阅读𐴈𐴝𐴔𐴡𐴥𐴓𐴢 17

𐴈𐴝𐴔𐴡𐴥𐴓𐴢17

𐴃𐴞𐴏𐴡𐴥𐴓𐴡𐴕𐴞𐴑𐴝 𐴐𐴡𐴥𐴀𐴌𐴡𐴃𐴢 𐴇𐴝𐴥𐴚𐴒𐴝𐴔𐴝

¹𐴃𐴝𐴌𐴝𐴥 𐴀𐴝𐴔𐴉𐴞𐴂𐴡𐴓𐴞𐴏𐴢 𐴀𐴠𐴊𐴧𐴠 𐴀𐴝𐴂𐴡𐴓𐴡𐴤𐴕𐴞𐴘𐴝 𐴐𐴡𐴥𐴀𐴌 𐴁𐴝𐴥𐴘 𐴎𐴝𐴘 𐴃𐴞𐴏𐴡𐴥𐴓𐴡𐴕𐴞𐴑𐴝 𐴐𐴡𐴥𐴀𐴌𐴡𐴃𐴢 𐴀𐴝𐴙𐴐𐴧𐴠𐴥, 𐴎𐴠𐴍𐴠𐴥 𐴘𐴡𐴇𐴟𐴥𐴊𐴞𐴌 𐴀𐴠𐴑𐴧𐴝𐴥𐴕 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴀𐴝𐴐𐴧𐴞𐴥𐴓𐴢.²𐴂𐴝𐴥𐴀𐴟𐴓𐴠 𐴕𐴞𐴎𐴡𐴌 𐴕𐴞𐴘𐴡𐴔 𐴔𐴡𐴎𐴞𐴕 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴒𐴞𐴦𐴘𐴠𐴥, 𐴀𐴝𐴦𐴌 𐴓𐴝𐴒𐴝𐴃𐴝𐴌 𐴃𐴞𐴕 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴀𐴞𐴥𐴃𐴝𐴌𐴝 𐴓𐴧𐴡𐴥𐴘 𐴂𐴝𐴑-𐴑𐴝𐴓𐴝𐴔𐴡𐴃𐴧𐴟 𐴃𐴡𐴏𐴑𐴝𐴌𐴝 𐴀𐴡𐴥𐴑𐴧𐴡𐴓𐴢 𐴒𐴡𐴙𐴅𐴧𐴠𐴥.³𐴀𐴞𐴥𐴁𐴝𐴘𐴠 𐴃𐴡𐴏𐴑𐴝𐴌𐴝 𐴒𐴡𐴌𐴞𐴥 𐴁𐴟𐴎𐴝𐴥𐴌 𐴊𐴠 𐴀𐴠𐴊𐴧𐴠 𐴊𐴡𐴓𐴞𐴓𐴢 𐴊𐴠𐴌 𐴊𐴠 𐴑𐴞, 𐴔𐴡𐴀𐴏𐴞𐴤𐴃𐴧𐴟 𐴊𐴟𐴑 𐴉𐴝𐴘𐴁𐴝𐴌 𐴀𐴠𐴊𐴧𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴖𐴝𐴌 𐴎𐴡𐴌𐴟𐴌 𐴀𐴝𐴐𐴧𐴞𐴥𐴓𐴢. 𐴀𐴞𐴥𐴁𐴝𐴘𐴠 𐴈𐴡𐴘𐴧𐴠𐴥 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴎𐴠 𐴀𐴞𐴏𐴝𐴤𐴌 𐴁𐴝𐴦𐴁𐴟𐴃𐴠 𐴁𐴡𐴘𐴧𐴝𐴕 𐴒𐴡𐴌𐴞𐴥𐴌, 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴇𐴠𐴥 𐴔𐴡𐴀𐴏𐴞𐴤.“⁴𐴀𐴞𐴥𐴃𐴝𐴌𐴝 𐴇𐴡𐴦𐴎𐴧𐴡𐴕𐴠 𐴀𐴞𐴔𐴝𐴕 𐴀𐴝𐴕𐴞𐴤 𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴏𐴞𐴥𐴓𐴝𐴏𐴢 𐴓𐴡𐴥𐴘 𐴁𐴡𐴥𐴚 𐴀𐴡𐴥𐴘𐴧𐴠, 𐴇𐴠𐴥𐴕𐴊𐴞𐴓𐴧𐴝 𐴋𐴡𐴣𐴀𐴌 𐴀𐴠𐴑 𐴊𐴡𐴓𐴢 𐴒𐴞𐴌𐴞𐴥𐴑 𐴊𐴞𐴕𐴊𐴝𐴥𐴌 𐴔𐴝𐴕𐴟𐴥𐴙𐴐𐴢 𐴀𐴠𐴊𐴧𐴠 𐴁𐴡𐴀𐴗𐴃𐴢 𐴎𐴡𐴕 𐴔𐴡𐴐𐴟𐴥𐴌 𐴔𐴝𐴘𐴝𐴉𐴟𐴀𐴝𐴙𐴕 𐴀𐴡𐴥 𐴁𐴡𐴥𐴚 𐴀𐴡𐴥𐴘𐴧𐴠.

