute hun lidan fulasu mageirawati luagu bián-wein irumu lun lóuchagunün, lun lasubudiruni hisaminan, lun lasubudiruni anhein hagunfulirubei lubéi lumoun magunfulirun hubéi lan lugumadin.3Ani lau sun súfurigüdalanün, áfagagagüdalaün ilamaü, lárigiñe aba léigagüdünün tau maná, éigini to buga ibidiñebóun hun ni houn hagüchagu, lun lasubudiragüdüni hun luagu mámarügüñein lan tau fein habagarida gürigia, habagariduba lan giñe lau sun le lariñagun Bungiu.4Lidan sun bián-wein irumu ligía, mawesiruntu hadaüragun, máludun ligía hugudi.5Ariha huméi luagu bei laadün lan Wabureme le Hubungiute ítara kei labeichuni aban úguchili lisaani.6Gúnfuli huméi lubeiti lugumadin Wabureme le Hubungiute, inebe ligíame hun, falá humeime arufudahani le líchugubei hun.7Lugundun lanügüñadün Bungiu lidoun aban múa buiti, lidoun aban ageiraü buin umuti lau burí lirahüñü duna luma lísensen agei duna le ésehabei lidoun fulasu wayati luma burí lidoun dabíara.8Aban giñe múa le íchuguti türigu, sebada, beibei, igu, güranáda, oliwu luma sírudu.9Aban ageiraü le lunbei memegeirúnbadün lan éigini ñein súnwandan, ni amu katei; hadariruba gürabu lidan lidübüri, darí huguyame kóbüre lidan luwübüri.10Hadarirubei lubeiti sun éigini le lunbei hemegeiruni gama lumoun lárigiñeme heigin, kimule huguyame, lunti híchugun uéiriguni lun Wabureme le Hubungiute luagu múa buiti le líchugubei hun.Eweridiruni lun mabulieidáguniwa lan luéi Bungiu
11—Góunigi humá luéi habulieiduni Wabureme le Hubungiute. Mígira huméi hagunfuliruni lugumadin, larufudahan luma lilurudun, le uágubei nariñaga hun uguñe.12Danme hóuhadün kimule huguyame, aganawa huguyame tidan burí muna buitu to hábunaguboun,13ariha humeime luagu gíbeguaaña lan hilügüniña bágasu hama hilügüniña mudún, dandu higolun luma hani pülata, luma sun humegen,14mabuincha humatia lau pantaü, mabulieidun humeime Wabureme le Hubungiute le asagarubalün Ehiptugiñe, le meha ñein lubéi idamuni humá;15Ligía anügübalün lídangiñe lanarime fulasu mageirawati, le ñein hamuti hewe péisinitiña hama águru, le meha ñein lubéi ua lan duna. Gama lumoun aba lasagarun duna lídangiñe aban lidere dübü, lun líchugun hun lun hatun,16hóugüda lumutün maná lidan fulasu mageirawati, éigini le buga ibidiñebei hun ni houn hagüchagu, ladügünbalin sun le lun lǘnabudun hanaagun hungua ligibugiñe luma lun lóuchagunün, ani sun le aban fulesei hun.17—Maritaguadügü humatia hariñagun: Wagañeirun sun irisini le lau wáfaagun.18Lunti haritagun luagun Wabureme le Hubungiute, luagu ligía lan íchugubei erei hun lun hibihini, lun harihini lagunfuliruñein lan daradu le meha ladügübei hama hagüchagu.19—Gama lumoun anhaün abulieidagua luéi Wabureme le Hubungiute, lun hidin hárigi amu búngiugu lun háhuduragun houn, chouru numuti hun lúmagiñe guentó luagu hagünrinchawaguba lan sunsuinagubei.20Ítarameme kei lagünrinchagubaña lan Bungiu néchanigu ha hadarirun hémerirugu, ítara luba giñe hagünrinchawagun ladüga hadüraaguni le lubeibei Wabureme le Hubungiute.Bible Society of Honduras