Ezekiyeli44
Ibango ry’ubuherezi risubizwaho
1Maze uwo muntu angarukana mw’irembo ryo hanze y’Ingoro, riraba mu buseruko, ryari ryugaye.2Uhoraho aca ambarira ati: “Iri rembo rizokwame ryugaye; ntihazogire uwuryinjiriramwo. Rizokwame ryugaye kuko Uhoraho Imana ya Isirayeli ari ryo yinjiriyemwo.3Umuganwa wenyene ubwiwe, ni we ashobora kuryicaramwo, akarira imbere y’Uhoraho. Aze yinjire aciye mu nzira y’ibaraza y’iryo rembo, kandi aho nyene azobe ari ho asohokera.”4Maze anjana mu nzira y’irembo riraba mu buraruko, anshikana imbere y’Ingoro. Ngize gutya mbona ubwiza bw’Uhoraho bwuzuye Ingoro y’Uhoraho, maze nikubita hasi nubamye.5Uhoraho aca arambarira ati: “Mwana w’umuntu, ihweze neza, kandi wumvirize neza, ushire umutima ku vyo ndakubwira bijanye n’ivyashinzwe ko bitegerezwa gukorwa mu ngoro y’Uhoraho. Wumvirize neza ingene amarembo y’Ingoro azokoreshwa haba mu kwinjira canke mu gusohoka.6Ubwire abagarariji ari bo Bisirayeli, uti: Uku ni ko Uhoraho Nyeninganji avuze: Geza aho gukora ibizira, yemwe Bisirayeli!7Ku bindi bizira mwakoze mwongeyeko kuzana abanyamahanga batakebwe haba ku mutima canke ku mubiri mu Ngoro yanje, muhumanya urusengero rwanje, mukiriko muranshikanira ivyokurya, ibinure n’amaraso, maze muva mw’isezerano ryanje.8Aho gukora ibikorwa nabajeje bijanye n’ivyejejwe vyanje, mwabihaye abanyamahanga ngo abe ari bo bitaho Ingoro yanje.9Uku ni ko Uhoraho Nyeninganji avuze: Nta munyamahanga atakebwe ku mutima no ku mubiri yemerewe kwinjira mu Ngoro yanje, naho yoba uwuba mu Bisirayeli.10Abalewi bagiye kure yanje igihe Abisirayeli bashwiragira, bakanta bagakurikira ibigirwamana vyabo bategerezwa gushikwako n’ingaruka z’ivyaha vyabo.11Boshobora gukora ku Ngoro nk’abarinzi b’amarembo yayo bakongera bagakora ibikorwa vyo gucumita ibimazi vyo guturira, no guhagarara imbere y’abantu babakorera.12Ariko, kubera bafashije abantu banje gukorera ibigirwamana, bagatuma Abisirayeli bagwa mu caha, ni co catumye ndahira manitse ukuboko, ko bategerezwa gushikwako n’ingaruka z’icaha cabo, ni jewe Uhoraho Nyeninganji ndabivuze.13Ntibaze banyegere ngo bankorere nk’abaherezi, canke ngo begere ivyejejwe vyanje canke amashikanwa yanje yejejwe; bazokwamane isoni z’ibizira bakoze.14Ariko nzobagira abarinzi b’urusengero, mbahe no gukora ibikorwa bindi vyose birukorerwamwo.15Ariko abaherezi, ari bo Balewi bamuka kuri Sadoki, bagumye mu bikorwa vy’Ingoro igihe Abisirayeli bamvako, baze begere, bankorere; bazohagarare imbere yanje banshikanire ibimazi vy’ibinure n’amaraso, ni jewe Uhoraho Nyeninganji ndabivuze.16Ni bo bonyene bazokwinjira mu Ngoro yanje; ni bo bonyene bazokwegera imeza yanje bankorere, bashitse ivyo nategetse.17Nibinjira mw’irembo ryo mu rugo rw’imbere, baze bambare imyambaro yera; ntihaze hagire ico bambara kirimwo ubwoya mu gihe bazoba bariko barankorera ku marembo y’urugo rw’imbere canke imbere mu Ngoro.18Bazohore bambara ibitambara vyera ku mitwe, bambare n’amabutura yera. Ntihazogire ico bambara cobatera kubira ivyuya.19Nibasohoka baja aho abantu bari mu rugo rwo hanze, bazokwambure iyo myambaro bankoreye bambaye, bayisige mu vyumba vyabigenewe, baheze bambare iyindi myambaro, kugira ngo ntihagire uwo bakwegera kuba inyegu bitewe no gukorwako n’iyo myambaro.20Ntibazokwimoshe umushatsi wose canke ngo batereke umushatsi wabo ube muremire, bazokwame bawugabanya gusa.21Ntihazogire umuherezi yinjira mu rugo rw’imbere yanyoye umuvinyu.22Ntibazorongore abapfakazi canke ngo bahukane; bazorongore inkumi zo mu Bisirayeli gusa, canke abapfakazi b’abandi baherezi.23Bazokwigishe ubwoko bwanje itandukaniro ry’ahera n’ahasanzwe, babigishe gutandukanya ibihumanye n’ivyejejwe.24Nihagira abagira ico bapfa, abaherezi bazobe ari bo bababera abacamanza, babatunganiririze bakurikije amategeko yanje. Bazokurikize ivyagezwe vyanje n’ivyo nihanikirije ku misi mikuru nategetse, kandi baze beze Isabato yanje.25Umuherezi ntaze yihumanishe kwegera ikiziga. Ariko nimba uwapfuye ari se, nyina canke uwo bavukana, aho arashobora kumwegera.26Inyuma yo kwiyeza, azorindire imisi indwi.27Umusi azokwinjira mu rugo rwo haruguru gukora ibikorwa vy’ahera ho mu rusengero, aze yitangire ikimazi, ni jewe Uhoraho Nyeninganji ndabivuze.28Ni jewe nzoba umugabane wabo. Ntimuzobahe amatongo muri Isirayeli; ni jewe nzoba umugabane wabo.29Bazorya ku mashikanwa y’ifu, ibimazi vy’ivyaha n’ivy’indishi; kandi ivyeguriwe Uhoraho vyose muri Isirayeli bizoba ivyabo.30Ivyeze imbere y’ibindi vyose n’amashikanwa mushikanira Uhoraho, bizoba ivy’abaherezi. Muzobahe umugabane wa mbere w’ivyo mwimbuye, kugira ngo umugisha ube ku ngo zanyu.31Umuherezi ntihazogire ikintu na kimwe arya yaba inyoni canke ikindi asanze capfuye canke cishwe n’inyamaswa.Biblica, Inc.