⁵𐴔𐴡𐴕𐴃𐴡𐴌 𐴀𐴝𐴌 𐴁𐴝𐴑𐴞 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴒𐴝𐴘𐴌𐴡𐴃𐴢 𐴓𐴝𐴒𐴞 𐴁𐴝𐴎𐴝𐴌𐴡𐴃𐴧𐴟 𐴇𐴡𐴊𐴟𐴥𐴕 𐴈𐴡𐴥𐴌𐴝𐴉𐴢 𐴔𐴝𐴕𐴟𐴥𐴙𐴐𐴢 𐴓𐴡𐴥𐴘 𐴀𐴠𐴒𐴧𐴗𐴝𐴤 𐴋𐴝𐴀𐴘𐴢 𐴁𐴝𐴙𐴕𐴊𐴠𐴤 𐴀𐴝𐴦𐴌 𐴐𐴡𐴥𐴀𐴌𐴡𐴃𐴢 𐴀𐴟𐴥𐴌𐴟𐴏𐴧𐴟𐴓𐴢 𐴉𐴡𐴘𐴊𐴝 𐴒𐴡𐴙𐴅𐴧𐴠𐴥. 𐴀𐴞𐴥𐴃𐴝𐴌𐴝 𐴅𐴝𐴏𐴡𐴕𐴡𐴌 𐴒𐴡𐴥𐴌𐴡𐴌𐴠 𐴇𐴝𐴥𐴔𐴓𐴝 𐴒𐴡𐴌𐴞𐴥 𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴏𐴞𐴥𐴓𐴝𐴏𐴡𐴌𐴠 𐴃𐴟𐴖𐴝𐴘𐴧𐴠𐴥, 𐴎𐴠𐴀𐴕𐴠 𐴃𐴝𐴌𐴝𐴥𐴌𐴠 𐴀𐴝𐴖𐴝𐴔 𐴀𐴡𐴥𐴑𐴧𐴡𐴓𐴡𐴌 𐴔𐴟𐴀𐴕𐴃𐴟 𐴀𐴝𐴕𐴞𐴤 𐴉𐴝𐴌𐴠.⁶𐴔𐴡𐴕𐴃𐴡𐴌 𐴃𐴝𐴌𐴝𐴥𐴌𐴠 𐴎𐴠𐴃𐴧𐴡𐴥𐴃𐴢 𐴃𐴟𐴖𐴝𐴘 𐴕𐴡𐴥 𐴉𐴝𐴦, 𐴀𐴞𐴥𐴃𐴝𐴌𐴝 𐴅𐴝𐴏𐴡𐴕 𐴀𐴠𐴊𐴧𐴠 𐴑𐴠𐴏𐴧𐴟𐴥 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌𐴠 𐴄𐴝𐴕𐴞-𐴄𐴝𐴕𐴞 𐴐𐴡𐴥𐴀𐴌𐴡𐴌 𐴀𐴝𐴊𐴞𐴑𐴝𐴌𐴞 𐴀𐴡𐴥𐴑𐴧𐴡𐴓𐴡𐴌 𐴔𐴟𐴀𐴕𐴃𐴟 𐴀𐴝𐴙𐴕𐴧𐴠𐴤, 𐴀𐴝𐴦𐴌 𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ”𐴔𐴝𐴕𐴟𐴥𐴙𐴐𐴢 𐴀𐴞𐴃𐴝𐴌𐴝𐴤 𐴉𐴟𐴌𐴝 𐴊𐴟𐴕𐴞𐴘𐴝𐴙𐴃𐴢 𐴉𐴠𐴌𐴠𐴐𐴝𐴕𐴞 𐴉𐴡𐴘𐴊𐴝 𐴒𐴡𐴌𐴞𐴥 𐴘𐴝𐴓𐴝 𐴀𐴠𐴍𐴠𐴥 𐴘𐴡𐴥 𐴀𐴝𐴙𐴐𐴧𐴠𐴥,⁷𐴀𐴝𐴦𐴌 𐴅𐴝𐴏𐴡𐴕𐴠 𐴀𐴞𐴃𐴝𐴌𐴝𐴤𐴌𐴠 𐴕𐴞𐴎𐴡𐴌 𐴒𐴡𐴥𐴌𐴡𐴃𐴢 𐴎𐴝𐴒𐴝 𐴊𐴞𐴦𐴘𐴠𐴥. 𐴀𐴞𐴃𐴝𐴌𐴝𐴤 𐴁𐴠𐴒𐴧𐴟𐴥𐴕𐴠 𐴁𐴝𐴀𐴣𐴐𐴧𐴝 𐴑𐴝𐴥𐴘𐴏𐴝𐴌𐴡𐴌 𐴇𐴡𐴥𐴑𐴟𐴔𐴡𐴌 𐴀𐴟𐴓𐴋𐴝 𐴒𐴡𐴌𐴠𐴥, 𐴀𐴝𐴦𐴌 𐴈𐴡𐴀 𐴊𐴠, 𐴑𐴝𐴥𐴘𐴏𐴝𐴌 𐴁𐴝𐴊𐴠 𐴀𐴝𐴌𐴡𐴤 𐴀𐴠𐴑𐴒𐴗𐴝𐴥 𐴁𐴝𐴀𐴣𐴐𐴧𐴝 𐴀𐴝𐴏𐴠𐴤, 𐴎𐴞𐴁𐴝𐴤𐴌 𐴕𐴝𐴔 𐴀𐴞𐴏𐴝𐴤.“⁸𐴇𐴠𐴥𐴕𐴊𐴞𐴓𐴧𐴝 𐴈𐴡𐴀𐴘𐴢 𐴀𐴞𐴥𐴃𐴝𐴌𐴝 𐴀𐴝𐴖𐴝𐴔 𐴀𐴡𐴥𐴑𐴧𐴡𐴓𐴡𐴌 𐴀𐴠𐴊𐴧𐴠 𐴐𐴡𐴥𐴀𐴌𐴡𐴌 𐴀𐴝𐴊𐴞𐴑𐴝𐴌𐴞 𐴀𐴡𐴥𐴑𐴧𐴡𐴓𐴡𐴌 𐴔𐴝𐴃𐴝𐴥 𐴈𐴡𐴥𐴌𐴝𐴉𐴢 𐴒𐴡𐴥𐴌𐴞𐴊𐴞𐴘𐴠.⁹𐴔𐴡𐴕𐴃𐴡𐴌 𐴅𐴝𐴏𐴡𐴕 𐴀𐴠𐴊𐴧𐴠 𐴀𐴡𐴙𐴕𐴧𐴡 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴃𐴝𐴌𐴝𐴥 𐴓𐴧𐴝 𐴎𐴝𐴁𐴞𐴕 𐴀𐴡𐴥𐴘𐴧𐴠 𐴌𐴝𐴥𐴌, 𐴏𐴡𐴥𐴊𐴧𐴝𐴌 𐴀𐴡𐴥𐴑𐴧𐴡𐴓𐴠 𐴃𐴝𐴌𐴝𐴥𐴌𐴠 𐴀𐴠𐴌𐴞𐴊𐴞𐴘𐴠𐴥.

