阅读𐴓𐴟𐴑𐴝𐴥𐴏𐴢 21

𐴓𐴟𐴑𐴝𐴥𐴏𐴢21

𐴀𐴠𐴑𐴒𐴗𐴝𐴥 𐴌𐴝𐴌𐴞𐴌 𐴏𐴡𐴥𐴃𐴑𐴝

¹𐴁𐴝𐴦𐴊𐴠 𐴀𐴞𐴏𐴝𐴤𐴘𐴠 𐴏𐴟𐴑 𐴃𐴟𐴓𐴞𐴤 𐴏𐴝𐴘𐴧𐴠𐴥 𐴌𐴝𐴥𐴌 𐴊𐴠𐴑𐴠𐴥𐴌 𐴊𐴠, 𐴃𐴟𐴖𐴝𐴚𐴒𐴡𐴌 𐴀𐴡𐴥𐴑𐴧𐴡𐴓𐴠 𐴀𐴞𐴥𐴃𐴝𐴌𐴝𐴌 𐴏𐴡𐴥𐴃𐴑𐴝 𐴀𐴡𐴥𐴑𐴧𐴡𐴓𐴢 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴊𐴝𐴕-𐴁𐴝𐴐𐴧𐴟𐴤𐴃𐴢 𐴊𐴠𐴦𐴌.²𐴀𐴞𐴥𐴁𐴝𐴘𐴠 𐴀𐴠𐴒𐴧𐴗𐴝𐴤 𐴒𐴡𐴌𐴞𐴉𐴢 𐴌𐴝𐴌𐴞𐴘𐴠 𐴘𐴡𐴥 𐴇𐴠𐴥𐴍𐴠 𐴊𐴟𐴘𐴧𐴝𐴥𐴕 𐴐𐴡𐴥𐴣𐴍𐴡 𐴉𐴡𐴘𐴐𐴝𐴤 𐴊𐴠𐴦𐴌 𐴊𐴠 𐴊𐴠𐴙𐴑𐴧𐴠𐴥.³𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴀𐴠 𐴒𐴡𐴌𐴞𐴉𐴢 𐴌𐴝𐴌𐴞 𐴖𐴝𐴘𐴠 𐴁𐴠𐴒𐴧𐴟𐴥𐴕𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴊𐴞𐴦𐴘𐴠𐴥;⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴡𐴙𐴕𐴧𐴡 𐴁𐴠𐴒𐴧𐴟𐴥𐴕𐴠 𐴀𐴞𐴥𐴃𐴝𐴌𐴝𐴌 𐴀𐴝𐴄𐴝𐴓𐴞𐴑𐴧𐴝 𐴊𐴡𐴥𐴕𐴡𐴃𐴧𐴟 𐴊𐴞𐴦𐴘𐴠𐴥 𐴊𐴠, 𐴔𐴡𐴕𐴃𐴡𐴌 𐴀𐴞𐴁𐴝𐴤𐴘𐴠 𐴃𐴡 𐴕𐴞𐴎𐴡𐴌 𐴒𐴡𐴌𐴞𐴉𐴢 𐴇𐴝𐴥𐴓𐴡𐴃𐴡𐴃𐴢 𐴁𐴝𐴏𐴞 𐴃𐴝𐴥𐴑𐴞 𐴁𐴡𐴓𐴧𐴝 𐴎𐴞𐴀𐴕 𐴀𐴝𐴐𐴧𐴞𐴥𐴓𐴢 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴊𐴞𐴦𐴉𐴠𐴥𐴓𐴝𐴘𐴧𐴠.“

𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴢 𐴊𐴡𐴥𐴚𐴐𐴡 𐴀𐴡𐴥𐴖𐴝𐴌 𐴀𐴝𐴒𐴟𐴕 𐴈𐴡𐴃𐴝𐴤

