Nunei Reantenangfo31
1Na rahida bei Yakupi taraoai we Labani ne kaisung fosa emadu eteyo, “Yakupi kawurua kia tane dai ne ra fi kiai sentenang ampa, tuti na tane dai ne rafoi, ne ra bitoya ninaifa.”2Kontaio Yakupi detioai weo Labani urengfo wiro mararising kariri fafongne ahang kaha.3Mayeai Yahwei medu we Yakupi deyo, “Barabera wau we nemu wawa fosa ene nu foi tuti we nemu terafosara. Yau ambori iwiwiaing wau.”4Ainanaya Yakupi demi inontarai manei sahu Leai tuti Raheli we ura weia to katai wia rora weninoifoi, katai ne kambing tuti domba etoa nai foi.5Mayeai medu we suru deyo, “Iwatio mune dai urengfo wiro mararising we yau kariri fafong nanai ahang kaha, wape towea kaha, weo Allai mano nehu dai somi wei nei weriria yau pampang.6Kontai muwaitawangnaifa, weo irufi we mune dai na mamboni paria.7Wape mune dai meikanggani yau, tuti yiwang nehu fiembaitafo pampang kawuru ampa. Masino tonanai ki, Allai wiro suati niari ne karirafo we yau kaha.8Weo na kutu mune dai medu deyo, ‘Kambing tuti domba ebaibua kahutua fosa mani ambori ewe fiembaitai we wau,’ ampefe kambing tuti domba fosa kiai etawing arikang ebaibua kahutuai. Tuti masino medu deyo, ‘Kambing tuti domba ehamantatowara fosa ambori we fiembaitai we wau,’ ampefe kambing tuti domba fosa kiai etawing arikang ehamantatowarai.9Tonanaifa, Allai kawurua kia mune dai ne fiahungfosa tuti dohongsa we yau.10Na kutu kambing fosa ete eriraufo mani, yemiei tuti yetioai we kambing mang fosa erau kambing wiwing mano ehamantatowarai tuti ebaibua kahutua fosa.11Tuti Allai ne wewai manei medu we yau na amiei rorongfoi deyo, ‘Yakupe!’ Iroa wei yeyo, ‘Ya Seng, yau nina!’12Mayeai wewaifoi medu we yau deyo, Boti sauaraifa, kambing mang tuti domba mang fosa erau kambing wiwing tuti domba wiwingno ehamantatowarai tuti ebaibua kahutua fosa terai. Inari fi ninaifa, weo kawurua Yetio Labani meikanggani wau fo ampa.13Yau mani Allai mano Yeinawi nehu tarai we wau na Beteli fo. Na wanaifa wau baungno kamiai tugu tuti warari na maning saituni tuti bohong kaiwo arerai we Yau. Ampefe moinenang we ro weru nu nini tuti barabera wau to nu taubaunumu naifoi aha.”14Ainanaya Raheli tuti Leai uroa we Yakupi ureyo, “Wiro ausobu fieai na dai ne rafoi ahang kaha.15Ninaia mani niari auru toyari inontarai aisei, weo dewayang auru we wau kawurua ampa. Kontai ra dewayang auru weafe mantauni dangna kai ampa.16Wape ra fubao Allai kiari weru aune daifoi tuti Dohongni we waufoi mani, ra nani we auru tuti tone arikangnesa. Ampefe nari kariri fianai aino Allai medurai we waufo.”17Ainanaya Yakupi meinenang fi kia fo, yuai ne arikangfosa tuti ne wiwingfosa to untafosa ayai.18Mayeai sikahera da tutu ne fiahung rabuangfoi tuti fi kiaio kawurua sobuai na Padan-Arami fo, da we tamang Isaki to kahofa Kanani.19Na kutu ete erafo mani, Labani da wa kiutu ne domba fosa enumiwawurufo na katai kehabi weninoifoi. Na kutu nanai kontaio Raheli kiamanana tamang ne terafimi fosa. 