𐴁𐴠𐴌𐴞𐴘𐴝𐴃𐴢 𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴏𐴞𐴥𐴓𐴝𐴏𐴢

¹⁰𐴇𐴠𐴥 𐴊𐴞𐴕 𐴌𐴝𐴙𐴃𐴧𐴝 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕 𐴊𐴠 𐴃𐴡𐴌𐴝𐴃𐴡𐴌𐴞 𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴏𐴞𐴥𐴓𐴝𐴏𐴡𐴌𐴠 𐴁𐴠𐴌𐴞𐴘𐴝𐴃𐴢 𐴊𐴟𐴣𐴌𐴝𐴘𐴊𐴞𐴘𐴠𐴥. 𐴇𐴠𐴥𐴍𐴠 𐴉𐴡𐴀𐴣𐴏𐴞𐴘𐴡𐴌𐴠 𐴃𐴝𐴌𐴝𐴥 𐴘𐴡𐴇𐴟𐴥𐴊𐴞𐴌 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴒𐴞𐴦𐴘𐴠𐴥.¹¹𐴇𐴠𐴥𐴍𐴞𐴘𐴝𐴌 𐴘𐴡𐴇𐴟𐴥𐴊𐴞 𐴇𐴞𐴥𐴀𐴕 𐴃𐴞𐴏𐴡𐴥𐴓𐴡𐴕𐴞𐴑𐴝 𐴐𐴡𐴥𐴀𐴌𐴡𐴌 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴃𐴟𐴥𐴖𐴝𐴌𐴡 𐴐𐴝𐴥𐴊𐴝-𐴐𐴞𐴥𐴊𐴝 𐴀𐴝𐴐𐴧𐴞𐴥𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴋𐴡𐴣𐴀𐴌 𐴀𐴝𐴎𐴧𐴟𐴘𐴠 𐴑𐴝𐴓𐴝𐴔 𐴉𐴟𐴥𐴕𐴞 𐴑𐴡𐴁𐴟𐴓𐴢 𐴒𐴡𐴙𐴅𐴧𐴞𐴥𐴓𐴢. 𐴀𐴞𐴥𐴃𐴝𐴌𐴝 𐴂𐴝𐴥𐴀𐴟𐴓𐴠 𐴎𐴞𐴀𐴕 𐴈𐴡𐴘𐴃𐴡𐴤 𐴇𐴞𐴥𐴀𐴕 𐴉𐴡𐴃𐴧𐴞𐴥 𐴊𐴞𐴕 𐴂𐴝𐴑-𐴑𐴝𐴓𐴝𐴔 𐴃𐴝𐴇𐴝𐴥𐴑𐴞𐴃𐴢 𐴒𐴡𐴌𐴞𐴥 𐴏𐴡𐴥𐴘𐴧𐴞 𐴕𐴠𐴥 𐴕𐴝 𐴏𐴡𐴥𐴘𐴧𐴞 𐴏𐴝𐴘𐴃𐴡𐴥.¹²𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴝𐴌𐴝𐴃𐴧𐴟 𐴁𐴡𐴀𐴗𐴃𐴢 𐴎𐴡𐴕𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤; 𐴇𐴠𐴥𐴕𐴊𐴞𐴓𐴧𐴝 𐴁𐴡𐴀𐴗𐴃𐴢 𐴎𐴡𐴕 𐴒𐴞𐴌𐴞𐴥𐴑 𐴔𐴡𐴐𐴟𐴥𐴌 𐴔𐴝𐴘𐴝𐴉𐴟𐴀𐴝𐴙𐴕 𐴀𐴠𐴊𐴧𐴠 𐴔𐴡𐴌𐴡𐴃𐴉𐴟𐴀𐴝𐴙𐴕 𐴊𐴠 𐴘𐴡𐴥 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤.

