2 KRONIKA34
Yuda Ɔka Yosia
1Alɛɛ anɛ di Yosia lafũ fiɛ aabale ɔka, ni aale sɛka alɛɛ afosi-atiɛ-ninwii di Yerusalem nɛ.2Aabla lɛsaa le niasiɛko ni di SAATE nwu anu, aakyɛ kafɔɔ di ɔwa nɔɔ Dawid sisuku suoto, atakyi aafe oletanɛɛkyɛ ee ɔmɛntukyɛ.3Di sɛka nɔɔ olebee lɛlɛɛ nɛnle kamɛ, di obe wɔ eekple ale ni okosopo yi, ni aakye kasɔ aatoowolaa ɔwa nɔɔ Dawid Yaa nɛ. Di lefosi lɛlɛɛ nyɔɔfa nɔɔ kamɛ yi, aakye kasɔ aatɔɔkpakpaa ntakalekɔ nwu, Asera sewoso, afiɔ ya baawola ni ku asaa ya baanyanakĩisa ni di atembi awo kanya di Yuda ku Yerusalem.4Di kanyu nɔɔ kalɔ baabibiɛ Baal seleɔta akyikye baatɛ kaasɔ; aakpakpaa olufui seleɔta akyikye ya niataka katoo aalenkee nya ni wɛkyɛwɛkyɛ, ni aakpakpaa Asera sewoso nwu, afiɔ ku atembi nwu nɛ. N-ya mmle aabibiɛ wɔkyɔwɔkyɔ ni aasamiisa nya aakpete di batii ba niatɔɔta ole baatɔɔta nya ni sɛkya suoto nɛ.5Ni aafiɛ olebatatɛ nwu akufi di seleɔta akyikye lɛma nwu suoto, ni aakleklesa Yuda ku Yerusalem nɛ.6Di Manase, Efraim ku Simeon sekpoo, dialaadu ni bia Naftali, ku sekpoo biɛle se niamana ma siakyi ni yi,7aabibiɛ seleɔta akyikye nwu ku Asera sewoso aatɛ kaasɔ, ni aakuɔ afiɔtii nwu aabla mpu, aakpakpaa kafɔɔ olufui seleɔta akyikye amuu di Israel omuu. Ninfɛ aapɛakple aasifi Yerusalem nɛ.Baase Olekatakɔ Nwu Lelolaa
8Di Yosia sɛka olebee di lefosi lɛlɛɛ nɛnle kamɛ, alɛ okleklesa ni kasɔ nwu ku olekatakɔ nwu yi, aakpee Asalia obisuɔtɔ Safan ku okpoo kplɛ nwu ɔka Maaseia, ku nnwɔ nintɛ ni asaa nsũ, Yoahas obisuɔtɔbi Yoah, alɛ balalolaa SAATE Yaa nɔɔ olekatakɔ.9Ni baakyɛ oletatɛ nɔɔfo Hilkia ɔkyɛ baalaayɔ koto ko baawako ni Yaa olekatakɔ kamɛ baatɔɔ nɛ. Nko di Lewi batii ba niale ni n-yoko banyuntɛ lafũ baakyeko ni Manase, Efraim ku Israel batii ba niabu ni bamuu nfũ ku nko baafũ baakyeko ni Yuda ku Benyamin batii ku Yerusalem okpoo basiɛtɛ bamuu nfũ.10Ninfɛ baayɔ koto nwu baata basuɔtɔ ba baadiki alɛ bayila ni di SAATE nwu olekatakɔ ɔkpɛ kanya nɛ. Basuɔtɔ ba mmle lata bakpɛntɛ ba nialolaa, baase ni kafɔɔ olekatakɔ lɛbla nwu nkpo koto.11Baata kafɔɔ ayo babantɛ ku ayo batofotɛ koto alɛ baya afuɔ ya baakyɛkyɛsa ni kasɔ ku sewoso se bababla ni sewoso sanale ku selenle ku akpaka bata