⁵𐴎𐴠𐴣𐴃𐴧𐴠𐴥 𐴇𐴡𐴊𐴟𐴥𐴕𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴁𐴝𐴦𐴁𐴟𐴃𐴠 𐴀𐴠𐴕𐴊𐴞𐴓𐴧𐴝 𐴈𐴡𐴖𐴝𐴤𐴇𐴡𐴘 𐴒𐴡𐴌𐴠𐴥𐴌, 𐴇𐴞𐴥𐴘𐴝𐴕𐴡𐴌𐴠 𐴑𐴠𐴀𐴕 𐴐𐴟𐴥𐴕𐴊𐴡𐴌-𐴐𐴟𐴥𐴕𐴊𐴡𐴌 𐴉𐴝𐴃𐴧𐴡𐴥𐴌 𐴓𐴡𐴥𐴘 𐴀𐴠𐴊𐴧𐴠 𐴀𐴝𐴓𐴧𐴝𐴌𐴠 𐴊𐴞𐴦𐴘𐴝 𐴇𐴝𐴥𐴊𐴞𐴘𐴝 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴇𐴝𐴥𐴣𐴎𐴝 𐴒𐴞𐴥𐴘𐴠, 𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠,⁶”𐴃𐴟𐴣𐴀𐴝𐴥𐴌𐴝 𐴀𐴠𐴍𐴠𐴥 𐴎𐴞𐴀𐴕 𐴊𐴠𐴑𐴡𐴥𐴌 𐴇𐴞𐴥𐴀𐴕𐴡𐴓𐴧𐴝 𐴀𐴠𐴀𐴕 𐴊𐴞𐴕 𐴀𐴝𐴘𐴁𐴡𐴤, 𐴀𐴠𐴍𐴠𐴥 𐴀𐴠𐴒𐴧𐴗𐴝𐴤 𐴉𐴝𐴃𐴧𐴡𐴥𐴌𐴡𐴌 𐴖𐴡𐴌𐴠 𐴀𐴝𐴌 𐴀𐴠𐴒𐴧𐴗𐴝𐴤 𐴉𐴝𐴃𐴧𐴡𐴥𐴌 𐴕𐴡 𐴃𐴝𐴥𐴑𐴞𐴁𐴡, 𐴇𐴞𐴥𐴀𐴕 𐴉𐴡𐴃𐴧𐴞𐴥 𐴀𐴠𐴑𐴒𐴗𐴝𐴥𐴌𐴠 𐴉𐴠𐴥𐴓𐴝𐴘𐴊𐴞𐴘𐴝 𐴎𐴝𐴘𐴁𐴡.“

𐴑𐴞𐴘𐴝𐴔𐴡𐴃𐴡𐴌 𐴀𐴝𐴓𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢

⁷𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴀𐴟𐴏𐴃𐴝𐴃𐴢, 𐴇𐴞𐴥𐴀𐴕 𐴇𐴡𐴣𐴃𐴧𐴠𐴥 𐴀𐴡𐴥𐴘𐴁𐴡 𐴊𐴠𐴥؟ 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴉𐴟𐴌𐴝 𐴀𐴡𐴥𐴘𐴁𐴝𐴌 𐴀𐴡𐴑𐴃𐴡𐴥 𐴀𐴝𐴙𐴐𐴧𐴠𐴥 𐴊𐴠 𐴇𐴞𐴥𐴘𐴝𐴕𐴡𐴌 𐴀𐴝𐴓𐴝𐴔𐴡𐴃𐴢 𐴑𐴞𐴦 𐴀𐴡𐴥𐴘𐴁𐴡؟“

⁸𐴀𐴞𐴥𐴁𐴝𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴏𐴝𐴘𐴧𐴡𐴥, 𐴇𐴡𐴕𐴡𐴤𐴑𐴞𐴘𐴠 𐴎𐴠𐴕 𐴃𐴟𐴣𐴀𐴝𐴥𐴌𐴝𐴌𐴠 𐴒𐴡𐴓𐴧𐴡𐴃𐴡𐴃𐴢 𐴕𐴡 𐴓𐴡𐴘𐴎𐴝, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴡𐴀𐴗𐴃𐴢 𐴎𐴡𐴕𐴠 𐴀𐴝𐴣𐴀𐴌 𐴕𐴝𐴔𐴠 𐴀𐴝𐴀𐴘𐴢 𐴈𐴡𐴘𐴁𐴡𐴤 𐴊𐴠, ’𐴀𐴝𐴀𐴛 𐴀𐴞𐴥𐴁𐴝,‘ 𐴀𐴠𐴊𐴧𐴠 ’𐴀𐴡𐴑𐴃𐴡𐴥 𐴋𐴝𐴥𐴑𐴠.‘ 𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝𐴌 𐴉𐴞𐴏𐴝𐴥𐴓𐴞 𐴕𐴡 𐴊𐴡𐴥𐴙𐴅𐴧𐴡.⁹𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝 𐴓𐴝𐴌𐴝𐴥𐴘 𐴀𐴠𐴊𐴧𐴠 𐴀𐴟𐴥𐴌𐴟𐴏𐴧𐴟𐴓𐴡𐴌 𐴀𐴝𐴁𐴝𐴏𐴢 𐴀𐴡𐴥𐴑𐴧𐴡𐴓𐴢 𐴉𐴟𐴥𐴕𐴞𐴁𐴝, 𐴕𐴡 𐴋𐴡𐴦𐴌𐴝𐴘𐴧𐴡𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴒𐴠 𐴇𐴞𐴥𐴀𐴕 𐴀𐴡𐴥𐴖𐴝𐴌 𐴎𐴡𐴌𐴟𐴌. 𐴔𐴡𐴕𐴃𐴡𐴌 𐴇𐴞𐴥𐴘𐴝𐴓𐴝 𐴘𐴡𐴥 𐴃𐴡𐴌𐴝𐴃𐴡𐴌𐴞 𐴀𐴝𐴇𐴠𐴥𐴌𐴡𐴃𐴢 𐴀𐴡𐴥𐴘𐴁𐴡 𐴊𐴠 𐴕𐴡.“