¹³𐴔𐴡𐴕𐴃𐴡𐴌 𐴃𐴞𐴏𐴡𐴥𐴓𐴡𐴕𐴞𐴑𐴝𐴌 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴎𐴠𐴣𐴃𐴧𐴠𐴥 𐴂𐴝𐴥𐴀𐴟𐴓𐴠 𐴁𐴠𐴌𐴞𐴘𐴝𐴃𐴢 𐴀𐴡𐴥 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴃𐴡𐴁𐴡𐴓𐴞𐴑 𐴒𐴡𐴌𐴠𐴥𐴌 𐴊𐴠 𐴉𐴟𐴥𐴙𐴕𐴧𐴠, 𐴀𐴞𐴥𐴃𐴝𐴌𐴝 𐴇𐴠𐴥𐴍𐴠 𐴘𐴡𐴥 𐴎𐴝𐴘 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴟𐴏𐴑𐴝𐴘𐴊𐴞 𐴀𐴡𐴓𐴎𐴡𐴥𐴓𐴢 𐴉𐴡𐴘𐴊𐴝 𐴒𐴡𐴙𐴅𐴧𐴠𐴥.¹⁴𐴇𐴠𐴥𐴃𐴡𐴓𐴧𐴝 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕 𐴊𐴠 𐴃𐴡𐴌𐴝𐴃𐴡𐴌𐴞 𐴂𐴝𐴥𐴀𐴟𐴓𐴡𐴌𐴠 𐴊𐴡𐴙𐴅𐴧𐴝𐴌 𐴇𐴝𐴣𐴏𐴝𐴃𐴢 𐴊𐴟𐴣𐴌𐴝𐴘𐴊𐴞𐴘𐴠𐴥, 𐴔𐴡𐴕𐴃𐴡𐴌 𐴏𐴞𐴥𐴓𐴝𐴏𐴢 𐴀𐴠𐴊𐴧𐴠 𐴃𐴞𐴔𐴡𐴥𐴃𐴞 𐴇𐴠𐴥𐴍𐴠 𐴃𐴝𐴥𐴘𐴒𐴞𐴓𐴒𐴡𐴘.¹⁵𐴎𐴠𐴃𐴝𐴌𐴝𐴤 𐴂𐴝𐴥𐴀𐴟𐴓𐴡𐴌𐴠 𐴁𐴝𐴌𐴝𐴤𐴘𐴊𐴞𐴃𐴡 𐴒𐴞𐴀𐴓𐴢 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴀𐴝𐴃𐴠𐴕 𐴐𐴡𐴥𐴀𐴌 𐴉𐴡𐴙𐴅𐴧𐴡𐴕𐴃𐴡 𐴉𐴡𐴀𐴣𐴏𐴝𐴘𐴊𐴞𐴘𐴠, 𐴀𐴝𐴦𐴌 𐴏𐴞𐴥𐴓𐴝𐴏𐴢 𐴀𐴠𐴊𐴧𐴠 𐴃𐴞𐴔𐴡𐴥𐴃𐴞 𐴎𐴠𐴕𐴊𐴞𐴓𐴧𐴝 𐴉𐴝𐴌𐴠 𐴇𐴠𐴥𐴕𐴊𐴞𐴓𐴧𐴝 𐴇𐴝𐴥𐴌𐴝 𐴂𐴝𐴥𐴀𐴟𐴓𐴡𐴌 𐴇𐴝𐴣𐴏𐴠 𐴀𐴝𐴘 𐴁𐴡𐴓𐴧𐴝 𐴇𐴡𐴥𐴑𐴟𐴔 𐴉𐴝𐴘𐴧𐴡𐴌𐴠 𐴀𐴞𐴥𐴃𐴝𐴌𐴝 𐴖𐴝𐴦𐴉𐴠𐴏𐴢 𐴒𐴞𐴦𐴘𐴠𐴥𐴒𐴡𐴘.

