Romans3
1Iciucai Jewme da daipai kentwage bamno? Mede hegeukerum pe kemmi daino?2Cide maleu lamde disüt. Kedanemene keraibe, Tinggwang keuliakegai pelane de penuide nlumbeu.3Ciude magade Jewme kangge kenlum gahcai? Penui nlum kemakne Tinggwang masang de teinggah dizie ni?4Peu madaude ciciu di helo. Meliene, peu Tinggwang de samsang kelube tei lulo, mina leune mretdi liede. Kesanglaisiu ga raupwa kelanzwa, “Nnui samdung gade nnui masang kela keulialu kerane, nah nnui tutiak ga kegwangdau nnui cikade ngkienglu kerane.”5Dede magade anui masang kemak dene Tinggwang masang keuliacai, anui dai ranglu laino? Tinggwang pe lunghop keu kegwang ziemne masang melie zieni? (Ih au mina kesamlim kecu zai gade rangbam.)6Peu madaude ciciu di helo! Kedanemene iciucai dainzwa Tinggwang kideube tutiak laino?7Dede magade Tinggwang kesamsang a kemret gade ketwa pwalia gwa lula liecai, daitie cude acu kemaume ge nzwa mmaula reuno?8Daitei rang melai, “Anui kesia tei gaigo, iciu eh keyi gwanglu kerane?” Anui cide ranglie eh pau maugai kebeu nzwa, nah mikangge anui, cide rangla lie kecunzwa. Penuide mmau kecude au petau.9Iciucai dainzwa eh no? Anuikatei anui nzeu rangla ni? Ci au mezing. Kedanemene anui Jewme de nah Greekme de, penui pelane, kemau kangga kelane mmau dida.10Aide nzwa Kesanglaisiu ga rauteula: “Migede masang kecu gah, hange de gah.11Macet kecime migede gah. Tinggwang de peeikelame migede gah.12Penui pelane nreutet dida. Penui pelane nzang eh kemta ge dida. Migede keyi keteime gah da, hange de gah.”13“Penui rwak au herau ngkeipwa kebam ge. Penui mleu au mide cwa dida. Henei hering penui muileu kangga la.”14“Penui mui au reset nah keka samle puila la.”15“Penui pi hejai teilwa kera nzetsüt la.16Kekap nah keherei penui lampuidung ga la.17Penui kezuyi lampui gede cima.”18“Penui miak dwaga Tinggwang mie kehing gede lama.”19Cu hezaibe ne kerang keheibe de anui ci luda, cide hezaibe kangga kelame de rangla. Aide peu mi pelane mui ngkuidi kerane, nah kideu pelane de Tinggwang tutiak gage ngngwa gwang gailu kerane.20Aide au kedanemene pe dwagade pumteihbe migede hezaibe batadung gade tei masang gailak. Kedanemene hezaibe gade kemau maci gwang lalu.21Dede cu au hezaibe si mene Tinggwang masang de peu ci luda. Hezaibe nah caihakecime ne cide zierang teigai da,22cide cai, Tinggwang masang gade Jisu Khrista de kenlumme leune de tei masang luda. Kedanemene cika migede ketsam gah.23Kedanemene mina pelane kemau tei dida nah Tinggwang kendube dwade dui dida,24nah pe ngaugia mta kepeu Khrista Jisu da kebam rikelu dene penuide tei masanglu.25Kedanemene Tinggwang Khrista Jisu de ratak ge tei eh langgai, pe jai lwakegai gade nlumkelume de rilu kerane. Pa Khrista de kaipwa pe masang keulia gai, pa ndaa kemau dungde nsungdai kemak ziemne26Tinggwang pelung ketiene. Aide pekiene teikegai au cu ting ga pe masang keulia gailu kerane, iciude pa masanglu kerane nah Jisu de nlum kelume de tei masang beulu kerane.27Iciucai ngang kecu daiga bamno? Cide ncüt meni. Daipai sap gade no? Bata gade ni? Melie, dede nlumkelu sap gade lie.28Cine anui kekambe cetkelu au, mige de hezaibe tadung gade mene kenlum gade tei masang lula.29Mede Tinggwang au Jewme gu Tinggwang rünne ni? Pa Gentileme Tinggwang de si meni? Yeo, Gentileme gu de si.30Magade, Tinggwang au ket lie kecu kesang liecai, pa hegeukerumme de kenlum gade, nah hegeurum kemakme de kenlum gade tei masang beuzie.31Ciucai anui kenlum gade hezaibe de gidi zieni? Peu madaude ciciu di helo! Meliene, anui kenlum bam kecude ne anui hezaibe teicang lula.
Bridge Connectivity Solutions Pvt. Ltd.