लेवी25
1यहोवा देव सिनाय डोगोपोअ मोशेहे कोयो,2“इस्राएलवालाहां कोजी के आंय आपोहो तिया देसोमेहें तुमू फोहाहा, ताहां तिया देसोअ जागाहा बी यहोवा देवोअ काजे आराम जोड़ुहूं जोवे.3सोव वोरह्ये ते तुमू खेतोम पेअजा, आन सोवू वोरह्ये जिवज्योअ दाराक्शाआ वाड़ी लागाड़ीत कोइत तियाआ कामाय टोलु वाल्या कोअजा;4पोन हांतवा वोरह्योअरी जागाहा बी यहोवा देवोअ काजे वोडी आरामोअ वेल जोड़ुहूं जोवे; तिये वोरही तुमाआ खेतोम मा पेअहा आन मा दाराक्शाआ वाड़्यी लागाड़हा.5जों किबी वाडल्या खेतोमेहें तिया तियाआ उगे तियाहा मा वाडहा, आन होंजल्यो तिया दाराक्शाआ दाराक्शे मा तोड़हा; काहाके तों खेतोअ काजे वोडो आरामोअ वोरीही रोअहूं जोवे.6देसोमेहें खेतोअ आराम-वोरह्ये होंजल्यी कामायी वाअहीं तुमाआ सेवक सेविका, तुमाआ मोजऱ्याहां आन तुमाअरी रोनारा पारका माअहोंहों बी तियाज मेहें रोत खाअहूं जोड़े;7आन तुमाआ जनवारोअ आन देसोमेहें जेत्ते जिव ओय तियांआं बी खाअलोअ खेतोअ कामायीम रोत रोय.”8“हांतवा आरामोअ-वोरह्ये, मोन्ज्ये हांत वारी हांत वोरह्ये गोणीत लेजा, हांतवा आराम वोरह्योअ ए वेल एकोणपोन्नास वोरह्ये ओवे.9ताहां साँतवा मोयनाआ दाहावे दिही, मोन्ज्ये पाप टापीइलोअ दिही, वोडा आवाजोम पुकारु कोइलोअ काजे तुरी तुमाआ आखा देसोमेहें हारेक जागे फुकाड़जा.10आन तिया पोन्नासवा वोरह्योहो सोको मानजा, आन देसोमेर्याआ आखा रोनारा काजे सुटकाआ पोरसार कोअजा; ओं वोरिही तुमाआ कोअते जुबली कोवाय; तियामेहें तुमू जिवज्योअ खाजगी जागाम आन जिवज्योअ घराणाम वापिस आवीत सेकहा.11ओं पोन्नासवो वोरीही तुमाआ काजे जुबली कोत गोणाय; तियामेहें तुमू मा पेअहा, आन जो होंजल्यो उगे तियाहा बी मा वाडहा, आन ने सिंद्योय तिया दाराक्शाआ वेलाआ दाराक्शे मा तोड़हा.12काहाके ओं जुबली वोरीही रोय; आन ओं तुमाआ काजे पवित्र रोअहूं जोवे; तुमू जो खेतोमेहें होंजल्यो जोड़े तोज ओन खाजा.”13या जुबली वोरह्योम तुमू जिवज्योअ खाजगी जागाम वापिस जाहा.14आन जर तुमू तुमाआ गावला पायहोहो काविहीं वेसहा नेताहां तियाप रोत काविहीं वेसातो लेहा, ताहां तुमू एकमेकाहा मा ठोगहा.15जुबली वोरीही सेके तिहींइं फाटी जेतेहे वोरह्ये ओत गोयेय तियांआं गोणतीइ परमाणे किम्मत ठोरवीत कोइत एकमेकापोअ वेसातो लेजा, आन कामाय काडीइलोअ वोरह्योअ गोणतीइ परमाणे तों वेसुहूं जोवे.16जेते वोरह्ये वादार रोये ओय तेतीहीज किम्मत वादाड़जा, आन जेते वोरह्ये कमी रोये ओय तेतीहीज किम्मत तोड़जा; काहाके कामाय कोइलोअ वोरह्योअ गोणती जेतीही ओय तियेज इसाबे तों वेसुहूं जोवे.17तुमू जिवज्योअ गावलाहा ने ठोगुहूं जोवे; तुमाआ देवोहो बित सालजा; आंय तुमाआ यहोवा देव होय.18“तियाहा काजे तुमू माआं नियमोहो आन आदेशोहो मानित सालजा; काहाके एहेलोहो कोइला वाअहीं तुमू तिया देसोम बेफिकर्ये रोत सेकहा.19खेत तियाआ कामाय पाकाड़्या कोए, आन तुमू पेट पोइत खाया कोअहा, आन तिया देसोमेहें तुमू बेफिकर्ये रोहा.20आन जर तुमू कोहा के साँतवा वोरह्योम नाहां आपू पेअनारे