𐴀𐴝𐴃𐴠𐴕 𐴐𐴡𐴥𐴀𐴌𐴡𐴃𐴢 𐴂𐴝𐴥𐴀𐴟𐴓𐴢

¹⁶𐴂𐴝𐴥𐴀𐴟𐴓𐴠 𐴀𐴝𐴃𐴠𐴕 𐴐𐴡𐴥𐴀𐴌𐴡𐴃𐴢 𐴏𐴞𐴥𐴓𐴝𐴏𐴡𐴓𐴧𐴝 𐴀𐴠𐴊𐴧𐴠 𐴃𐴞𐴔𐴡𐴥𐴃𐴞𐴓𐴧𐴝 𐴀𐴠𐴕𐴃𐴠𐴎𐴝𐴌 𐴒𐴡𐴌𐴠𐴥𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴇𐴠𐴥 𐴐𐴡𐴥𐴀𐴌 𐴒𐴝𐴥𐴕 𐴔𐴟𐴃𐴧𐴞 𐴓𐴡𐴘 𐴉𐴟𐴌𐴝𐴘𐴧𐴝 𐴊𐴠 𐴊𐴠𐴑𐴞𐴥 𐴀𐴞𐴥𐴁𐴝𐴃𐴧𐴟 𐴊𐴞𐴓𐴡𐴃𐴢 𐴁𐴞𐴐𐴞𐴤 𐴉𐴠𐴌𐴠𐴐𐴝𐴕 𐴓𐴝𐴙𐴒𐴧𐴞𐴥𐴓𐴢.¹⁷𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝𐴘𐴠 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴘𐴡𐴇𐴟𐴥𐴊𐴞 𐴀𐴠𐴊𐴧𐴠 𐴊𐴞𐴕𐴊𐴝𐴥𐴌 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴃𐴡𐴏𐴑𐴝𐴌𐴝 𐴀𐴡𐴥𐴑𐴧𐴡𐴓𐴢 𐴒𐴡𐴙𐴃𐴧𐴡𐴥, 𐴇𐴠𐴥𐴕𐴊𐴞𐴓𐴧𐴝 𐴏𐴡𐴔𐴡𐴥𐴕𐴞𐴃𐴢 𐴎𐴝𐴘 𐴎𐴠𐴃𐴝𐴌𐴝𐴤𐴌𐴠 𐴓𐴡𐴦𐴃𐴉𐴝 𐴀𐴞𐴥𐴃𐴝𐴌𐴝 𐴓𐴧𐴡𐴥𐴘 𐴘𐴡𐴥 𐴉𐴡𐴃𐴧𐴞𐴥 𐴊𐴞𐴕 𐴒𐴡𐴙𐴃𐴧𐴡𐴥.¹⁸𐴀𐴞𐴂𐴞𐴥𐴑𐴟𐴌𐴞 𐴀𐴠𐴊𐴧𐴠 𐴀𐴠𐴏𐴃𐴡𐴘𐴑𐴞 𐴉𐴞𐴥𐴌𐴑𐴝𐴌 𐴇𐴡𐴦𐴎𐴧𐴡𐴕 𐴀𐴟𐴥𐴎𐴟𐴌𐴠 𐴘𐴡𐴥 𐴀𐴞𐴥𐴁𐴝 𐴓𐴧𐴡𐴥𐴘 𐴁𐴝𐴌𐴝𐴤𐴁𐴝𐴌𐴞 𐴊𐴞𐴥𐴘𐴝𐴃𐴢 𐴊𐴡𐴙𐴅𐴧𐴠, 𐴇𐴡𐴊𐴟𐴥𐴕𐴠 𐴈𐴡𐴀𐴌 𐴊𐴠, ”𐴀𐴠 𐴉𐴝𐴥𐴓𐴄𐴟 𐴀𐴞𐴃𐴠 𐴑𐴞𐴦 𐴈𐴡𐴘𐴃𐴡𐴤 𐴏𐴝𐴥𐴌 𐴊𐴠𐴥؟“ 𐴀𐴝𐴌 𐴇𐴡𐴊𐴟𐴥𐴕𐴠 𐴈𐴡𐴀𐴌 𐴊𐴠, ”𐴀𐴞𐴃𐴠 𐴃𐴡 𐴀𐴠𐴒𐴧𐴗𐴝𐴤 𐴁𐴞𐴊𐴠𐴐𐴞𐴥 𐴊𐴠𐴁𐴡𐴃𐴝𐴌 𐴁𐴝𐴦𐴁𐴟𐴃𐴠 𐴃𐴝𐴦𐴓𐴞𐴔 𐴊𐴠𐴌 𐴉𐴝𐴥𐴕 𐴓𐴝𐴒𐴠𐴌.“ 𐴀𐴞𐴥𐴃𐴝𐴌𐴝 𐴀𐴠 𐴈𐴡𐴃𐴝𐴤 𐴀𐴠𐴃𐴡𐴓𐴧𐴝𐴤 𐴈𐴡𐴘𐴧𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴂𐴝𐴥𐴀𐴟𐴓𐴠 𐴀𐴞𐴏𐴝𐴤𐴌 𐴁𐴝𐴦𐴁𐴟𐴃𐴠 𐴀𐴠𐴊𐴧𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴖𐴝𐴌 𐴁𐴝𐴦𐴁𐴟𐴃𐴠 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.¹⁹𐴀𐴞𐴥𐴃𐴝𐴌𐴝 𐴂𐴝𐴥𐴀𐴟𐴓𐴡𐴌𐴠 𐴀𐴝𐴌𐴞𐴘𐴡𐴂𐴝𐴒𐴟𐴏𐴢 𐴔𐴟𐴅𐴞𐴓𐴞𐴥𐴐𐴡𐴌 𐴇𐴠𐴥𐴍𐴠 𐴀𐴝𐴕𐴞𐴤 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴘 𐴎𐴠 𐴕𐴡𐴘𐴝 𐴃𐴝𐴦𐴓𐴞𐴔 𐴀𐴠𐴑𐴧𐴝𐴥𐴕 𐴊𐴡𐴀𐴌 𐴇𐴞𐴥𐴘𐴝𐴕 𐴑𐴞𐴦 𐴀𐴝𐴣𐴀𐴌𐴝 𐴎𐴝𐴕𐴞 𐴉𐴝𐴙𐴅𐴧𐴟𐴔 𐴕𐴠𐴥؟²⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴘 𐴃𐴡 𐴀𐴝𐴣𐴀𐴌𐴝𐴌 𐴈𐴝𐴕𐴡𐴃𐴢 𐴀𐴠𐴕𐴊𐴞𐴓𐴧𐴝 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴀𐴝𐴕𐴡𐴤𐴌, 𐴎𐴞𐴀𐴕 𐴇𐴡𐴕𐴡𐴤𐴊𐴞𐴕 𐴉𐴟𐴥𐴕𐴝 𐴕𐴡𐴥 𐴎𐴝, 𐴇𐴠𐴥𐴃𐴡𐴓𐴧𐴝 𐴀𐴝𐴣𐴀𐴌𐴝𐴃𐴧𐴟 𐴇𐴞𐴥𐴀𐴕𐴡𐴌 𐴏𐴡𐴥𐴘𐴧𐴞 𐴔𐴝𐴀𐴕𐴞 𐴎𐴝𐴙𐴕𐴃𐴡 𐴔𐴡𐴕𐴠𐴈𐴡𐴀𐴌.“²¹𐴃𐴝𐴔𐴝𐴥𐴔 𐴀𐴝𐴃𐴠𐴕𐴞 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴁𐴞𐴊𐴠𐴐𐴡𐴥𐴙𐴃𐴧𐴝 𐴀𐴡𐴥𐴑𐴧𐴡𐴓𐴢 𐴎𐴠𐴃𐴝𐴌𐴝𐴤 𐴇𐴠𐴥 𐴐𐴡𐴥𐴀𐴌𐴡𐴃𐴢 𐴃𐴝𐴥𐴑𐴞𐴃𐴡, 𐴀𐴞𐴥𐴃𐴝𐴌𐴝 𐴏𐴞𐴌𐴞𐴥𐴉𐴢 𐴕𐴡𐴘𐴝-𐴕𐴡𐴘𐴝 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴈𐴡𐴖𐴝𐴤𐴃𐴢 𐴀𐴠𐴊𐴧𐴠 𐴉𐴟𐴥𐴕𐴝𐴃𐴢 𐴄𐴝𐴙𐴔 𐴈𐴝𐴍𐴝𐴘𐴃𐴡𐴥.

