दानियेल8
1बेलशस्सर राजाआ राज्याआ तिसरा वोरह्योमेहें तिया पेहला दर्शनोअ फासाड़ी फाशीइ एक गोठ माहूं दानियेलोहो दर्शनोअ वाअहीं देखाड़्यी.2जेहेलाम आंय एलाम नावोअ होयरोअ, शूशन नावोअ राजधानीमेहें रोतुतो, तेहेलाम आंय दर्शनोमेहें देख्यो के, आंय उलय नोयीइ मेरेपोअ होय.3फाशोअ आंय नजर उसे कोइत पाल्यो, ताहां माहूं तियी नोयीइ मेरेपोअ बेन हिंगोवालो एक मेडो उबोइत देखाअयो. तियाआ बेनू हिंगे वोडे होय, पोन तियांमेहें रोत एक जाअखो वोडो होय, आन जों वोडो होय, तों बिहीराआ फासाड़ी निहींयो.4आंय तिया मेडाहा पाल्यो, तो बुट्टामाआं, पालामाआं आन देहामाआं वोल हिंग लागावेहे, आन काअलोज जनवार तियाआ आगाड़ी उबो नाहां रोत सेकतो, आन तियाआ आथोम रोत कोडो कोडाहा वासाड़ीत बी नाहां सेकतो; आन तो तियाआ इश्शाआ पुरमाणे काम कोअतु आगाड़ी जातुतो.5आंय विसारुज कोअतुतो, ताहां कि पाल्यो, के एक बोकड़ू बुट्टामाआं वोल रोत निहींत कोइत आखी धरतीपोअ एहें कोइत फिर्यू के धरतीपोअ सालीइलोअ वेले तियाआ खुर्ये ने टेकतेते आन तिया बोकड़ाआ डोआअ विसमेहें देखुहूं जोगोहो एक हिंग ओतो.6जिया बेन हिंगोवाला मेडाहा आंय नोयीइ मेरे देख्युतो तियाआ जागे तो बोकड़ू जात कोइत, तियापोअ खिजवाइत गुगदीइतुज जात टेकाऊ वोल्यू.7आंय पाल्यो के तो मेडाआ जागे आवीत कोइत तियापोअ खिजवाअयू; आन मेडाअरी टेकाइत तियाआ बेनु हिंगोहों तोड़ी देदे; मेडू बोकड़ाहा हारवित ने सेकू; ताहां बोकड़ू तियाहा पुयींपोअ पाड़ीत तुलाम कुहूंणी देदू; आन मेडाहा वासाड़ीत सेके एहेलोहो कोडोज ने ओतो.8जेहेलाम बोकड़ू जास्ती वोडाय कोउ वोल्यु, आन ताकतवालू ओवू तेहेलाम तियाआ वोडो हिंग टुटीत गोयो, आन तियाआ जागापोअ पालुहूं जोगेहे शार हिंगे निहींत कोइत शारी ओरी वादे वोल्ये.9फाशोअ तियां शारु हिंगोम रोत एक हानो हिंग निहींयो. तों देहामाआं वोल, उगतामाआं वोल आन “हाजाबी देसोअ” वोल जाअखो वादतो गोयो.10तों होरगाआ सेनाअहें जाआं वादतो गोयो; आन तिये जुगोमेर्येआ तारामेहें रोत केताहा तेबी ताराहा पुयींपोअ टाकी देदा आन तियांपोअ नासी देदो.11तों सेनाआं मुख्याआ जागे जाआं पोतीत लागो, आन तियाआ दाड़ख्याआ गाराहा कोइलोअ बोंद कोआड़्यो; आन तियाआ सोका जागाहा आरवीत टाक्यू.12आन माअहोंअ पापोअ दाड़ख्याआ गाराहाआ बोदले सेना बी तियाआ आथोम होपी देदी, आन तिये हिंगे हाजी गोठीही एकसोट्यीज आरवी देदी, आन तिये सोताआ मोनोअ इश्शा पुरी कोइत लेदी.13ताहां आंय एका जोओंहों गोगत्लू उनाअयु; फाशोअ एक सोको जोओं ओतो तिये पेल्लाआ गोगनाराहा फुशो, “दाड़ख्यीइ बली आन उजाड़ी देनारा पापोअ बाप्तिमेहें जों किबी दर्शनोम देखाअयो, तों केदिहीं जाआं सालतो रोय; मोन्ज्ये सोकू जागू आन