Тӱҥ45
1Иосиф воктеныже шогышо тарзыж-влак ончылно шкенжым тетла кучен кертын огылат, кычкырал колтен: «Чылаштым тышеч лукса!» Кунам Иосиф иза-шольыж-влаклан кӧ улмыжым каласен, ӧрдыж еҥ гыч нигӧат воктеныже лийын огыл.2Тудо йӱкын шортын колтен. Тидым пӧлем гыч лекше египтян-влакат колыныт, да тидын нерген мут фараонын пӧртышкыжат шуын.3Иосиф иза-шольыж-влаклан каласен: «Мый Иосиф улам, мыйын ачам эше ила мо?» Но нунышт ӧрмышт дене нимомат вашештен кертын огытыл.4Иосиф иза-шольыж-влаклан каласен: «Мый декем лишкырак толза». Нунышт лишемыныт. Иосиф каласен: «Мый тендан Египетыш ужален колтымо Иосиф шольыда улам.5Но кызыт те ида ойгыро, тышке мыйым ужалымыланда ида ӧкынӧ: тендан илышдам арален кодаш манын, мыйым тендан деч ончыч тышке Юмо колтен.6Ынде кок ий мландымбалне шужымаш шога. Эше вич ий куралашат, тӱредашат огыт тӱҥал.7Тендан тукымдам мланде ӱмбалне арален кодаш да илышдам тыге ӧрыктарышын утараш манын, Юмо мыйым тышке тендан деч ончыч колтен.8Тугеже, мыйым тышке те огыл, а Юмо колтен, Тудак мыйым фараонын ой-каҥашым пуышыжлан да тудын полатыштыже вуйлатышылан шогалтен, пӱтынь Египет мландылан мыйым озам ыштен.9Ынде те ачам деке вашкерак кайыза да тыге каласыза: ”Тыйын Иосиф эргыч тыге ойла: Юмо мыйым пӱтынь Египет мландын тӧражлан шогалтен, юватылде мый декем тол.10Тый Гесем мландыште илаш тӱҥалат. Тый мый дечем тораште от лий – тый шкежат, эргыч-уныкат-влакат, тыгыде да шолдыра вольыкетат да чылажат, мо тыйын уло.11Тушто тыйым пукшен луктам, вет шужымаш эше вич ий шуйна. Тыйынат, мӧҥгысӧ-влакетынат, вольыкетынат чылажат ситышын лиеш”.12Те чыланат, Вениамин шольымат, шке шинчада дене ужыда: тендан дене мый шкеак кутырем.13Египетыште мыйын чапем нерген да тыште чыла ужмыдам ачамлан ойлыза, вара ачамым тышке вашкерак кондыза».14Ойлен пытарымекше, тудо Вениамин шольыжым ӧндалын да шортын колтен, Вениаминат тудым ӧндалын да шортын.15Иосиф тыгак изаж-влакымат ӧндал шупшалын да шортын. Вара иза-шольыжо-влак тудын дене мутланаш тӱҥалыныт.16Иосифын иза-шольыжо-влак толмо нерген фараонын пӧртыштыжат пален налыныт. Тиде увер фараоным да тудын еҥже-влакым куандарен.17Фараон Иосифлан каласен: «Иза-шольыч-влаклан ойло: ”Теве мом ыштыза: осёлда ӱмбаке [киндым] пыштыза да Ханаан мландышке каяш лекса.18Ачадамат, ешдамат пырля налза да мый декем толза. Мый тыланда Египет мландыште эн сай [верым] пуэм, те мланде лектышын эн сай саскажым кочкаш тӱҥалыда”.19Тый нунылан тыгай кӱштымашым пу: ”Тыге ыштыза: шочшыдам да ватыдам кондашлан Египет мланде гыч чапле орва-влакым налза. Кондыза шке ачадам, чылан тышке толза.20Погыдам кодаш ида чамане. Египет мландыште мо эн сайже уло – тендан лиеш”».21Израиль эрге-влак тыгак ыштеныт. Иосиф нунылан, фараон кӱштымӧ почеш, чапле орва-влакым, корнылан кочкыш шапашым пуэн.22Кажныжлан алмаштыш вургемым, а Вениаминлан кумшӱдӧ ший оксам да вич сай вургемым пуэн.23Шке ачажлан лу осёлым колтен, нуныжын тупешышт Египетыште ыштыме эн сай тӱрлӧ ӱзгар оптымо лийын. Тыгак лу ава осёлым, нунынат тупешышт ачажланак толшаш корныжлан шурным, киндым, кочкыш шапашым пыштен.24Иосиф иза-шольыж-влакым колтен, да нунышт корныш тарваненыт. Иосиф нунылан каласен колтен: «Корнышто кайымыда годым ида ӱчаше».25Иза-шольо-влак Египет гыч каеныт да Ханаан мландышке Иаков деке, шке ачашт деке, толын шуыныт.26Тудлан увертареныт: «Иосиф [эргыч] илыше, кызыт тудо пӱтынь Египет мландылан тӧра улеш». Но ачаштын шӱм-чонжым тиде увер тарватен огыл, вет тудо нунылан ӱшанен огыл.27Кунам нуно Иосифын чыла ойлымыжым каласкален пуэныт, да кунам Иаков Иосифын тудлан колтымо чапле орва-влакшым ужын, тунам веле Иаков ачаштын чонжо ылыжын.28Израиль каласен: «Мыланем тетла нимат ок кӱл: мыйын Иосиф эргым эше ила, колымем деч ончыч каем да тудым ужам».
Institute for Bible Translation, Finland