20Yakupi tetofa Labani inontarai Arami foi na wiro deisaharai, weo de wewu weruifo.21Ampefe Yakupi kia ne rafoi kiai tuti wewu weru Labania. I da kutu waya Efrati tuti da to uai Gileati.22We rahida botorua mani, arahio inontarai eteisaharai we Labani weo Yakupi wewu netarai ampa.23Na ahera Labani kia ne inontaraifosa efanduhisa tuti etawi Yakupi. Era wao rahida bo itufoi mani arahio ewati Yakupi na katai weuaio Gileati.24Dirua mani, Allai da ma na amiei rorong we Labani inontarai Arami foi, tuti medu wei deyo, “Bonansiau! Wiro modu kaiwo tapapa rabuang bei we Yakupi fanai!”25Na kutu Labani tuti ne inontaraifosa erawa sobu kataifoi mani, Yakupi kawurua biaung ne yawa tendafoi na katai weuaio Gileati. Labani tuti ne inontaraifosa kontai ebaung ene yawa tendafo kefang we Yakupi.26Ainanaya Labani medu we Yakupi deyo, “We fianie nari toninaifa, donio tofa yau tuti wowu nehu kamitungne suru toyari inontaraio tofu suru na mamuna rorongfo?27We fianie tofa yau tuti bodiwa weru yau ninaifa? Todoni fino boisaharai we yau kaha, ambori yedung wau na mararising, na rarung tuti na rebana tuti kecapi? Rebana28Wau kontai wiro bohong rahida we yau we inuna nehu tafui ea tuti nehu kamitungfo suru kaha. Webonggoi paria na fi nari ninaifa.29Yau mani nehu mambiriu we inari ne karirafo we mea. Wape nemu dai ne Allai medu we yau na dirufa Deyo, ‘Bonansiau! Wiro modu kaiwo tapapa rabuang bei we Yakupi fanai.’30Iwaitawangnai weo wau boyo barabera wau we nemu dai aha. Wape we fianie kumanana nehu aririwangfesa ninai?”31Ainanaya Yakupi yoa we Labani deyo, “Imatai, weo enehutituaitai dohongnao kohiwa nemu kamitungne suru weru yau fe.32Wape werawa wobu nemu aririwangwai na mandoni mani, wenani sodai aiboi marareha fo. Wera wei na tune doroi nesa euremireane, werawa wobu nemu fieai ika mani, ka nemua.” Yakupi medu tonanai weo serawawerahai, weo Raheli dino kiamanana tamang ne terafimi fosa ne.33Ainanaya Labani suai to Yakupi ne yawa tendafoi afui tuti to Leai ne yawa tendafoi afui kontai to ne woming wiwingfo suru une yawa tendafo afui, sera we ne terafimi fosa. Wape wiro sobu terafimi fosa kaha. Mayeai suai to Raheli ne yawa tendafoi aha.34Wape Raheli kawurua kia terafimi fosa tuti sonisa na rotang untafoi tuti minohi tawangni. Labani sera yawa tendafoa kai, wape wiro sobu terafimi fosa kaha.35Ainanaya Raheli medu we tamanai deyo, “Daie, dohonao kosou yau fe, weo wiro yoa yemang we wau kaha, weo iwati fi wiwing fefe.” Tuti Labani sera sauarai na mai paria, wape wiro sobu terafimi fosa kaha.36Mayeai Yakupi kesou paria ampefe medu we Labani deyo, “Kahie! Inari sara fiani, tuti sasari fianai aino inarine, donio rurai paria we bawi yau ma ninaifa?37Wera maino amene fianggengfea kai ampa, ampefe kahi wobu nemu fi wera wea fea? Masino wobua mani, boinawiai na ninaifa, na nemu inontarai nesa tuti nehu inontarai nesa euremine, ambori ehutuaifa we na turu mani mandoni dino dohong sarawa kaha ne.38Defuina