¹⁰𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴝𐴌𐴡𐴤 𐴈𐴡𐴀𐴌 𐴊𐴠, ”𐴀𐴠𐴑 𐴑𐴡𐴗𐴔𐴠 𐴀𐴝𐴌𐴀𐴠𐴑 𐴑𐴡𐴗𐴔𐴡𐴌 𐴀𐴟𐴓𐴋𐴝 𐴀𐴠𐴊𐴧𐴠 𐴀𐴠𐴑 𐴌𐴝𐴙𐴅𐴧𐴡𐴘𐴠 𐴀𐴝𐴌𐴀𐴠𐴑 𐴌𐴝𐴙𐴅𐴧𐴡𐴌 𐴀𐴟𐴓𐴋𐴝 𐴃𐴞𐴥𐴘𐴝𐴘𐴁𐴡.¹¹𐴋𐴡𐴣𐴀𐴌-𐴋𐴡𐴣𐴀𐴌 𐴁𐴟𐴥𐴏𐴝𐴓𐴢 𐴀𐴡𐴥𐴘𐴁𐴡, 𐴀𐴝𐴦𐴌 𐴎𐴝𐴒𐴝-𐴎𐴝𐴒𐴝 𐴌𐴝𐴄𐴢 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴀𐴝𐴁𐴝𐴁𐴞𐴘𐴝𐴌𐴝𐴔 𐴀𐴡𐴥𐴑𐴧𐴡𐴓𐴢 𐴀𐴡𐴥𐴘𐴁𐴡; 𐴀𐴝𐴌𐴡𐴤, 𐴀𐴝𐴏𐴔𐴝𐴕𐴡𐴃𐴧𐴟 𐴇𐴡𐴥𐴃𐴝𐴌𐴝 𐴅𐴞𐴕𐴞𐴥𐴐𐴢 𐴀𐴠𐴊𐴧𐴠 𐴋𐴡𐴣𐴀𐴌 𐴕𐴞𐴐𐴝𐴥𐴕 𐴀𐴡𐴥𐴑𐴧𐴡𐴓𐴢 𐴊𐴝𐴈𐴝𐴤 𐴎𐴝𐴘𐴁𐴡.