²²𐴂𐴝𐴥𐴀𐴟𐴓𐴠 𐴀𐴝𐴌𐴞𐴘𐴡𐴂𐴝𐴒𐴟𐴏𐴢 𐴔𐴟𐴅𐴞𐴓𐴞𐴥𐴐𐴡𐴃𐴢 𐴃𐴞𐴥𐴘𐴝𐴘 𐴈𐴡𐴀𐴌 𐴊𐴠, ”𐴀𐴡𐴥 𐴀𐴝𐴃𐴠𐴕𐴞 𐴀𐴡𐴥𐴑𐴧𐴡𐴓𐴢! 𐴀𐴝𐴀𐴛 𐴊𐴠𐴑𐴞𐴥𐴌 𐴊𐴠, 𐴃𐴟𐴣𐴀𐴝𐴥𐴌𐴝 𐴇𐴝𐴥𐴀𐴌 𐴔𐴞𐴑𐴧𐴝𐴥𐴃𐴧𐴟 𐴁𐴞𐴐𐴞𐴤 𐴊𐴞𐴕𐴊𐴝𐴥𐴌.²³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴁𐴠𐴌𐴝𐴘-𐴁𐴠𐴌𐴝𐴘 𐴃𐴟𐴣𐴀𐴝𐴥𐴌𐴝 𐴉𐴟𐴣𐴎𐴝 𐴒𐴡𐴌𐴡𐴤 𐴊𐴠 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴢 𐴊𐴞𐴥𐴘𐴝𐴕 𐴊𐴡𐴥𐴌𐴞 𐴏𐴝𐴀𐴙𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴀𐴝𐴀𐴛 𐴀𐴠𐴕𐴊𐴞𐴓𐴧𐴝 𐴀𐴠𐴑𐴧𐴝𐴥𐴕 𐴑𐴟𐴌𐴁𐴝𐴕𐴞-𐴒𐴝𐴥𐴣 𐴘𐴡𐴥 𐴊𐴠𐴙𐴑𐴧𐴞𐴥 𐴎𐴞𐴘𐴝𐴥𐴕𐴡𐴃𐴢 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤 𐴊𐴠, ’𐴀𐴡𐴏𐴞𐴕 𐴑𐴟𐴥𐴊𐴝𐴌 𐴇𐴝𐴙𐴏𐴠.‘ 𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴌𐴝 𐴕𐴡 𐴎𐴝𐴕𐴞 𐴎𐴞𐴁𐴝𐴤𐴌 𐴉𐴟𐴣𐴎𐴝 𐴒𐴡𐴌𐴡𐴤𐴌, 𐴀𐴝𐴀𐴛 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴁𐴡𐴘𐴧𐴝𐴕 𐴒𐴡𐴌𐴞𐴥𐴌 𐴊𐴠.