ni ayo ya di Yuda baka lata aalalaa nii.12Basuɔtɔ nwu labla ɔkpɛ di onukwale kanya. Batii ba niayila ma ni kaanya baatootuo ma ni mmle baabla ni ɔkpɛ nwu niale Yahat ku Obadia, Lewi batii banantii ba niakye ni Merari, ku Sakaria ku Mesulam ba niakye ni Kohat. Lewi batii- mba bamuu niatofo ni sinu asansaa ɔsa kamɛ nwaa-13layila di akpɛnsaa batukatɛ kanya, baatoonyu kafɔɔ bakpɛntɛ nwu bamuu di ɔkpɛ nwu biala suoto. Lewi batii nwu bawo lale akũ bakpanatɛ, asaa batuotɛ ku n-yoko banyuntɛ.Baanya Kufiofa Kukũ Nwu
14Di obe wɔ baatoodieko ni koto ko baalaatɛ ni di SAATE nwu olekatakɔ yi, ni di oletatɛ Hilkia lanya Kufiofa Kukũ ko di SAATE nwu lata aafenko ni di Mose suoto nɛ.15Ni di Hilkia latɔkɔ kukũ kpanatɛ Safan alɛ, “Ntɔɔnya Kufiofa Kukũ nwu di SAATE nwu olekatakɔ kamɛ.” Ni aayɔ kũ aata Safan nɛ.16Ninfɛ di Safan layɔ kukũ nwu aakyɛnko ɔka, aatɔkɔ nwɔ alɛ: “Banɔɔfotii lɛfɔ kɔbla lɛsaa biala le bɛɛyɔ beekpee ma ni ninnɛɛ.17Batɔɔyɔ koto ko niate ni di SAATE nwu olekatakɔ bɛɛta ato, bɛɛyɔ kũ kafɔɔ beekpee di ɔkpɛ nwu banyuntɛ ku bakpɛntɛ nwu nnɛɛ.”18Ninfɛ di kukũ kpanatɛ Safan latɔkɔ ɔka alɛ, “Oletatɛ Hilkia lɛtɛɛ kukũ kunwii.” Ni di Safan laka kukũ nwu kamɛ sɛlaa di ɔka nwu anu nɛ.19Di ɔka lanu ni Kufiofa nwu kamɛ sɛlaa yi, aabɛbɛɛ akpeele wua nɔɔ nwu.20Ni di ɔka lakpee Hilkia, Safan obisuɔtɔbi Ahikam, Mika obisuɔtɔbi Abdon, kukũ kpanatɛ Safan ku ɔka tɔkyɛntɛ Asaia alɛ:21“Bikyɛ biɛlaawolaa asaa kamɛ di SAATE nwu ɔkyɛ, di lɛsaa le bɛɛkpana beekpee ni di kukũ ko mmle bɛɛnya ni suoto, bita ami ku batii ba niebu busi ni di Israel ku Yuda. SAATE nwu ɔblɔ wɔ niɛwa wo ni di suoto latɛ kukpe osie ta bate loo ditamufũ ni SAATE nwu ɔlaa baaklee ni oso; batakyɛ di asaa ya amuu bɛɛkpana beekpee ni di kukũ ko mmle kanya.”22Ninfɛ di Hilkia ku batii ba baakpee alɛ baatikanko nwɔ ni lakyɛ baalaakakatɛko ɔlaabuɛtɛtɛ-sanko Hulda wɔ niale ni Salum ɔsɔfɔ. Salum lale akpeele katɛkɔ nyuntɛ, ote niale Tokat wɔ niale ni Hasra obisuɔtɔbi nɛ. Ɔsanko nwu lasiɛ di Yerusalem, di Kale Dikudi nyɔɔfa kamɛ.23Ni di ɔsanko nwu latɔkɔ ma alɛ, “Nnya ɔlaa wɔ di SAATE Israel Yaa nwu kobuɛ ni alɛ: Bitɔkɔ osuɔtɔ wɔ niekpee ye ni ɔkyɛ nii bilɛ,24‘Nnya