¹²”𐴓𐴠𐴑𐴞𐴕 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴡𐴥𐴘𐴁𐴝𐴌 𐴀𐴝𐴒𐴠, 𐴔𐴝𐴙𐴕𐴐𐴠𐴥 𐴀𐴝𐴣𐴀𐴌 𐴕𐴝𐴔𐴡𐴌 𐴖𐴝𐴏𐴃𐴠𐴥 𐴃𐴟𐴣𐴀𐴝𐴥𐴌𐴝𐴌𐴠 𐴊𐴡𐴥𐴌𐴞𐴉𐴠𐴓𐴝𐴘𐴁𐴡 𐴀𐴠𐴊𐴧𐴠 𐴎𐴟𐴓𐴟𐴥𐴔 𐴒𐴡𐴌𐴞𐴥𐴁𐴡. 𐴀𐴞𐴥𐴃𐴝𐴌𐴝 𐴃𐴟𐴣𐴀𐴝𐴥𐴌𐴝𐴌𐴠 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴒𐴡𐴏𐴝𐴥𐴘𐴊𐴞𐴁𐴡 𐴀𐴠𐴊𐴧𐴠 𐴎𐴞𐴘𐴡𐴥𐴓𐴡𐴃𐴢 𐴊𐴞𐴥𐴁𐴡. 𐴀𐴝𐴣𐴀𐴌 𐴕𐴝𐴔𐴡𐴌 𐴖𐴝𐴏𐴃𐴠𐴥 𐴃𐴟𐴣𐴀𐴝𐴥𐴌𐴝𐴌𐴠 𐴁𐴝𐴀𐴣𐴐𐴧𐴝 𐴀𐴠𐴊𐴧𐴠 𐴇𐴝𐴥𐴑𐴞𐴔 𐴀𐴡𐴥𐴑𐴧𐴡𐴓𐴡𐴌 𐴔𐴟𐴀𐴕𐴃𐴟 𐴇𐴝𐴥𐴎𐴞𐴌 𐴒𐴡𐴌𐴝𐴥 𐴎𐴝𐴘𐴁𐴡.¹³𐴔𐴡𐴕𐴃𐴡𐴌 𐴇𐴞𐴥𐴘𐴝𐴕 𐴃𐴟𐴣𐴀𐴝𐴥𐴌𐴝 𐴒𐴡𐴁𐴝𐴤 𐴊𐴞𐴥𐴁𐴝𐴌 𐴔𐴡𐴑𐴝 𐴀𐴡𐴥𐴘𐴁𐴡.¹⁴𐴇𐴠𐴥𐴃𐴡𐴓𐴧𐴝 𐴊𐴞𐴓𐴡𐴃𐴢 𐴒𐴝𐴣𐴃𐴞𐴥 𐴌𐴝𐴑𐴡𐴥 𐴊𐴠 𐴑𐴞, 𐴑𐴞𐴦 𐴎𐴟𐴖𐴝𐴁𐴢 𐴊𐴞𐴁𐴝 𐴀𐴝𐴒𐴠 𐴓𐴡𐴥𐴃𐴞 𐴏𐴞𐴕𐴃𐴝 𐴒𐴡𐴌𐴝𐴥𐴌 𐴎𐴡𐴌𐴟𐴌 𐴕𐴝𐴥𐴘;¹⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴠𐴀𐴕 𐴎𐴡𐴁𐴝𐴕 𐴀𐴠𐴊𐴧𐴠 𐴒𐴞𐴘𐴝𐴕 𐴊𐴞𐴦𐴘𐴟𐴔, 𐴎𐴞𐴀𐴕𐴡𐴌𐴠 𐴃𐴟𐴣𐴀𐴝𐴥𐴌𐴝𐴌 𐴇𐴡𐴕𐴡𐴤 𐴊𐴟𐴐𐴧𐴡𐴕𐴠 𐴔𐴟𐴑𐴝𐴁𐴠𐴓𐴝 𐴘𐴝𐴥 𐴀𐴞𐴕𐴑𐴝𐴌 𐴒𐴡𐴌𐴞𐴥 𐴕𐴡 𐴉𐴝𐴌𐴞𐴁𐴡𐴥.¹⁶𐴃𐴟𐴣𐴀𐴝𐴥𐴌𐴝𐴌𐴠 𐴕𐴞𐴎𐴡𐴌 𐴁𐴝𐴉𐴔𐴝𐴦 𐴘𐴠, 𐴁𐴝𐴥𐴘𐴁𐴡𐴘𐴕𐴝𐴥𐴙𐴕 𐴊𐴠, 𐴀𐴠𐴒𐴝𐴕𐴝-𐴒𐴟𐴙𐴐𐴧𐴞𐴥𐴘𐴠 𐴀𐴠𐴊𐴧𐴠 𐴊𐴟𐴏𐴃𐴡𐴥 𐴀𐴡𐴥𐴑𐴧𐴡𐴓𐴠 𐴀𐴟𐴥𐴊𐴧𐴗𐴝 𐴊𐴡𐴥𐴌𐴞𐴊𐴞𐴁𐴡; 𐴃𐴟𐴣𐴀𐴝𐴥𐴌𐴝 𐴇𐴡𐴊𐴟𐴥𐴕𐴡𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴁𐴡 𐴘𐴡𐴥.¹⁷𐴀𐴝𐴦𐴌 𐴀𐴝𐴣𐴀𐴌 𐴓𐴧𐴝 𐴁𐴡𐴓𐴞 𐴃𐴟𐴣𐴀𐴝𐴥𐴌𐴝𐴌𐴠 𐴁𐴠𐴒𐴧𐴟𐴥𐴕𐴠 𐴕𐴝𐴉𐴡𐴥𐴌𐴡𐴃𐴢 𐴒𐴡𐴌𐴞𐴥𐴁𐴡.¹⁸𐴓𐴠𐴑𐴞𐴕 𐴃𐴟𐴣𐴀𐴝𐴥𐴌𐴝𐴌 𐴔𐴝𐴃𐴝𐴥𐴌 𐴀𐴠𐴑𐴧𐴝𐴥𐴕 𐴏𐴟𐴓𐴢 𐴀𐴟𐴥𐴊𐴧𐴗𐴝 𐴁𐴡𐴌𐴁𐴝𐴊𐴢 𐴕𐴡 𐴎𐴝𐴘𐴁𐴡.¹⁹𐴃𐴟𐴣𐴀𐴝𐴥𐴌𐴝𐴌 𐴏𐴡𐴁𐴡𐴥𐴌𐴠 𐴃𐴟𐴣𐴀𐴝𐴥𐴌𐴝 𐴕𐴞𐴎𐴡𐴌 𐴎𐴝𐴕 𐴁𐴝𐴏𐴝𐴘 𐴌𐴝𐴑𐴞𐴥𐴁𐴝.

