O Hu-hulo'o4
1O Petrus de o Yohanes 'ayomaade-adehi de o nyawa-nyawa goona, de o imam ma hae-hae'e de ma Jou ma Dutu awi Woa ma go-goana manga baluhu, de o Sadukio'a ma ya'aino o Petrus de o Yohanesino.2Ona duru yo'itootaha hababu o Petrus de o Yohanes yotemo o nyawa-nyawa'a na'o o Yesus wohonengo'au ma 'awomomi'o'a de geena ma nyo-nyata na'o o nyawa yohone-honengo'au aha yomomi'oli.3Ho yo'itago'o o hu-hulo'o yamididi goona de yo'ihiohama o bui'a. De o wutuo'au ho ona yo'itahanu'u geena'a hiadono o dewelano aha yo'iuruhu.4Ma o nyawa nage yoihe-iheno'au o hu-hulo'o goona manga dodoto'o, manga lepe yonga'u. Ho ona 'ayodogo monga hiadono poelua yaribuhu motoa, geena aha o nau-naulu, o nge-ngewe'a de o ngoa-ngoa'a 'ayo'idoimuahi.5O dewelano de o agama'a ma ha'imi, o Yahudio'a manga balu-baluhu, de o agama'a yodoto-doto'o yomalomu o Yerusalemo'a.6Ona yomalomu de ma Imam ma Amo'o o Hanas, o Kayafas, o Yohanes, o Aleksander de o nyawa moi-moi nage manga ahala o Imam ma Amo'ino.7O Petrus de o Yohanes yo'iaha yo'ihitaali ona'a, geena'a de ona moi wohibalu-baluhu wohano, <<Cara'iau ma dodagi ngini niwihiai'i o nyawa wopa-paluga guuna? De o guata 'ianou e'ola de to nagunau awi 'uaha niodiai 'ogeena?>>8O Petrus nage o Omaha 'Iofi-ofi wiparetano wopaluhu, <<Dea-dea o Yahudio'a ma balu-baluhu, de o Agama'a ma Ha'imi!9Neena ma wange ngini nimiuruhu hababu miadiai yaowa-owa, geenala miwiduhunu womatengo wopa-paluga. De ngini niomau niana'o cara'iau hiadono o nyawa guuna 'awopalugawau,10Ho ngini, Dea-dea de moi-moi ma o Israel ma nyawa, halingou niana'o, o nyawa nuuna neena nia biono'a womahigo'ode de awi roehe 'iha-hanaanga, hababu de ma Yesus Kristus o Nazaretino awi 'uaha. Ngini niwihidelo'au o Salipo'a o Yesus guuna, duga ma Jou ma Dutu wihimomi'o'auoli.11O Yesusi'au ma dumutu o Bo'u 'Iovi-ovi ma regu'a neena itemo,<O heleo nage o woa yodi-diai 'ayapa'e-pa'ewau,Geenau idadi ma woa ma ba-bangini ma guata.>12'A o Yesus duga idadi o nyawa wohihalamata. Hababu moi-moi o dunia'a, 'a moiwa o nyawa ma homoa 'a'oiwa yama'e o 'uaha ma Jou ma Dutuno mangale 'inahihalamata.>>13Youru-uruhu yomalomu-lomuno goona yoheranga yo'ima'e o Petrus de o Yohanes 'ogeena manga mooini, 'iholoioli 'ona yana'o na'o o hu-hulo'o yamididi goona 'a o nyawa biaha, manga ha'ola 'ai'a'uliewa. Geena'a aha de yana'o na'o o hu-hulo'o yamididi goona geena yonii-nii'i o Yesusi'a.14De ona 'ao'iya-'iyawau yomaade-ade, hababu o nyawa nage wihiaio'au wopa-paluga una geena'a manga biono'a womahigo'ode de o Petrus de o Yohanes.15Ho ona yohulo'o o hu-hulo'o yamididi goona yohupu geena yo'iuru-uruhu ma ngiio'a, geena'a de ona yomahi'adibanga.16'Ona yoma'atemo onane, <<O nyawa yamididi noona halingou o'iau po'idiai? O Yerusalemo'a moi-moi yana'o'au o haala 'ihera-heranga geena ona yodiai. Ngone 'aidadiwau pohipongono geena.17Ma tanu geena 'uwau o nyawa 'ayolepe monga yoihene, ho niaino, ngone pohi'a-'amodongo de po'itaaele yamididi goona la 'uwau yomaade-ade ma ngale o Yesus 'a moi'a ma.>>18Ho geena'a de yo'iaho'o o hu-hulo'o yamididi goona yoohamoli, de de yo'itemo, <<'A ma ile ma 'aidadiwau niatehongo e'ola niodoto'o de o Yesus awi ronga.