ɔlaa wɔ di SAATE nwu kobuɛ ni alɛ: Kamayɔ letokonanfi nwako di kasɔ ka mmle ku batii ba ninsi ni ninka suoto- akpaani ya amuu bɛɛkpana beekpee ni di kukũ nwu batɔɔka ni kamɛ di Yuda ɔka anu.25Ta batosĩ mi beefiɛ ni kafɔɔ olufui bɛɛta ni bayaa bamba, beekpee mi ni ɔblɔ kafɔɔ di asaa ya amuu di nnɛɛ lɛma labla ni oso yi, ɔblɔ nii kamasoo kunkpete di lɛba le mmle kunɔɔwa ni ɔbanii.’26Bitɔkɔ Yuda ɔka wɔ niekpee ye alɛ bibawolaa ni asaa kamɛ di SAATE nwu ɔkyɛ bilɛ, ‘Nnya ɔlaa wɔ di SAATE Israel Yaa nwu kobuɛ ni di sɛlaa se feenu ni suoto alɛ:27Ta faakyi ni di otu lɛfɔ kamɛ, faawakosa ni suoto lɛfɔ kasɔ di SAATE nwu anu di obe wɔ faanu ni ɔlaa wɔ aabuɛ ni di lɛba le mmle ku batii nini suoto, ta faawakosa ni suoto lɛfɔ kasɔ di anu nii, faabɛbɛɛ ni kafɔɔ akpeele wua lɛfɔ nwu, faawi ni di anu nii oso yi, ntoonu fɔ ɔlaa, SAATE nwu niebuɛ.28Nfɛ kamata fansifi bate lɛfɔ nfũ, babakokaa fɔ kafɔɔ di atoko ɔkyɛ ole kamɛ. Anu lɛfɔ dilɔbanya letoko nanfi le nimuu kamayɔ nwako ni di lɛba le mmle ku mba ninsi ni ninfũ suoto.’ ”Nioso baayɔ ɔsanko nwu kanya didiki baakyɛnko ɔka.
Yosia Lanii Kanya Alɛ Abakyɔɔ SAATE Nwu Ɔlaa Kotoko
29Ninfɛ di ɔka nwu lalɛɛ Yuda ku Yerusalem banɔɔfo bamuu aasiisa nɛ.30Ni di ɔka lakata aakyɛ SAATE nwu olekatakɔ ku Yuda batii, Yerusalem batii, olebatatɛ ku Lewi batii- diɛyɔ ni di obisɔ dialaadu ni ɔnɔɔfo. Ni aaka Kanya Ninii Kukũ ko baanya ni di SAATE nwu olekatakɔ kamɛ sɛlaa simuu aakpee di atoko lɛma kamɛ nɛ.31Ninfɛ di ɔka layila di lɛkpaka nɔɔ ɔlɔɔkɔ, ni aase kanya ninii nwu lɛfɔle lɛbla di SAATE nwu anu- alɛ abatikanko SAATE nwu, anklee kafɔɔ sɛlaa nɔɔ, afiofa ku sɛsaabla ku otu nɔɔ omuu ku ɔkla nɔɔ omuu, an-le kafɔɔ kanya ninii nwu sɛlaa se bɛɛkpana beekpee ni di kukũ ko mmle kamɛ.32Ninfɛ aata otii biala di Yerusalem ku Bennyamin layɔ suoto lɛma baakpee di ntam nwu kalɔ nɛ; Yerusalem batii labla nle mmle di Yaa kanya ninii kanya, bate lɛma Yaa nwu.33Ni di Yosia ladiki afiɔ ayududusaa nwu amuu di nsɔ be mmuu niale ni Israel batii nle, aata kafɔɔ batii ba bamuu niawɛ ni di Israel lasumu SAATE Yaa lɛma nwu. Di obe wɔ aasiɛ ni nkpa kamɛ yi, batasĩ SAATE nwu, bate lɛma Yaa otikanko.The Seed Company