1 TIMOTE2
Obuɛɛn me ndɔɔ a baal bueel
1Ke nkwel ãndɔɔ mbueel, mɛ̃ ngwi luo wɛn baal asɔɔ ola Nziã, abuɛɛn, aluɔɔn bvool abveel ndɛ ãtuɛɛn, me ndɔɔ a baal bueel.2Ebvaan abuɛɛn me ndɔɔ akwɛn ye bueel b'ali y'omfam. M'emfa okyɛ, bia-byɛ èkal y'omwiĩ bo onse opi bvool y'ɔ̃lii, onse dzuun lueel y'okuru o nzuru yueel me Nziã.3Oyɔ ndɔɔ yi ngesɛ bvool yi edzii Nziã wu Ɔ̃mvuul a bia-byɛ.4Ndɛ wu odzii kwɛn baal bueel abvuul bvool ayɛɛ otaa-taa.5Ke ngwel wɛ, Nziã oli kɛn a ngɔmɔ̃, ɔ̃mveel ondoo mpɛɛn-a-mpɛɛn Nziã ye baal eli kɛn a mbuul ngɔmɔ̃, mbuul ondɛ Yeso Mãsia.6Ndɛ wu Yeso wu áwi elaã a ndyam onge ɔ̃bvɛn wu afuru me ndɔɔ obvuul o baal bueel. Obɔ oyɛɛn b'étsweel Mãsia me lio li éwɛɛ Nziã.7Me ndɔɔ oyɛɛn obɔ, Nziã osuul mɛ̃ ɔ̃tee bvool ntam. Ndɛ owi mɛ̃ ontam b'eyiool bɛn k'Ayuda wɛ okiool y'otaa-taa. Mɛ̃ otaa-taa eyɛɛn, mɛ̃ k'epfuru wɛ.Akaal y'abɔɔl onse Ebvɔɔn
8Obɔ otsɛn bɛn, mɛ̃ nzii kwɛn abɔɔl abuɛɛn ãmboo mbueel, andɛɛl mviɔɔl mi ngel ke ywel, mpuru pyɛ, obel hɛ̃ pyɛ.9Mɛ̃ nzii hɛ̃ kwɛn akaal alaal ekɔ m'emfa ki ngesɛ. Bɔ abvaan akal y'ɔ̃laal wa dzuun, wa m'emfa kyɛn k'ebiil ɛ̃kwal ɛ̃ baal wɛ. Abee mfu yi ke bwɛn-ke-bwɛn okuru. K'ebvaan kwɛn bɔ alaal ɛ̃luu mi ɔɔl, wuo ãlie, wuo ekɔ bvi enduru ɔ̃bvɛn wɛ.10Kɛn ebvaan bɔ asuo ompal o bɔ m'ɛ̃sal ɛ̃ bɔ mi ngesɛ. Ndɔɔ oyɔ ebvaan m'akaal b'abeyɛɛn ndiri bɔ abesa Nziã.11Ebvaan kwɛn me lio li ayiool, akaal akal pi, ye lweel lueel.12Mɛ̃ ke ngwi ɔ̃kaal nkuul yi ayiool, wuo yi anyam bɔɔl wɛ. Yɔɔl kwɛn ndɛ akal pi.13Ke ngwel wɛ, ási Ãdam ɛ̃kwel, Ebva ke mbee.14Wu ábvi onse pfuru hɛ̃, k'Ãdam wɛ, eli ɔ̃kaal wɛn ayepfuru ndɛ, ndɛ ofel ngel a Nziã.15Ke yam, ndɛ akieel abvuul ŋ'ekieel eburu ndɛ baan, kɛn obvie ndɛ otɛɛn dzu onse okiool, onse dzii, okal mbuul wu akuru nzuru me Nziã, bvool wu asa ãndɔɔ enduul pyɛ.Wycliffe Bible Translators, Inc.