Nunei Reantenangfo30
1Na kutu Raheli deitawanai we wiro ne arikang we Yakupi kahai nanai, enerorong pirahai we ne tafuai. Ampefe medu we Yakupi deyo, “Bohong arikang manei we yau, bereri mani imereha rai.”2Ampefe Yakupi kesou Raheli paria tuti medu deyo, “Allai di yau e? Donio nehu mambiriu we iwedua wau we nemu arikang kahai ninae?”3Ainanaya Raheli medu wei deyo, “Boti nehu womingno Bilhai dinini. Bena riati ambori minohituti arikang manei we yau tuti na Bilhai isobu riria.”4Ampefe dohongno ne womingno Bilhai we Yakupi ne wiwing, tuti dena riati.5Bilhai doama minohituti kaisung manei we Yakupi.6Ampefe Raheli medu deyo, “Allai Dohong ne maifo we yau, kontai kawurua Tarao fianai aino yutang wea fo, tuti Dohong kaisung manei we yau.” Nanai wedaya dohong kaisungfoi wonong fino, Dani.7Raheli ne woming wiwingno Bilhai doama, minohituti kaisung mano mandufoi we Yakupi aha.8Ainanaya Raheli medu deyo, “Irurai paria we iwawoai ria nehu tafuai, tuti isobuaifa.” Ampefe dohong kaisungfoi wonong fino Naftali.9Na kutu Leai kontai deitawanai we i ne arikang ahang kahai nanai, kia ne woming wiwingno Silpai dohongni we Yakupi we ne wiwing.10Tuti Leai ne woming wiwingno Silpai minohituti kaisung manei we Yakupi.11Leai medu deyo, “Isobu mai ampa.” Ampefe dohong kaisungfoi wonong fino Gati.12Mayeai Leai ne woming wiwingno Silpai minohituti kaisung mano mandu foi we Yakupi aha.13Leai medu deyo, “Yau imirising paria! Ninaia mani, wiwingnesa kiai esahu yau we mano isobu mararisingne.” Ampefe dohong kaisungfoi wonong fino Asyeri.14Na kutu eteting potangfoi mani, Rubeni da na romi rorongfo, sobu dudaimi bong manea, ampefe kia ai bongfosa we inangno Leai. Raheli medu we Leai deyo, “Bohong dudaimi bongno nemu kaisungwai kiasa wasa, beiru teai we yau.”15Ainanaya Leai yoa wei deyo, “Oh! Wiro demoyarai we ka nehu mangnei kahae? Tuti nina mani boyo ka nari nehu aibong dudaimio nehu kaisungnei kiasa ma nesa ninae?” Raheli yoa wei deyo, “Bento ampefe diru nini Yakupi dena ria wau, we ibai nemu kaisungwai ne dudaimi bongnei.”16Na kutu ramindenafo Yakupi daraberahi na romifo, Leai da weuwia tuti medu wei deyo, “Diru nini bena ria yau, weo ibai kutu wau na dudaimi bongno nehu kaisungnei kiarifoi ampa.” Ampefe diru nani Yakupi dena ria Leaia.17Ainanaya Allai yoa we Leai ne nadifoi. Ampefe Leai doama minohituti kaisung mano ringfoi we Yakupi.18Leai medu deyo, “Allai dohong fiembaitai we yau kawuru ampa, weo kawurua yohong nehu woming wiwingfoi we nehu mangnei ampa.” Ampefe dohong arikangfoi wonong fino Isakari.19Mayeai Leai doama minohituti ne kaisung mano wonang foi we Yakupi.20Ainanaya Leai medu deyo, “Allai kawurua dohong fikahutu mahikai paria we yau. Kutu nina mani, nehu mangnei ambori dohong sua yau, weo yawing kaisung wonang wei fefe.” Ampefe dohong kaisungfoi wonong fino Sebuloni.21Mayeai Leai minohituti kamitung manei aha tuti dohongni wonong fino Dinai.22Ainanaya Allai aro Raheli ampefe yoa we ne nadifoi, tuti dohongni kirawahi kaha.23Ampefe Raheli doama minohituti kaisung manei. Ainanaya medu deyo, “Allai niari yau imamaya kahai ampa.”24Ampefe dohong kaisungfoi wonong fino Yusupi, mae medu deyo, “Kadono Yahwei dohong kaisung manei we yau aha.”25Raheli