𐴅𐴠𐴌𐴟𐴥𐴏𐴝𐴓𐴠𐴔 𐴊𐴡𐴥𐴚𐴐𐴡 𐴀𐴡𐴥𐴖𐴝𐴌 𐴁𐴝𐴦𐴁𐴟𐴃𐴠

²⁰”𐴃𐴟𐴣𐴀𐴝𐴥𐴌𐴝 𐴎𐴠𐴣𐴃𐴧𐴠𐴥 𐴉𐴡𐴥𐴗𐴏𐴢 𐴀𐴡𐴥𐴑𐴧𐴡𐴓𐴠 𐴅𐴠𐴌𐴟𐴥𐴏𐴝𐴓𐴠𐴔𐴡𐴌𐴠 𐴏𐴝𐴘𐴌𐴡𐴥𐴑𐴟𐴓𐴃𐴟 𐴁𐴠𐴌𐴝𐴤𐴘 𐴊𐴡𐴥𐴙𐴅𐴧𐴠 𐴊𐴠 𐴊𐴠𐴑𐴞𐴥𐴁𐴝, 𐴇𐴠𐴥𐴣𐴃𐴧𐴠 𐴄𐴝𐴥𐴀𐴌𐴞𐴘𐴡 𐴊𐴠, 𐴇𐴞𐴥𐴘𐴝𐴕 𐴁𐴡𐴐𐴡𐴥𐴃𐴞 𐴏𐴝𐴥𐴌𐴝 𐴀𐴡𐴥𐴘𐴁𐴝𐴌 𐴀𐴡𐴑𐴃𐴡𐴥 𐴋𐴝𐴥𐴑𐴠.²¹𐴇𐴠𐴥𐴣𐴃𐴧𐴠 𐴎𐴠𐴃𐴝𐴌𐴝𐴤 𐴘𐴡𐴇𐴟𐴥𐴊𐴞𐴘𐴝𐴃𐴢 𐴃𐴝𐴥𐴑𐴞𐴁𐴝 𐴀𐴞𐴥𐴃𐴝𐴌𐴝𐴃𐴧𐴟 𐴉𐴝𐴀𐴌𐴡𐴃𐴢 𐴊𐴝𐴥𐴘𐴎𐴝𐴒𐴡𐴘 𐴉𐴡𐴌𐴞𐴁𐴡𐴥, 𐴎𐴠𐴃𐴝𐴌𐴝𐴤 𐴐𐴡𐴥𐴀𐴌𐴡𐴌 𐴁𐴟𐴥𐴃𐴡𐴌𐴠 𐴃𐴝𐴥𐴑𐴞𐴁𐴝 𐴀𐴞𐴥𐴃𐴝𐴌𐴝𐴃𐴧𐴟 𐴁𐴝𐴀𐴌𐴠 𐴕𐴠𐴦𐴓𐴞𐴎𐴝𐴒𐴡𐴥𐴘 𐴉𐴡𐴌𐴞𐴁𐴡𐴥, 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴉𐴝𐴌𐴝𐴃𐴢 𐴃𐴝𐴥𐴑𐴞𐴁𐴝 𐴀𐴞𐴥𐴃𐴝𐴌𐴝𐴃𐴧𐴟 𐴐𐴡𐴥𐴀𐴌𐴡𐴃𐴢 𐴕𐴡 𐴒𐴡𐴥𐴓𐴝 𐴉𐴡𐴌𐴞𐴁𐴡𐴥.²²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴊𐴞𐴕 𐴇𐴞𐴥𐴀𐴕 𐴀𐴡𐴥𐴙𐴓𐴊𐴠 𐴁𐴡𐴊𐴡𐴓𐴝 𐴓𐴡𐴘𐴁𐴝𐴌 𐴊𐴞𐴕، 𐴎𐴠𐴀𐴕𐴠 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴝𐴏𐴠𐴤 𐴊𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴉𐴟𐴌𐴝 𐴀𐴡𐴥.²³𐴔𐴡𐴕𐴃𐴡𐴌 𐴇𐴠𐴥 𐴊𐴞𐴕 𐴀𐴡𐴥𐴑𐴧𐴡𐴓𐴡𐴃𐴢 𐴇𐴝𐴥𐴔𐴞𐴓𐴢 𐴔𐴝𐴘𐴝𐴉𐴟𐴀𐴝𐴙𐴕 𐴊𐴡𐴌 𐴓𐴧𐴝 𐴀𐴠𐴊𐴧𐴠 𐴊𐴟𐴊𐴡𐴌 𐴔𐴝𐴦 𐴀𐴡𐴥𐴑𐴧𐴡𐴓𐴡𐴓𐴧𐴝 𐴁𐴞𐴐𐴞𐴤 𐴀𐴝𐴉𐴏𐴟𐴥𐴏𐴡𐴌 𐴇𐴝𐴥𐴓𐴡𐴃𐴢 𐴀𐴡𐴥𐴘𐴁𐴡! 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴟𐴓𐴧𐴟𐴑𐴡𐴃𐴢 𐴋𐴡𐴣𐴀𐴌 𐴔𐴡𐴏𐴞𐴁𐴡𐴃𐴢 𐴀𐴡𐴥𐴘𐴁𐴡 𐴀𐴠𐴊𐴧𐴠 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴒𐴡𐴎𐴧𐴡𐴁𐴢 𐴀𐴝𐴘𐴁𐴡𐴤.²⁴𐴀𐴞𐴥𐴃𐴝𐴌𐴝𐴌𐴠 𐴃𐴡𐴓𐴟𐴖𐴝𐴌 𐴓𐴡𐴘 𐴑𐴡𐴃𐴡𐴥𐴓𐴢 𐴒𐴡𐴌𐴞𐴥𐴉𐴠𐴓𐴝 𐴎𐴝𐴘𐴁𐴡, 𐴀𐴝𐴦𐴌 𐴁𐴝𐴣𐴊𐴞𐴥 𐴉𐴡𐴃𐴧𐴞𐴥 𐴑𐴡𐴗𐴔𐴡𐴌 𐴇𐴝𐴣𐴏𐴠 𐴓𐴡𐴘𐴎𐴝 𐴎𐴝𐴘𐴁𐴡. 𐴅𐴠𐴌𐴟𐴥𐴏𐴝𐴓𐴠𐴔𐴡𐴌𐴠 𐴀𐴡𐴃𐴡𐴥𐴑𐴧𐴝𐴓𐴢 𐴉𐴡𐴙𐴅𐴧𐴡𐴕𐴃𐴡 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴄𐴠𐴥𐴚𐴠 𐴀𐴟𐴥𐴣𐴌𐴝𐴃𐴢 𐴃𐴝𐴥𐴑𐴞𐴁𐴡, 𐴎𐴠𐴃𐴡𐴥𐴑𐴧𐴝𐴓𐴢 𐴁𐴠𐴘𐴡𐴇𐴟𐴥𐴊𐴞 𐴀𐴞𐴥𐴃𐴝𐴌𐴝𐴌 𐴀𐴡𐴑𐴃𐴡𐴥 𐴉𐴟𐴌𐴝 𐴕𐴡𐴥 𐴀𐴡𐴥𐴘𐴧𐴡.

𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌 𐴀𐴝𐴀

²⁵”𐴀𐴝𐴦𐴌 𐴏𐴝𐴕, 𐴁𐴠𐴙𐴓𐴢 𐴀𐴠𐴊𐴧𐴠 𐴃𐴝𐴌𐴝 𐴀𐴡𐴥𐴑𐴧𐴡𐴓𐴡𐴃𐴢 𐴃𐴝𐴦𐴅𐴟𐴙𐴂𐴧𐴝 𐴕𐴞𐴐𐴝𐴥𐴕 𐴀𐴡𐴥𐴑𐴧𐴡𐴓𐴢 𐴊𐴝𐴈𐴝𐴤 𐴎𐴝𐴘𐴁𐴡; 𐴊𐴟𐴕𐴞𐴘𐴝𐴙𐴃𐴢 𐴑𐴡𐴗𐴔 𐴀𐴡𐴥𐴑𐴧𐴡𐴓𐴢 𐴉𐴠𐴌𐴠𐴐𐴝𐴕𐴞𐴃𐴢 𐴉𐴡𐴌𐴞𐴎𐴝𐴘𐴁𐴡𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴊𐴡𐴌𐴞𐴘𐴝𐴌 𐴀𐴝𐴁𐴝𐴏𐴠 𐴀𐴠𐴊𐴧𐴠 𐴒𐴡𐴘𐴌𐴠 𐴏𐴟𐴥𐴇𐴝𐴌𐴝𐴘𐴧𐴝 𐴀𐴡𐴥𐴘𐴎𐴝𐴘𐴁𐴡𐴘,²⁶𐴔𐴝𐴕𐴟𐴥𐴙𐴐𐴠 𐴊𐴟𐴕𐴞𐴘𐴝𐴙𐴃𐴢 𐴀𐴡𐴥𐴘𐴁𐴡 𐴊𐴠 𐴇𐴞𐴥𐴀𐴕𐴡𐴌 𐴋𐴡𐴦𐴌𐴠 𐴀𐴠𐴊𐴧𐴠 𐴁𐴝𐴥𐴉𐴝𐴕𐴞𐴘𐴠 𐴁𐴠𐴀𐴟𐴥𐴣𐴐𐴢 𐴀𐴡𐴥𐴘𐴎𐴝𐴘𐴁𐴡𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴏𐴔𐴝𐴕𐴞 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴢 𐴃𐴡𐴥𐴃𐴧𐴡𐴌𐴝𐴘𐴁𐴡.²⁷𐴇𐴠𐴥𐴣𐴃𐴧𐴠 𐴀𐴞𐴥𐴃𐴝𐴌𐴝 𐴊𐴠𐴑𐴞𐴥𐴁𐴡 𐴊𐴠, 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴑𐴟𐴊𐴟𐴌𐴟𐴃𐴢 𐴀𐴠𐴊𐴧𐴠 𐴋𐴡𐴣𐴀𐴌 𐴔𐴡𐴈𐴞𐴥𐴔𐴝𐴌 𐴏𐴝𐴥𐴀𐴣𐴃𐴠 𐴀𐴠𐴑𐴧𐴝𐴥𐴕 𐴔𐴞𐴘𐴟𐴥𐴓𐴝𐴃𐴢 𐴒𐴡𐴥𐴌𐴞 𐴀𐴝𐴘𐴧𐴠𐴤𐴌.²⁸𐴔𐴡𐴕𐴃𐴡𐴌 𐴎𐴠𐴣𐴃𐴧𐴠𐴥 𐴇𐴞𐴥𐴀𐴕 𐴉𐴟𐴌𐴝 𐴀𐴡𐴥𐴖𐴝𐴃𐴢 𐴊𐴡𐴌𐴠, 𐴃𐴟𐴣𐴀𐴝𐴥𐴌𐴝 𐴀𐴟𐴎𐴟 𐴒𐴡𐴌𐴞 𐴃𐴞𐴥𐴘𐴝𐴘 𐴃𐴟𐴣𐴀𐴝𐴥𐴌𐴝𐴌 𐴔𐴝𐴃𐴝𐴥 𐴖𐴡𐴌𐴔𐴞𐴑𐴧𐴝𐴥 𐴒𐴡𐴌𐴞𐴥𐴘𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌 𐴌𐴠𐴇𐴝𐴥𐴘 𐴋𐴝𐴥𐴑𐴠.“