piarei (20) iminohi ria wau, nemu domba tuti kambing wasa wiro antung manei mireha na inang enemanabufoi kaha, tuti wiro yang nemu kambing tuti domba mang wasa manei kaha.39Andowa memuna miung maneia mireha mani, wiro ikari we wau ahama kaha, mae mantaung yauno iriwangni ne. Inontarai ehamanana manei na rahida ete dirufo mani, bawi yau we iriwangni.40Wofoi sina yau na rahidafo, diru mani ikararutu tuti wiro yena kaha.41Defuina piareia (20) ninai iminohi na nemu mununei, irufi we wau fuina suraya boa (14) we isobu nemu kamitungne suru, tuti fuina wonang (6) we isobu nemu fiahungnesa, tuti meikanggani yau na kutu nehu fiembaitafo pampang.42Masino Allai mano nehu tafui Abrahami somi wei tuti dai Isaki detori foi weriria yau kaha mani, taraie kahi tawing yau ira na warahu arora. Wape nehu dadirane tuti fi irune, kawurua Allai deitawanai ampa tuti I kawurua kiutu kaiwo na diruafa, we mandoni dino niari sarawane.”43Ainanaya Labani yoa we Yakupi deyo, “Wiwing nini suru mani nehu kamitung suruine tuti arikang ninisa mani nehu tafui saine, tuti fiahung ninisa mani nehu fiahung saine. Kontai fi kiaio yetioai na nina mani nehu fi fine kai. Wape wiro inari fieai we irutawang nehu kamitungne suru tuti tafuisa kaha.44Ampefe tonana mani, ro ma tutabuhi kaiwo arerai na yau tuti wau, ambori kaiwo arerai ninai we fi aiririai pampang.”45Mayeai Yakupi kia kamiei bei dohongnia doari we kamiei tugu.46Tuti Yakupi medu we une inontarai fosa deyo, “Mefanduhi kamiei feai.” Ampefe efanduhi kamieifoa tuti etauwa dadai. Mayeai ea kiai era ruhiaia eminohi etampi rurang kamiei etauwi foi.47Labani dohong kamiei etauwi foi na wonong fino Yegari-Sahadutai , wape Yakupi dohong wonong fino Galeti .48Ainanaya Labani medu deyo, “Kamiei tutauwi nini, na rahida bonini tofongna mani, we fi ainawiai we yau tuti wau.” Nanai wedaya kamiei utauwi nini dohongni wonong fino Galeti49tuti Mispai. Weo Labani medu deyo, “Kadono Yahwei deitawang wedua turu, na kutu tunayai taterai wairoi ki.50Masino meikanggani nehu kamitungne suru ete rau wiwing siai aha mani, aromuoaifa, wiro inontarai manei niayai kefang turu kaha, wape Allai dino deitawang turu ne.”51Tuti Labani medu we Yakupi aha deyo, “Kamiei tutauwinei tuti kamiei tugu inariri doa nini, andino we fiainawiai we yau tuti wau.52Kamiei tutauwinei tuti kamiei tugu nini we fiainawiai weo wiro ira roaing kamiei ne suru mau sobu wau, we inari karira we wau kaha, tuti wau kontai wiro ro roaing kamiei ne suru ma nari karira we yau kaha.53Allai mano tane wereng Abrahami tuti Nahori usomi wei foi, Andino kiutu kaiwo we turu.” Ainanaya Yakupi fefora na Allai mano tamang Isaki somi weifoi.54Tuti Yakupi miung andowa manei, dohongni we korbani na uaifoi. Ainanaya wenoti inontarai fosa kiai ma etampi ruhiai tuti etena na uaifoi.55Kameaia mani, Labani niuna ne tafuisa tuti ne kamitungfo suru tuti mioangsa. Mayeai daraberahi to ne katai niayai nai foi aha.
The Seed Company