²⁴”𐴎𐴠 𐴀𐴝𐴓𐴧𐴝𐴘𐴠 𐴊𐴟𐴕𐴞𐴘𐴝𐴘𐴌𐴠 𐴀𐴠𐴊𐴧𐴠 𐴇𐴞𐴥𐴘𐴝𐴕𐴡𐴃𐴢 𐴀𐴝𐴏𐴠𐴤 𐴊𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴉𐴡𐴘𐴊𐴝 𐴒𐴡𐴙𐴅𐴧𐴠𐴥, 𐴀𐴞𐴥𐴁𐴝 𐴎𐴠𐴃𐴧𐴡𐴥𐴃𐴢 𐴀𐴝𐴏𐴔𐴝𐴕 𐴎𐴡𐴁𐴞𐴕𐴡𐴌 𐴔𐴝𐴓𐴞𐴑, 𐴀𐴞𐴥𐴁𐴝 𐴀𐴞𐴕𐴏𐴝𐴥𐴕𐴡𐴌 𐴀𐴝𐴥𐴃𐴠 𐴁𐴝𐴕𐴝𐴘𐴧𐴝 𐴔𐴡𐴕𐴊𐴞𐴌 𐴀𐴡𐴥𐴑𐴧𐴡𐴓𐴡𐴃𐴢 𐴕𐴡 𐴃𐴝𐴥𐴑𐴠.²⁵𐴀𐴞𐴥𐴁𐴝 𐴇𐴡𐴕𐴡𐴤 𐴑𐴠𐴏𐴧𐴟𐴥𐴌 𐴔𐴟𐴀𐴃𐴝𐴐𐴡𐴃𐴢 𐴕𐴡 𐴉𐴡𐴌𐴠, 𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝𐴃𐴧𐴟 𐴀𐴞𐴕𐴏𐴝𐴥𐴕𐴡𐴌 𐴀𐴝𐴥𐴃𐴡𐴌 𐴇𐴡𐴕𐴡𐴤 𐴇𐴠𐴥𐴊𐴔𐴡𐴃𐴡𐴌 𐴎𐴡𐴌𐴟𐴌 𐴕𐴝𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝 𐴕𐴞𐴎𐴠 𐴉𐴡𐴃𐴧𐴞𐴥𐴑𐴞𐴘𐴡𐴌𐴠 𐴎𐴞𐴕𐴊𐴞𐴒𐴞 𐴊𐴠𐴦, 𐴕𐴞𐴘𐴝𐴥𐴐𐴢 𐴊𐴠𐴦 𐴀𐴠𐴊𐴧𐴠 𐴁𐴠𐴒𐴧𐴟𐴥𐴕 𐴊𐴠𐴦.²⁶𐴀𐴠𐴑𐴎𐴡𐴕 𐴔𐴝𐴕𐴟𐴥𐴙𐴐𐴡𐴃𐴧𐴟 𐴀𐴞𐴥𐴁𐴝𐴘𐴠 𐴉𐴟𐴌𐴝 𐴊𐴟𐴕𐴞𐴘𐴝𐴙𐴃𐴢 𐴃𐴝𐴥𐴑𐴞 𐴁𐴡𐴓𐴧𐴝 𐴃𐴝𐴔𐴝𐴥𐴔 𐴑𐴡𐴗𐴔 𐴀𐴡𐴥𐴑𐴧𐴡𐴓𐴢 𐴉𐴡𐴘𐴊𐴝 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴇𐴡𐴣𐴃𐴧𐴠𐴥 𐴇𐴡𐴕 𐴎𐴝𐴒𐴝𐴃𐴢 𐴃𐴝𐴥𐴑𐴞𐴁𐴡 𐴇𐴞𐴥𐴀𐴕 𐴀𐴡𐴥 𐴀𐴞𐴥𐴁𐴝𐴘𐴠 𐴀𐴝𐴒𐴠 𐴓𐴡𐴥𐴃𐴞 𐴉𐴝𐴥𐴘𐴏𐴠𐴓𐴝 𐴒𐴡𐴌𐴞𐴥 𐴌𐴝𐴙𐴑𐴧𐴠𐴥.²⁷𐴀𐴝𐴓𐴧𐴝𐴘𐴠 𐴇𐴠𐴥𐴕𐴊𐴞𐴓𐴧𐴝 𐴀𐴠𐴃𐴡𐴓𐴧𐴝𐴤 𐴒𐴡𐴙𐴅𐴧𐴠𐴥, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴀𐴝𐴥𐴃𐴝𐴘-𐴀𐴝𐴥𐴃𐴝𐴘 𐴃𐴟𐴖𐴝𐴘 𐴉𐴝𐴘𐴁𐴝𐴌 𐴀𐴝𐴐𐴝𐴤𐴘𐴠 𐴀𐴞𐴥𐴁𐴝𐴌 𐴃𐴝𐴓𐴝𐴐𐴢 𐴒𐴡𐴌𐴠𐴥, 𐴔𐴡𐴕𐴃𐴡𐴌 𐴇𐴝𐴥𐴓𐴠𐴑𐴠 𐴀𐴞𐴥𐴁𐴝 𐴀𐴝𐴣𐴀𐴌𐴝 𐴇𐴡𐴕𐴡𐴤𐴑𐴞𐴘𐴡𐴃𐴧𐴟 𐴊𐴟𐴌𐴠𐴥 𐴊𐴠 𐴕𐴡.²⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌𐴝 𐴃𐴡 𐴀𐴞𐴥𐴁𐴝𐴌 𐴁𐴟𐴥𐴃𐴡𐴌𐴠 𐴎𐴞𐴕𐴊𐴞𐴒𐴞 𐴈𐴝𐴍𐴝𐴘, 𐴏𐴡𐴓𐴝𐴉𐴞𐴥𐴌𐴝 𐴒𐴡𐴌𐴞𐴥 𐴀𐴠𐴊𐴧𐴠 𐴎𐴞𐴕𐴊𐴝 𐴀𐴝𐴏𐴞𐴤. 𐴃𐴟𐴣𐴀𐴝𐴥𐴌𐴝𐴌 𐴑𐴠𐴏𐴧𐴟𐴥 𐴐𐴝𐴥𐴙𐴌 𐴀𐴡𐴥𐴑𐴧𐴡𐴓𐴠 𐴀𐴟𐴥𐴊𐴧𐴗𐴝 𐴀𐴠𐴕𐴊𐴞𐴓𐴧𐴝 𐴈𐴡𐴘𐴧𐴠𐴥, ’𐴀𐴝𐴣𐴀𐴌𐴝 𐴘𐴡𐴥 𐴀𐴞𐴥𐴁𐴝𐴌 𐴉𐴟𐴀𐴝𐴙𐴕.‘