सेनाहां गुडाआ थुड़ी सेंदीइलोअ केदिहीं जाआं सालनारो?”14“ताहां तिये माहूं कोयो, ‘जाअहूं जाआं बेन हाजार तिन होव वारी दिही ने उगेन-बुडे ताअहूं जाआं तों ओवतो रोय; तिहीं रोत सोका जागाहा सोकू कोए.’”15“ए गोठी दर्शनोमेहें पालित कोइत, आंय दानियेल, याहा समजीइलोअ कोशित कोउ वोल्यु, तेताजमेहें माटीइ रुप लेत कोइत कोडो तेबी माआं आगाड़ी उबो रोल्यो देखाअयो.16ताहां माहूं उलय नोयीमेहें रोत एका माहुंउं आवाज आयु, जो आअड़ीत कोइत कोतुतो, ‘ए गाब्रीएल, या माट्योहो ये देखल्यी गोठी समजाड़ी दे.’17ताहां जिहीं आंय उबु ओतु, तिहीं तो माआं जागे आयु; आन तियाहा आवताज आंय बित गोयु; आन निसे पुयींपोअ उठ्लीत पोड़्यू. ताहां तिये माहूं कोयो, ‘ए माहुंउं पोर्या, तुमे देखल्यी गोठीही समजीत ले, काहाके ते आखरीइ दिहोअ बाप्तिम होय.’18जेहेलाम तो माअरी गोठी कोअतुतो, तेहेलाम आंय माआं सोब पुयींइं वोल कोइत वोडी निंदेमेहें पोड़्युतो, पोन तिये माहूं आथ लागाड़ीत कोइत सिदु उबू कोअयू.19ताहां तिये कोयो, ‘आखरीइ खोत कोइलाआ दिहोमेहें जों ओवनारो होय, तों आंय ताहूं कोहो; काहाके ठरवीइल्या दिहोमेहें आखी सेवट्यीइ गोठी पुरी ओत जाय.’”20“जो बेन हिंगोवालू मेडू तुमे देख्यू, तियाआ अर्थ मादी आन फारसी एं बेन राज्ये होय.21आन तो बुराल बोकड़ू ग्रीसोअ राज्य होय; आन तियाआ डोआअ विसमेहें हिंग निहींयो, तो पेहलु राजा होय.22जों हिंग टुटीत गोयो तियाआ जागापोअ बिहीरे शार हिंगे निहींये, तियाआ अर्थ ओं होय, तिया राज्यामेहें रोत शार राज्ये बोणे, पोन तें पेल्लाआ राज्याआ होस मजबुत ने रोय.”23“तियां राज्याआ सेवट वेगुज ओवे, काहाके तें जास्ती खाराब ओत जाय, तेहेलाम एक जिद्दी, पापी आन धोकू देनारु राजा उठे.24तियाआ सेक्ती वोडी रोय, पोन तिया पेल्लाआ राजाआ होस ने रोय; तो निस्तु जुदे माहें माएं, आन जिकीत कोइत काम कोअतु रोय, ताकतवाला आन सोका माअहोंअ टोलाहा आरवी देय.25तियाआ हुशारी वाअहीं तो जिकीत जाय, आन तो मोनोमेहें वोडाय कोइत वारुज माअहोंहों आरवी देय. तो वारुज अधिकाऱ्योअ विरुद्दामेहें उबु रोय; पोन सेवटी तो माहुंउं आथ ने लागे तेहेंज मोइत जाय.26हांजेए वेले आन वेगीइ वेले जों किबी तुमे देख्यो आन होंबल्यो तों खोरो होय; पोन जों किबी तु दर्शनोमेहें पाल्योहो तियाहा निकाड़ीत मिकजी, काहाके तो वारुज दिहोअ फासाड़ी पुरो ओवनारो होय.”27“ताहां आंय दानियेल, आंय लुलू ओत गोयू, आन आंय थोड़ाक दिही जाआं बिमार पोड़ीत रोयु, ताहां आंय उठीत कोइत राजाआ कामकाज फाशुउ कोउ वोल्यु; पोन जों आंय पाल्यो तिहीं वाअहीं बोगलात गोयू, काहाके तिया होपनाआं अर्थ समजाड़नारो कोडोज ने ओतो.”
The Word for the World International