HESEKIEL21
SAATE Nwu Kapamii
1Ni di SAATE nwu ɔlaa lawa kuatɛɛ alɛ:2“Otii obi, yɔ anu lɛfɔ fakyɔɔ Yerusalem, faayie lɛkya fayila di kakleklekɔ nwu suoto. Buɛ ɔlaa fatɛ, kuoyila di Israel kasɔ suoto.3Tɔkɔ Israel kasɔ nwu falɛ: ‘Nnya ɔlaa wɔ di SAATE nwu kobuɛ ni alɛ: N-yɛ fɔ di suoto. Kamananfi kapamii nii mbɔkɔtɛ di kopoo nika, nin-wɔɔsa batininitɛ ku bakpiletɛ, akyuu nwu anyɔ ndiki di suoto lɛfɔ.4Ta kɔwa ni batininitɛ ku bakpiletɛ ɔwɔɔsa oso yi, kapamii nii kamabɔkɔtɛ di kopoo kamɛ di otii biala suoto, diɛyɔ ni di kalakasɔ diɛlase ni di katookasɔ.5Ninfɛ di batii bamuu kamatofo alɛ ami SAATE nwu niɛnanfi kapamii nii lɛbɔkɔtɛ di kopoo nika nɛ; klɔbasimpɛ kakple kabuo di kopoo kamɛ.’6“Nkpo oso tũuni, otii obi! tũuni ku otu biɛle ku ɔkɔnsɔlo.7Nse bɛɛkaalɛ fɔ kafɔɔ alɛ, ‘Obe oso footũuni?’ tɔkɔ ma falɛ, ‘Ta ɔlaa wɔ nikɔwa ni oso. Otu biala kamanyanakĩi, kɔnɛɛ biala kafɔɔ kamakpiɛkpiɛ; ninwuna biala kamaloo ɔnyɛɛ, dikunkyi biala kafɔɔ kamabla kpɔkɔkpɔkɔ fɛ ntu.’ Nfɛ diɔwa! Nwaako diɔwa ɔbawa, SAATE Kplɛ nwu niebuɛ.”8Ni di SAATE nwu ɔlaa lawa kuatɛɛ alɛ:9“Otii obi, buɛ ɔlaa fatɛ faabuɛ falɛ, ‘Nnya ɔlaa wɔ di Saate nwu kobuɛ ni alɛ:“ ‘Kapamii, kapamii,bɛɛlɔɔfɔ ni, beefifia ka ni kafɔɔ nnɔnyi.10Bɛɛlɔɔfɔ ka bɛɛta batii olo,beefifia ka nnɔnyi alɛ kaasesee fɛle ɔplalaa!“ ‘Sɛɛ buanya suoto lɛyɔɔ di obisuɔtɔbi nii Yuda kayofo suoto? Kapamii nwu lekyidi kawesee nwu okle biala.11“ ‘Beediki kapamii nwu alɛ baafifia ka nnɔnyi,alɛ baamufũ ka ku kɔnɛɛ;bɛɛlɔɔfɔ ka beefifia ka nnɔnyi,beelolaa ka bɛɛta batii lotɛ nwu kɔnɛɛ.12Otii obi, wi kaku ku mmuntũ ɔpɛ,diekye kapamii nwu n-yɛ di batii nii suoto;kayɛ di Israel baka bamuu suoto.Bɛɛyɔ ma bɛɛta kapamiidiɛkyakaa ni ku batii nii.Nkpo oso pɛ kɔnɛɛ di lɛkankpɛɛ.13“ ‘Nwaako ɔsɔ onyu kamawa. Ni be nfɛ nimabla Yuda kayofo nwu, nka di kapamii nwu nnyu ni nyakatãa, nse kaasimbla ɔkpɛ? SAATE Kplɛ nwu niebuɛ.’14“Nioso otii obi, buɛ ɔlaa fatɛfaapɛ kafɔɔ anɛɛkya.Ta kapamii nwu kasafɔ asaa sɛnyɔ,bia sitiɛ simu.Kapamii ka manlo ni batii kale-kapamii ka ninlo ni batii kpinwu,kɛɛmana ma keekyi ni di ɔfankyi biala.15Alɛ situ kaanyanakĩibatii kpinwu kafɔɔ nnɔɔ,ntɔɔyɔ kapamii nwu lɛtɛ lɛta batii olodi nyoko lɛma mmuu.Ao! Bɛɛbla ka alɛ kaasesee fɛle ɔplalaa,bakle ka bɛɛta batii olo.16Ao kapamii, safɔ asaa fafe oletanɛɛkyɛ,faafe di ɔmɛntukyɛ nfɛdi kakɔ lele di kapamii lɛfɔ lemunikĩi kɛɛkyɔɔ.17Ami kafɔɔ kamapɛ anɛɛkya nii,n-se ɔblɔ yakayaka nii kanya ntɔɔyɔɔ.Ami SAATE nwu niebuɛ.”Babel Ɔka Kapamii