𐴋𐴟𐴣𐴙𐴌-𐴒𐴝𐴏𐴡𐴃𐴧𐴟 𐴔𐴠𐴀𐴏𐴝𐴓𐴢

²⁹𐴃𐴝𐴌𐴉𐴡𐴌𐴠 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠𐴑𐴧𐴝𐴥𐴕 𐴔𐴠𐴀𐴏𐴝𐴓𐴢 𐴈𐴡𐴘𐴧𐴠𐴥, 𐴑𐴞 𐴈𐴡𐴘𐴓𐴠𐴥, ”𐴋𐴟𐴣𐴙𐴌-𐴒𐴝𐴏𐴢 𐴀𐴠𐴊𐴧𐴠 𐴀𐴡𐴙𐴕𐴧𐴡 𐴒𐴝𐴏𐴒𐴟𐴏𐴝𐴥𐴓𐴝 𐴁𐴠𐴒𐴧𐴟𐴥𐴕𐴡𐴌𐴠 𐴏𐴡𐴀.³⁰𐴎𐴠𐴣𐴃𐴧𐴠𐴥 𐴇𐴞𐴥𐴀𐴕𐴡𐴃𐴢 𐴉𐴝𐴃𐴝 𐴀𐴝𐴘𐴧𐴠𐴤, 𐴃𐴟𐴣𐴀𐴝𐴥𐴌𐴝 𐴇𐴞𐴥𐴀𐴕 𐴏𐴝𐴀𐴘𐴢 𐴕𐴞𐴎𐴡𐴌𐴒𐴝𐴤 𐴕𐴞𐴎𐴠 𐴎𐴝𐴕𐴞𐴎𐴡𐴒𐴡𐴥𐴘 𐴊𐴠, 𐴇𐴡𐴥𐴌𐴝𐴕 𐴋𐴝𐴥𐴑𐴠.³¹𐴇𐴠𐴥𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴘𐴡𐴥, 𐴎𐴠𐴣𐴃𐴧𐴠𐴥 𐴀𐴞𐴀𐴕 𐴀𐴡𐴥𐴌 𐴊𐴠 𐴊𐴠𐴑𐴞𐴥𐴁𐴝, 𐴇𐴠𐴥𐴣𐴃𐴧𐴠 𐴘𐴝𐴀𐴕 𐴁𐴟𐴎𐴞𐴥𐴁𐴝 𐴊𐴠, 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴋𐴝𐴥𐴑𐴠.

³²”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴀𐴞𐴀𐴕 𐴁𐴠𐴒𐴧𐴟𐴥𐴕 𐴉𐴟𐴌𐴝 𐴕𐴡𐴥 𐴀𐴡𐴥𐴘𐴧𐴡 𐴉𐴡𐴙𐴅𐴧𐴡𐴕𐴃𐴡 𐴀𐴠 𐴕𐴡𐴏𐴡𐴥𐴓𐴢 𐴁𐴞𐴓𐴑𐴟𐴥𐴓𐴢 𐴕𐴡 𐴉𐴟𐴥𐴌𐴝𐴘𐴁𐴡.³³𐴀𐴝𐴏𐴔𐴝𐴕 𐴎𐴡𐴁𐴞𐴕 𐴃𐴡 𐴎𐴝𐴌𐴞 𐴕𐴡 𐴃𐴝𐴥𐴑𐴞𐴁𐴡, 𐴔𐴡𐴕𐴃𐴡𐴌 𐴀𐴝𐴣𐴀𐴌 𐴈𐴡𐴃𐴝𐴤 𐴇𐴝𐴥𐴔𐴞𐴐𐴝 𐴎𐴝𐴌𐴞 𐴃𐴝𐴥𐴑𐴞𐴁𐴡.

