1 TIMOTIUSI3
1Kavo ikavora ninesi ma sive vata mo, “Siniotu semajar sembe veveru nana kuaruvi vesanemitiar pasia, i ma sane vesie nanaripi veve vitate vesiri.”2Apavo siniotu veveru na kuaruvi vesanemitiar pai ma, siniotu venanari sasara va, veviniemi pa siri to vea, e ruin tiawan nie tarai pai, ruini ariri sanepaja vetindija, nienari buai viate, sane vesie siniotu sendama so nie anio pai, e diadi dieniniau siniotu,3siniotu viunu sua va, e sawawara siniotu viono mamu va. Vape vesie pa, mieriat maso siniotu vevesiei, sane pa vesie na mari pai e re pasi ma sibaba pipi va.4I ma nari ruin nienari ariri nie anio raropa tutiri vesie, e dieniniau nie atuma pasia ave senggorusari e setatuani.5Aso masisi siniotu pesi tietara nienari ariri matau nie anio raropa, toanetoi so diadi nienari ariri Allah nie kuaruvi vesanemitiar pai pa?6Siniotu veveru nana kuaruvi vesanemitiar pai mamo, kasa siniotu veve Kristen vavoru va, aso nari sienandiki, avori nari Allah diono hukuman maso i ariri Bilis pai nana papopa.7Ariria mamo i ma siemuai sano viate nana vorira kuaruvi vesanemitiar pasia, ave amamo nari kaiwasa pasia sesisiajari vape moja, veito kasa tiau so Bilis nie jevi pai va.8Siniotu vekotae venanaripi nana kuaruvi vesanemitiar pasia ma nari siniotu vene tenam viate, nie tapare pai vie asa va, i ma dunu sua vepau va e re pasi ma sibaba pipi va.9Sia ma nari sendu kepana aniau sanetiar nana Kristen, Allah vieruana to manau pai, e setenam ariri tutir sane raro veve sren pai.10Nari kaiwasa vesanemitiar pasia sesotouru sia papori, e masisi sembaro sasara mamo, janama diadi so senggota e senanaripi nana kuaruvi vesanemitiar pai.11Sembiniemi pasia kota, siniotu vene tenam viate, senggavo sisiajara siniotu vevesie vape moja. Nari senduini setawan sene tarai pasi, e setindija nana pi vura.12Siniotu vekotae venanaripi nana kuaruvi vesanemitiar pai ma, nari veviniemi pa siri to vea, ruin nienari ariri nie atuma pasia tutir nie anio raropa to vesie.13Siniotu vekotae venanaripi nana raro kuaruvi vesanemitiar to vesie pasia, nari kaiwasa tietuana sia e diadi senggavo tutiri sematai va nanapi sene sanetiar pasi maso Yesus Kristusi.14Ipiri sanetiar toapa, sawawara nari iramatu isajo au. Vape toapa jana kota, ivui surat ninei maso au,15ave masisi isisieu mamo, ruini to manau, toanetoi nari tatenam ariri Allah nie kaiwasa, andina kuaruvi vesanemitiar nana Allah vetenam pai. Kuaruvi vesanemitiar ninei, vieva airiri viosa to karakuai e visasionama Allah nie aniau vetindija pai.16Vevata mo, aniwara nanapi Allah vieruana nie sanepaja to manau e i ma bieba vesiri:I ma vieruana nie tarai pai nana vava siniotu pa,e Wainunu Sren pai vieruana toapa i ma vevata,tutiri siniotu rora pasia sesajori kota.Nie topanusara pai dumini maso kaiwasa vura,e sesanemitiari nana dunia nei vetutira,e Allah rusasani so rora wa.
The Seed Company