आन नाहां आपू खेतोअ कामाय टोलु वालनारे ताहां आपू की खानारे?21ताहां जांइत ल्या के आंय तुमुहूं साहावा वोरह्योम एहेलुहू आशिर्वाद आपीहीं, के खेतोअ कामाय तिन वोरह्ये जाआं पुरे.22तुमू आंठवा वोरह्योअरी ओअहा, आन जुनोज ओन खाया कोअहा, नोव्वा वोरह्योअ कामाय निहे ताअहूं जाआं तुमू जुनोज ओन खाया कोअहा.”23जागू एकसोट्युज ने वेसुहूं जोवे, काहाके जागू माआ होय; आन तियामेहें तुमू पोरदेसी आन पारके होय.24पुरा देसोम, जिहीं तुमाआ आधिकार ओय, तो जागू तुमू सोड़वीत लेअहूं जोवे.25“जर ताआ गावलू पाही गोरीब ओत कोइत तियाआ वाजिहीं जागू वेसी देय, ताहां तियाआ कुटुंबामेर्योअ जों आहनेए ओय तों आवीत कोइत तिये वेस्युहू तो जागू सोड़वीत लेअहूं जोवे.26जर एखा माहुंउं काजे सोड़वीइनारो ने ओय, आन तों एतोहो मालदार ओवो के सोताहाज तियाआ जागू सोड़वीत सेके,27ताहां तों तियाआ जागू वेसीइलोअ होमसे रोत वोरह्ये गोणीत कोइत रोल्या वोरह्योअ कामाय इसाब कोइत जिये तो जागू वेसातू लेदू ओय तियाहा आपी देअहूं जोवे; ताहरोअ तों तियाआ खाजगी जागाआ आधिकारी ओत जाय.28पोन जर तियापोअ तो जागू सोड़वीत सेके एताहा पोश्या ने ओय, ताहां तो वेसल्यू जागू जुबली वोरीही आवे ताअहूं जाआं वेसातो लेनाराआ ताबाम रोअहूं देअहूं जोवे; आन जुबलीइ वोरह्योम तो जागू सुटीत जाय, ताहां तो वेसनारो माहुंउं तियाआ खाजगी जागाआ मालक ओत जाय.29“जर एखू माहुंउं पितड़ो बांद्योय तिया होयरोम कोओ वेसे, ताहां तो वेसे तिहींइं फाटी पुरा एका वोरह्योम तों कोअ सोड़वीत सेकेहे, मोन्ज्ये तों सोड़वीइलोअ पुरु आधिकार तियाहा रोनारु.30पोन जर तो तों कोअ तिया वोरह्योम ने सोड़वे, ताहां तो कोओ जो पितड़ो बांदल्या होयरोम वेसातो लेनाराआज ओत जाय, आन पिड़ीन पिड़ी तियाआज पारवाड़ीइ ओत जाय; आन तो जुबलीइ वोरह्योम बी ने सुटे.31पोन बिगर पितड़ो बांदल्या गांवोमेएं कोएं ओय तें देसोमेएं खेतोअ होस गोणाअहूं जोवे; तियांहां सोड़वीत बी सेकतेहे, आन ते जुबलीइ वोरह्योम बी सुटीत सेकतेहे.32तेबी जियां होयरोपोअ लेवीइ आधिकार होय, तियांमेहें बांदल्या कोओहो लेवी माअहें कोयों बी सोड़वीत सेकतेहे.33आन जर एखू लेवी तियाआ भाग ने सोड़वे, ताहां तों वेसल्यो कोओ जो तियाआ भागोअ होयरोअ ओय तों जुबलीइ वोरह्योम सुटीत जाय; काहाके इस्राएलवालाआ विसमेहें लेवीइ भाग तियांआं होयरोमेहें तेंज कोएं होय.34पोन तियांआं होयरोअ मेरेमेरेए सारीइलोअ जागू वेसुहूं ने जोवे; काहाके तो तियांआं हादाजोल्म्युउं भाग रोय.35“जर ताआ एखू गावलू पाही गोरीब ओत जाय, आन तियाआ दशा तुमुंहूं किइमाय आवाड़े, ताहां तु तियाहा सांबालजी; तो पारकू नेताहां पाही ओत तुमाअरी रोये.36तियापोअ रोत वियाद नेताहां लाब मा लेही; देवोअ बिक मानजी; जियावाअहीं ताआ गावलू पाही ताअरी जिवन जिवीत सेके.37तियाहा वियादोपोअ पोशा मा आपही, आन तियापोअ लाबोअ लालस कामावीइलोअ काजे ओन मा आपही.38आंय तुमाआ यहोवा देव होय; आंय तुमुहूं कनान देस आपीइलोअ काजे आन तुमाआ देव ठोरीइलोअ विसारोवाअहीं