𐴀𐴟𐴥𐴣𐴐𐴞𐴘𐴝𐴌 𐴃𐴝𐴥𐴑𐴞𐴁𐴝𐴌 𐴕𐴡𐴏𐴞𐴥𐴘𐴡𐴃𐴢

³⁴”𐴇𐴠𐴥𐴃𐴡𐴓𐴧𐴝 𐴀𐴟𐴥𐴣𐴐𐴞𐴘𐴝𐴌 𐴃𐴝𐴥𐴙𐴑𐴧𐴡, 𐴎𐴠𐴀𐴕𐴠 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴢 𐴀𐴝𐴘𐴝𐴐𐴞𐴘𐴠, 𐴕𐴞𐴐𐴝𐴥𐴁𐴝𐴎𐴞𐴘𐴠, 𐴀𐴠𐴊𐴧𐴠 𐴎𐴞𐴕𐴊𐴞𐴒𐴞𐴌 𐴏𐴞𐴕𐴃𐴝𐴁𐴝𐴥𐴉𐴝𐴕𐴞𐴘𐴠 𐴁𐴡𐴥𐴌𐴞 𐴕𐴡 𐴎𐴝𐴒𐴡𐴥𐴘, 𐴀𐴝𐴌𐴕𐴡𐴥𐴘𐴓𐴠 𐴊𐴞𐴕 𐴘𐴞𐴥𐴁𐴝 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴉𐴝𐴥𐴕𐴡𐴌 𐴋𐴡𐴥𐴙𐴓𐴧𐴝 𐴁𐴝𐴥𐴚𐴒𐴡𐴌𐴞 𐴀𐴝𐴀𐴘𐴎𐴝𐴥𐴘𐴁𐴡𐴘;³⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴊𐴞𐴕 𐴘𐴞𐴥𐴁𐴝 𐴉𐴟𐴌𐴝 𐴊𐴟𐴕𐴞𐴘𐴝𐴙𐴃𐴢 𐴀𐴝𐴏𐴠𐴤 𐴊𐴠 𐴃𐴝𐴔𐴝𐴥𐴔 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴖𐴡𐴌𐴠 𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴀𐴝𐴀𐴘𐴎𐴝𐴥𐴘𐴁𐴡𐴘.³⁶𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴌𐴝 𐴇𐴝𐴥𐴀𐴌 𐴀𐴡𐴑𐴃𐴡𐴥𐴃𐴢 𐴀𐴟𐴥𐴣𐴐𐴞𐴘𐴝𐴌 𐴃𐴝𐴥𐴙𐴑𐴧𐴡, 𐴀𐴝𐴦𐴌 𐴊𐴟𐴖𐴝 𐴒𐴡𐴌𐴞𐴥𐴘𐴡 𐴊𐴠, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴎𐴠𐴕 𐴔𐴟𐴀𐴕𐴃𐴟 𐴉𐴟𐴌𐴝 𐴀𐴡𐴥𐴘𐴁𐴝𐴌 𐴀𐴝𐴏𐴠𐴤 𐴊𐴠 𐴇𐴞𐴥𐴀𐴕𐴡𐴃𐴧𐴟 𐴁𐴝𐴏𐴞 𐴎𐴝𐴘𐴁𐴡𐴘 𐴓𐴧𐴝 𐴁𐴡𐴓𐴢 𐴃𐴝𐴥𐴑𐴠 𐴀𐴝𐴦𐴌 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌 𐴔𐴟𐴀𐴕𐴃𐴟 𐴃𐴞𐴥𐴘𐴝𐴘 𐴉𐴝𐴌𐴡.“

³⁷𐴊𐴞𐴕𐴡𐴃𐴢 𐴀𐴞𐴏𐴝𐴤 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴃𐴝𐴦𐴓𐴞𐴔 𐴊𐴞𐴃𐴡, 𐴔𐴡𐴕𐴃𐴡𐴌 𐴇𐴝𐴥𐴣𐴎𐴞𐴕𐴧𐴝 𐴕𐴠𐴦𐴓𐴞 𐴎𐴝𐴘𐴃𐴟𐴕 𐴉𐴝𐴀𐴌 𐴈𐴡𐴀 𐴊𐴠 𐴘𐴞𐴥𐴁𐴝𐴃𐴢 𐴎𐴝𐴘 𐴌𐴝𐴙𐴃𐴢 𐴈𐴝𐴍𐴝𐴘𐴃𐴡𐴥;³⁸𐴀𐴝𐴦𐴌 𐴁𐴞𐴀𐴕𐴧𐴝 𐴏𐴡𐴥𐴀𐴌𐴠 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴠 𐴀𐴞𐴥𐴁𐴝𐴌 𐴁𐴡𐴘𐴧𐴝𐴕 𐴉𐴟𐴥𐴕𐴞 𐴁𐴡𐴓𐴧𐴝 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴀𐴝𐴘𐴃𐴡𐴤.

The Word for the World International

https://app.library.bible/content/87faca8b51c22590