Дан1
1Иуда кугыжа Иоакимын кумшо ий вуйлатымыж годым Вавилон кугыжа Навуходоносор Иерусалим деке толын да тудым авырен налын.2Господь тудын кидыш Иуда кугыжа Иоакимым да Юмын пӧртысӧ ате-ӱзгарын икмыняр ужашыжым пуэн. Навуходоносор ате-ӱзгарым Сеннаар мландыш, шке юмыжын пӧртышкыжӧ, наҥгаен да юмыжын поянлык аралыме верышкыже пыштен.3Кугыжа Асфеназлан, шке евнухшо-влакын вуйлатышыштлан, кӱштымашым пуэн – тек тудо Израиль эрге-влак кокла гыч, кугыжа тукым да лӱмлӧ моло тукым кокла гыч, рвезе-влакым ойырен конда. Нунышт нимогай капкыл экшык деч посна, мотор, тунемаш тале, ушан да шонен моштышо, кугыжан полатыште служитлаш йӧрышӧ лийшаш улыт. Асфеназ нуным халдей йылме ден возыктышлан туныктышаш улмаш.5Кугыжа нунылан шке ӱстелже гыч кажне кечын кочкышым да йошкар аракам пуаш палемден. Тудо нуным кум ий туныкташ кӱштен, тидын деч вара рвезе-влак кугыжалан служитлышаш улыт улмаш.6Нунын коклаште Иуда тукым гыч Даниил, Ананий, Мисаил да Азарий лийыныт.7Евнух вуйлатыше нуным вес семын лӱмдаш тӱҥалын: Даниилым – Валтасар, Ананийым – Седрах, Мисаилым – Мисах, а Азарийым – Авденаго.8Даниил шке семынже шонен пыштен: кугыжан ӱстелысе кочкыш да йошкар арака дене шкемым шакшылаш ом тӱҥал. Сандене тудо, шкенжым тиде кочкыш дене шакшылаш огыл манын, евнух вуйлатыше деч йодын.9Юмо евнух вуйлатышын шӱм-чоныштыжо Даниил деке порылык ден сай кумылым шочыктен.10Тудо Данииллан каласен: «Мый кугыжа озам деч лӱдам, вет тудо шкежак тыланда мом кочшаш ден мом йӱшашым палемден. Тудо тендам иктаҥаш моло рвезе деч каҥгаракым ужеш гын, мыйым вуй деч посна кода».11Тунам Даниил эскерыше еҥлан, кӧм евнух вуйлатыше Даниилым, Ананийым, Мисаилым да Азарийым ончаш шогалтен, тыге каласен:12«Йодам, шке тарзет-влакым лу кече терге: тек тиде жапыште мыланна пакчасаска ден вӱдым веле пуат.13А вара ончал, кузе ме койына да кузе кугыжан кочкышым кочшо рвезе-влак койыт. Ужмекет, тарзет-влак дене мом ыштынет, тудым ыште».14Тудыжо тидын дене келшен да нуным лу кече жапыште терген.15Лу кече эртымеке, нуно кугыжан кочкышым кочшо рвезе-влак деч моторрак койыныт, капыштат топкатарак лийын.16Тунам эскерыше еҥ нунылан кондымо кочкыш ден йошкар аракам кораҥден да олмешышт пакчасаскам пуэн шоген.17Нине ныл рвезылан Юмо шинчымашым, возыктышлан моштымашым да мунлылыкым пӧлеклен. А Даниил эше тӱрлӧ кончымаш ден омым умылтарен моштен.18Кугыжан палемдыме жап эртымеке, евнух вуйлатыше нуным Навуходоносор деке конден.19Кугыжа нунын дене кутырен да ужын: Даниил, Ананий, Мисаил да Азарий гай нигӧ лийын огыл. Тыге нуно кугыжалан служитлаш тӱҥалыныт.20Мунлылык ден умылымашым йодшо кажне пашаште, мо нерген кугыжа нунын деч йодыштын – пӱтынь кугыжанышыште улшо юзо мунлыеҥ ден юлышо-влак деч нуно лу пачаш ушанрак лийыныт.21Даниил тушто Кир кугыжан икымше ий вуйлатымыж марте лийын.
Institute for Bible Translation, Finland