तुमुहूं मिसर देसोम रोत काडीत लेतायुहू.39“जर ताआ एखू गावलू पाही ताआ सामने गोरीब ओत कोइत सोताहा ताआ आथोम वेसात जाय, ताहां तियाहा गुलामोअ होस काम मा कोआड़ही.40तो ताअरी मोजर्याआ होस नेताहां वोहत्याआ होस रोय, आन जुबलीइ वोरीही आवे ताअहूं जाआं तो ताआ सेवा कोअतु रोअहूं जोवे;41ताहरुउ तो तियाआ बोईंन-पोर्ये लेत कोइत जातु रोअहूं जोवे, आन तियाआ कुटूंबाम आन तियाआ डायहांआं खाजगी जागाम जातु रोअहूं जोवे.42काहाके ते माआंज सेवक होय, जियांहां आंय मिसर देसोम रोत काडीत लेत आयुहू; तियाहा काजे ते गुलामोअ होस ने वेसाअहूं जोवे.43तियाअरी कोड़ोक मा वागही; ताआ देवोअ बिक मानतु रोजी.44जर ताहूं पावर-पावरीइं गरज ओय, ताहां ताआ आसे-पासे रोनारा देसोमेहें रोत तियांहां वेसाते लेतावजी.45जें जिवण्ये माअहें तुमाआ विसमेहें पारके कोत रोय, तियांमेहें रोत आन तियांआं घराणामेहें रोत बी जें तुमाआ आसे-पासे ओय, आन जे तुमाआ देसोम उब्ज्ये ओय, तियांम रोत तुमू पावर-पावरीइं वेसाते लेजा; आन तें तुमाआ भाग ठोरे.46तुमू तुमाआ बेटाह्हांहां बी जे तुमाआ फाटी रोय तियांआं आधिकारी कोइत सेकहा, आन तें पावर-पावरीइं तियांआं मालधन ठोरे; तियांम रोत तुमू सादा तुमाआ काजे पावर लेया कोअजा, पोन तुमाआ पाव्हीइले जें इस्राएलवाले ओय तियांपोअ जोर मा वापराहा.”47“जर ताआ सामने एखू पारको नेताहां जिवण्य माहुंउं कुन्बी बोणीत जाय, आन तियाआ सामने ताआ पाही गरीब ओत कोइत सोताहा तिया पारका नेताहां जिवण्या नेताहां तियाआ पारवाड़ीही वेसात जाय,48ताहां तों वेसात गोयोय तेबी तियाहा सोड़वीइता आवे; तियाआ पायहोंमेर्युउ कोडू बी तियाहा सोड़वीत सेकेहे;49नेताहां तियाआ काकुह्हू, नेताहां सुलत पाही, नेताहां तुमाआ घराणाआ कोडो बी आहनेए कोर्योअ तियाहा सोड़वीत सेकेहे; नेताहां जर तो कुन्बी बोणीत जाय, ताहां तो सोताहाज सुटीत सेकेहे.50तो तियाआ वेसातो लेनाराअरी तियाआ वेसाइलोअ वोरह्योअहीं रोत जुबलीइ वोरिही आवे ताअहूं जाआं इसाब कोअहूं जोवे, आन तियाआ वेसाइलोअ किम्मत वोरह्योअ गोणतीइ परमाणे रोय, मोन्ज्ये ते किम्मत मोजर्याआ दिहोअ रोजोअ होस तियाअरी ओवे.51जर जुबलीइ वारुज वोरह्ये बाकी रोते ओय ताहां, ताहां जेताहा पोश्यावाअहीं तों वेसातो लेवाअयो ओय तियांम रोत तियाआ सोड़वाइलोअ किम्मत तेताहाज वोरह्योअ परमाणे फेरवी देअहूं जोवे.52जर जुबलीइ वोरह्योअ थोड़ेज वोरह्ये रोये ओय, तेबी तों तियाआ मालख्योअरी इसाब कोइत तियाआ सोड़वीइलोअ किम्मत तेताहाज वोरह्योअ पुरमाणे फेरवी देअहूं जोवे.53तो तियाआ मालख्योअरी जियाआ वोरह्योअ मोजरी ठोरवाअती ओय तिया मोजुरोअ होस रोअहूं जोवे; आन तियाआ मालिख तियापोअ ताआ सामने दोमीत कोइत आधिकार ने सालाड़ुहूं जोवे.54आन जर एहें कोइत तों ने सोड़वाअयो, ताहां तों जुबलीइ वोरह्योम तियाआ बोईंन-पोर्ये नेहें सुटीत जाय.55काहाके इस्राएलवाले माआंज सेवक होय; तियांहां मिसर देसोम रोत आंयज काडल्ये सेवक होय; आंय तुमाआ यहोवा देव होय.
The Word for the World International