18Ni di SAATE nwu ɔlaa lawa kuatɛɛ alɛ:19“Otii obi, diki esuku ɛnyɔ di Babel ɔka kapamii kafe, akyuu nwu anyɔ sikye kasɔ di kasɔ nwu kanwii suoto. Bla nsũlɛtɛsaa di lɛba le di osuku nwu lɛkɛ kuosifi ni okpoo kplɛ nwu.20Diki osuku onwii fata kapamii nwu kawa di Amon batii suoto di Raba, di ɔbamba kafɔɔ kuwa di Yuda ku Yerusalem okpoo siene nwu suoto.21Diekye Babel ɔka kamayila di osuku nwu nkyakakɔ suoto, di esuku nwu ɛnyɔ nsukunya, alɛ ɔɔpɛ sɛbɔ: Abawii atrebi ku kɔtaa, an-wolaa asaa kamɛ di afiɔ nɔɔ ɔkyɛ, abatɛ anu an-nyunyu babɔkɛɛ akɔɔ kamɛ.22Letrebi le ninle ni Yerusalem lele kamawa di oletanɛɛkyɛ nɔɔ, lɛba le abatofo ni oyoyiɛ abiɛsaa, abadiki kanya anta ni batii olo, abapɛ ni kakpɛ kamuntũ, abatofo ni oyoyiɛ abiɛsaa di n-yoko nwu suoto, ampɛ ni kafɔɔ ditii anse ni ntakalekɔ.23Ote dibate fɛle sɛlaa ku afunu sɛbɔ ɔpɛ ninta mba niaka ntam baatɔɔ nii, kafɔɔ abanyumasa ma lɛpɔɔ okpi lɛma, ammufũ ma sɛlanle.24“Nkpo oso nnya ɔlaa wɔ di SAATE Kplɛ nwu kobuɛ ni alɛ: ‘Ta bienyumasa ni lɛpɔɔ lee okpi di ɔtaka oyila lee di batii suoto kayi odie kamɛ, biediki sikpile lee kayi di asaa ya amuu biɛbla ni kamɛ- ta biabla ni nle mmle oso yi, babamufũ ye sɛlanle.25“ ‘Oo Israel ɔka wɔ ninankpa ni kɔmɛ ku kpiletɛ, nnwɔ di dii nɔɔ ntoowo ni, di letoko nanfi nɔɔ obe ntoodu ni kayɛntɛlekɔ nini,26nnya ɔlaa wɔ di SAATE Kplɛ nwu kobuɛ ni alɛ: Tekete disi niniisaa lɛfɔ, faatekete lɛkakoto nwu. Dilɔbasinte fɛ mmle diate nii: Babatakatɛ mba niɛwa ni kasɔ katoo, manwakosa kafɔɔ mba niɛtaka ni katoo kasɔ.27Kawɔɔ! Kawɔɔ! Kamabla ni kawɔɔ! Blɔbasinse ni lɛbla diɛlaase di obe wɔ di otii wɔ lele diɛtɛ dile ni kamawa nii; nnwɔɔ kamayɔ ni nta nɛ.’Kapamii Ku Amon Batii
28“Afɔ otii obi kafɔɔ yi, buɛ ɔlaa fatɛ, faabuɛ falɛ, ‘Nnya ɔlaa wɔ di SAATE Kplɛ nwu kobuɛ ankyeko ni Amon batii ku atufa lɛma suoto alɛ:“ ‘Kapamii, kapamii,bɛɛnanfi bɛɛta batii olo,beefifia ka nnɔnyi alɛ kawɔɔsa asaaalɛ kasesee kafɔɔ fɛle ɔplalaa!29Nu bɔɔnya sɛlaa ku afunu odiki otuo mankyeko suoto leeku kakyɔnkyɔ sɛbɔ ɔpɛ mankyeko suoto lee yi,babayɔ nya mantika dibakpiletɛ ba babalo ni simu,mba dii nintɔɔwa nii,mba di letokonanfi obe ntoodu ni kayɛntɛlekɔ nini.30Kplesa kapamii nwu fakpee di kopoo nika.Di lɛba le baabla fɔ ni,di bawa lɛfɔ kasɔ suoto,kamakanko fɔ.31Kamanyɛɛnɛ ɔblɔ yakayaka nii nkpete fɔ,ninwuna kafɔɔ lɛblɔfiɛ nii ɔtɔ nkpete fɔ di suoto;kamayɔ fɔ nkpee di amumu bablatɛ nnɛɛ,batii ba nin-ye ni asaa ɔlalaasa kamɛ nwaa.32Fabale ntɔɔni fanta ɔtɔ nwu,babawii fɔ ntɔ di kasɔ lɛfɔ suoto,blɔbasinnyuma fɔ diidii;diekye ami SAATE nwu niebuɛ.’ ”The Seed Company