kawurua minohituti Yusupi fo, Yakupi medu we Labani deyo, “Daie! Boiai yau ambori yarabera yau to nehu katai itaubaunuhu nai foi aha.26Yeyo ika nehu wiwingnesa tuti nehu arikangnesa, ea kiai nehu fiembaitai na kutu irufi we waufo. Weo boitawanaifa irufi we waufo na mamboni paria.”27Wape Labani medu wei deyo, “Masino enemuwawu yau mani nayai na nina, weo wau wedaya mani Yahwei mioang yaune.”28Kontai medu aha deyo, “Boyo ibai wau na beiru mani ambori ibaitai ki.”29Yakupi yoa wei deyo, “Mantaung wau boitawang kariri todoni irufi we wau fo ampa, tuti todoni yehung nemu fiahungwasara bitoya nina.30Weo wiro nemu ra bitoya kaha, na rahida bo ira ma sobu wau fo. Wape ninaia mani nemu ra bitoya paria. Yahwei kawurua mioang wau na kutu inayai na ninaifa. Ampefe ninaia mani yeyo irufi we nehu munurorongne.”31Labani yoa deyo, “Fianai aino yohongnai we wau ne?” Yakupi yoa deyo, “Oh! Wiro yutang wau we bohong fieai we yau kaha. Mae yeyo yehung nemu kambing tuti domba wasa aha, masino roa we fi yeoane.32Rahida nini roa we yau, we ira sabu nemu domba ehamantatowarai rabuangnei kiai, tuti yiri domba antung mang mano nyumetang tuti kambing ehamantatowarai fosa kiai, ikasa we yau. Nana mani nehu fiembaita finana.33Tuti ambori na rahida fui mani boitawanai we inari fi na mai ete bereri e. Masino ro ma botio nehu fiembaitafo, amani kambing ehamantatowarai kaha tuti domba antung mang enuametang kaha fosa, nana mani ikamananasa ria wau.”34Mayeai Labani yoa wei deyo, “Yo, iroa, ampefe nari kariri fi boyoai nanaia.”35Ainanaya na rahida nani kontaio Labani diri kambing mang tuti kambing wiwingno enetarai ehamantatowara fosa tuti mano enetarai beibua kahutua fosa kiai, tuti domba mang enuametang fosa kiai, tuti dohongsa we ne arikangfosa ambori etahungsa.36Mayeai Labani demi ne arikang fosa eha fiahung fosa era wairoi rahida botoru, ambori enayai waroi weru Yakupi. Ampefe Yakupi niayai na nanai we deitawang Labani ne kambing tuti domba enaya fosa.37Mayeai Yakupi kia ai arirawang kahe na ai hawari, ai badami tuti ai berangani, tuti seikahutu ai rerafo awao baibua, donio kiamantatowarai.38Yakupi dohong ai arirawangfo watai na katai kambing tuti domba fosa etunung nai foi. Weo kambing tuti domba fosa erirau mani na kutu erama etunungfo.39Masino kambing fosa erirau kefang ai arirawangfo mani, ambori ene arikangfosa ehamantatowaraifa.40Mayeai mani, Yakupi diri dombao ete eriraufosa tuti dohong domba tuti kambing ehamantatowarai tuti enuametang fosa enumiwawerasa, na Labani ne domba tuti kambing fosa. Na niari toninane Yakupi sobu fiahung efau we mantauni, tuti kiasa weru Labani ne kambing tuti domba fosa.41Na kutu kambing tuti domba mano ewemambiriu fosa erirau mani, Yakupi dohong ai arirawangfoa watai na katai kambing tuti domba fosa etunung mereha naifoi rorongfo.42Wape masino kambing tuti domba efanahang fosa erama mani, wiro dohong ai arirawangfoa watai na katai etunung mereha naifoi rorongfo kaha. Ampefe fiahung efanahang fosa mani we Labani, mae neo ewemambiriu fosa mani Yakupi nengsaine.43Na ne niari tonanafo Yakupi ne rafoi fiabai aha, tuti ne kambing tuti domba bitoya, woming mang tuti wiwing efau, keledai tuti unta bitoya kontai.
The Seed Company