²⁹”𐴇𐴠𐴥𐴃𐴡𐴓𐴧𐴝, 𐴀𐴝𐴣𐴀𐴌𐴝 𐴎𐴠𐴃𐴧𐴡𐴥𐴃𐴢 𐴀𐴝𐴓𐴧𐴝𐴌 𐴉𐴟𐴀𐴝𐴙𐴕, 𐴀𐴝𐴣𐴀𐴌𐴝𐴃𐴧𐴟 𐴀𐴠𐴕𐴊𐴞𐴓𐴧𐴝 𐴑𐴞𐴥𐴘𐴝𐴓𐴢 𐴕𐴟 𐴀𐴝𐴕𐴝𐴤 𐴉𐴡𐴌𐴞𐴁𐴡𐴥 𐴊𐴠 𐴑𐴞, 𐴑𐴟𐴥𐴊𐴝𐴘𐴞 𐴈𐴡𐴀 𐴊𐴠 𐴇𐴞𐴥𐴘𐴝𐴕 𐴐𐴟𐴥𐴕𐴝, 𐴏𐴝𐴣𐴊𐴞, 𐴘𐴝𐴥 𐴉𐴝𐴃𐴧𐴡𐴥𐴌𐴡𐴌 𐴋𐴡𐴥𐴙𐴓𐴧𐴝 𐴀𐴠𐴑𐴧𐴝𐴥𐴕 𐴏𐴡𐴥𐴁𐴞, 𐴎𐴞𐴘𐴝𐴥𐴕𐴡𐴌 𐴐𐴡𐴑𐴡𐴥𐴓𐴢 𐴀𐴞𐴕𐴏𐴝𐴥𐴕𐴡𐴌 𐴀𐴝𐴣𐴑𐴝 𐴀𐴠𐴊𐴧𐴠 𐴁𐴝𐴥𐴉𐴝𐴕𐴞 𐴓𐴡𐴥𐴘 𐴁𐴝𐴕𐴝 𐴒𐴞𐴘𐴠𐴥.³⁰𐴀𐴝𐴒𐴡𐴌 𐴎𐴡𐴁𐴝𐴕𐴝𐴃𐴢 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴀𐴝𐴓𐴧𐴝𐴌𐴠 𐴕𐴡 𐴎𐴝𐴙𐴕𐴃𐴡 𐴊𐴠 𐴇𐴞𐴥𐴘𐴝𐴕 𐴀𐴞𐴥𐴁𐴝𐴘𐴠 𐴊𐴠𐴑𐴞𐴥𐴓𐴠 𐴘𐴡 𐴕𐴡𐴥 𐴊𐴠𐴑𐴠𐴥 𐴉𐴝𐴥𐴚𐴒𐴡𐴌𐴞 𐴃𐴝𐴥𐴑𐴞𐴃𐴡, 𐴔𐴡𐴕𐴃𐴡𐴌 𐴘𐴝𐴓𐴝 𐴀𐴞𐴥𐴁𐴝𐴘𐴠 𐴇𐴝𐴥𐴀𐴌 𐴎𐴝𐴒𐴝𐴌 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌𐴠 𐴃𐴡𐴖𐴝𐴥 𐴒𐴡𐴌𐴞𐴥 𐴁𐴡𐴓𐴧𐴝 𐴇𐴡𐴥𐴑𐴟𐴔 𐴊𐴠𐴌.³¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴀𐴠𐴑𐴒𐴗𐴝𐴥 𐴊𐴞𐴕 𐴄𐴞𐴥𐴑 𐴒𐴡𐴌𐴞𐴥 𐴌𐴝𐴙𐴑𐴧𐴠𐴥, 𐴎𐴠 𐴊𐴞𐴕𐴡𐴃𐴢 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴁𐴝𐴏𐴞𐴥𐴓𐴡𐴘𐴧𐴝 𐴔𐴝𐴕𐴟𐴥𐴙𐴐𐴧𐴗𐴝𐴌 𐴀𐴝𐴥𐴃𐴝 𐴀𐴞𐴕𐴏𐴝𐴥𐴉𐴢 𐴓𐴡𐴥𐴘 𐴊𐴟𐴕𐴞𐴘𐴝𐴙𐴌 𐴁𐴞𐴏𐴝𐴌 𐴒𐴡𐴌𐴞𐴥𐴁𐴡. 𐴀𐴞𐴥𐴁𐴝𐴘𐴠 𐴇𐴞𐴥𐴘𐴝𐴕 𐴀𐴞𐴥𐴁𐴝𐴌𐴠 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴒𐴡𐴌𐴞𐴥 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌 𐴇𐴝𐴣𐴏𐴠 𐴏𐴝𐴥𐴁𐴟𐴃𐴢 𐴒𐴡𐴙𐴅𐴧𐴠𐴥.“

³²𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴌𐴝 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴘 𐴀𐴟𐴍𐴝𐴥𐴌 𐴁𐴝𐴦𐴁𐴟𐴃𐴠 𐴉𐴟𐴥𐴙𐴕𐴧𐴠, 𐴇𐴡𐴦𐴎𐴧𐴡𐴕𐴠 𐴂𐴝𐴥𐴀𐴟𐴓𐴡𐴌𐴠 𐴃𐴠𐴥𐴐𐴠𐴌𐴝𐴘𐴧𐴠, 𐴔𐴡𐴕𐴃𐴡𐴌 𐴀𐴝𐴌 𐴇𐴡𐴊𐴟𐴥𐴕𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝 𐴘𐴝𐴀𐴕𐴡𐴌 𐴁𐴝𐴦𐴁𐴟𐴃𐴠 𐴃𐴟𐴣𐴀𐴝𐴥𐴣𐴃𐴧𐴟 𐴀𐴝𐴌𐴀𐴠𐴑 𐴔𐴡𐴃𐴧𐴡 𐴉𐴟𐴥𐴕𐴞𐴘𐴟𐴔.“³³𐴁𐴝𐴦𐴊𐴠 𐴂𐴝𐴥𐴀𐴟𐴓𐴢 𐴇𐴠𐴥 𐴔𐴟𐴅𐴞𐴓𐴞𐴥𐴐𐴡𐴃𐴧𐴟 𐴒𐴞𐴦𐴘𐴠𐴥𐴒𐴡𐴘.³⁴𐴇𐴡𐴦𐴎𐴧𐴡𐴕 𐴔𐴝𐴕𐴟𐴥𐴙𐴐𐴢 𐴀𐴞𐴥𐴁𐴝 𐴓𐴧𐴡𐴥𐴘 𐴁𐴡𐴥𐴚 𐴊𐴞𐴥𐴘𐴠 𐴀𐴝𐴦𐴌 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤. 𐴀𐴞𐴔𐴝𐴕𐴊𐴝𐴥𐴌 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴔𐴟𐴅𐴞𐴓𐴞𐴥𐴐𐴢 𐴇𐴞𐴥𐴘𐴝𐴕𐴡𐴌 𐴔𐴠𐴔𐴁𐴡𐴥𐴌 𐴊𐴞𐴘𐴡𐴕𐴞𐴥𐴏𐴞𐴘𐴟𐴏𐴢 𐴀𐴝𐴐𐴧𐴞𐴥𐴓𐴢, 𐴊𐴝𐴔𐴝𐴌𐴞 𐴕𐴝𐴔𐴡𐴌 𐴀𐴠𐴒𐴧𐴗𐴝𐴤 𐴔𐴝𐴘𐴝𐴉𐴟𐴖𐴝 𐴀𐴝𐴐𐴧𐴞𐴥𐴓𐴢, 𐴉𐴟𐴥𐴖𐴝𐴣𐴃𐴞 𐴀𐴝𐴌𐴡𐴤 𐴇𐴡𐴦𐴎𐴧𐴡𐴕 𐴀𐴝𐴐𐴧𐴞𐴥𐴓𐴢.

The Word for the World International

https://app.library.bible/content/87faca8b51c22590