>>19Ma o Petrus de o Yohanes yopaluhu, <<Nginiou ma hirete niatibanga 'ia'aenan yadaene ma Jou ma Dutu awi biono'a: Minihimote'e to ngini, Dea-dea, nia pareta e'ola mihingounu ma Jou ma Dutu awi pareta.20Hababu ngomi ma hirete miama'e'au de mioiheno'au ho 'aidadiwa mimatogumuo miohidemo moi-moi geena o nyawa'a.>>21O Agama ma Ha'imi goona 'a moi ma 'ayodama'ewa ma hababu ma ngale yo'ihu'umu o Petrus de o Yohanes. Ho 'iholoioli yo'itaale o hu-hulo'o yamididi goona de yo'ipidilo'au, mangale yododato hababu o nyawa yolepe-lepe goona ma Jou ma Dutu wihilamo-lamo'o hababu o'iau naga ge idadio'au wopa-paluga'a guuna.22Una wopaluga 'awomaboanohi de awi umuru o taunu moruata de aha woai'i hababu o haala 'ihera-heranga.23O Petrus de o Yohanes yo'ipili de yolio manga ma-manai'a. Yai'a de yohijarita moi-moi gee o imam ma hae-hae'e de o Yahudio'a ma balu-baluhu yomaade-ade ona'a.24Manga ma-manai goona yoiheno'a geena, de ona yorimoi yohaubayanga ma Jou ma Dutu'a onane, <<Jou no'u-'uaha, ngona nohidadi o diwanga, o tona'a, o ngooto de o hagala moi-moi nage ma doda'a.25De Ani o Omaha 'Iofi-ofi, Ngona nohidemo'au ma nge'omo mia edete de mia dotumu o Daut, to ngona ani gilaongo, Ngona totemo onane:<Dodoau ho o nyawa 'a o Yahudio'awa yo'itootaha;dodoau ho o ba-bangiha yomahi'aduga yodiai 'o'iau naga gee ma faedaa 'a'oiwa?26O 'oa-'oana o dunia'a yomahidi-diai'u'au ma ngale yoparaanga,de o nyawa yola-laagomo yorimoiwilawana ma Jou ma Dutu de ma 'Oana nage Wiili-ili'io'au!>27Ho Jou, hababu ma goungu o Herodes de o Pilatus yo'itoomuo'au o nyawa nage 'a o Yahudio'awa de o Israelo'a ma ma nyawa o bendaro'a neena. Ona yomalomu ma ngale wilawana o Yesus Ani Gilaongo woofi-ofi guuna, nage ma 'Oana Nowiili-ili'o'au.28Ona yorimoi yadiai 'o'iau honaa moi-moi, nage 'a ma hilahi Ngona nohita-tapuo'au na'o geena done aha idadi. De Ngona nohitatapu geena imote'e to Ngona ma hirete Ani 'uaha de Ani mau.29Ma neena Jou, nagelelohi cara'iau ona yohi'a-'amodongo ngomino. Nimi'ulano o mooini ngomino, o nyawa nage miodi-diai o'iau ge Jou nimihulo'o ngomino, la uwa miododato miohingahu Ani demo.30Jou nimihimaitino o 'uaha ngomino de o nyawa manga panya'e 'i'ai'i de nodiai o haala 'ihera-heranga de o Du-dunguu 'ila-laagomo de o Yesus awi 'uaha, Una nage Ani Gilaongo woofi-ofi.>>31Iduangino ona yomadahaubayanga, de o ngii nage yomalomu-lomuno ge 'igiwi. Ona moi-moi o Omaha 'Iofi-ofi yo'iparetano de yomato-tomooini monga yohingahu o habari ma Jou ma Dutuno.32O nyawa yonga'u-nga'u goona moi-moi yowango 'a o hininga moi de 'a o didibanga moi. Ona'a naga 'amoiwa moi yatibanga na'o o'iau naga ge to ona geena 'a to onau. O'iau hona moi-moi ona'a naga geena yorimoi yapa'e.33De o 'uaha ma amo'o, o hu-hulo'o goona yohiha'ihii ma ngale o Yesus wowango'auoli. De ma Jou ma Dutu duru wo'ihibara'ati ona moi-moi.34De 'amoiwa moi naga ona'a yohidu'uranga hababu nagoonau de manga tona'o'a de manga woa'a, geena ikade yawu'unu manga tona'a e'ola manga woa geena, de aha ma ija geena yaaha de yo'ula o hu-hulo'i'a. Geena'a de ma pipi geena yohi'a-'ado'u 'ia'a naga ge yoparaluu.36'Ogeenali ma o Yusuf. Una ma awi tona'a wawu'unu, de ma tona'a ma ija geena waaha wo'ula o hu-hulo'i'a. O Yusuf una awi ahala o Lewino, o Siprus ma nyawa. Una o hu-hulo'o wihironga o Barnabas, ma mangariti, o nyawa wohi'u-'uata o nyawa manga hininga.
The Seed Company