Waloma13
1Kila mundu angupalwa kuwayitikila wakulu wa silikali. kwaikiva kwahela mwenikuwesa kulongosa bila uwesa wa Sapanga, na uwesa wa kulongosa unguhuma kwa Sapanga, na wala wenikulongosa hinaa wavikwa na Sapanga.2Mweni kungingama ulongosi wa vilongosi hayu angungingama ulongosi wa Sapanga na hagha weni kughola nagha angujiyeghela ulamula mweni baha.3Kwaikiva, wandu weni kughola mahakata ndiwa weni kuwatila wala weni kuwalongosa ila wala weni gha maha wanguwatila ng'ogha vilongosi wala weni kuwalongosa, hinu ungupala kumtila ng'ogha mundu mweni kukulongosa? Ungholi ghamahala na weni watekupala na kuwayinula.4Kwaikiva weni ni watumikila wa Sapanga wangughola lihengu kwa kwaikiva gha kuwatanga mwenga baha. Ila pamghola mahakata muwatili kwaikiva weni wanguwesa kukuwanyokola mwenga. Weni watumikila wa Sapanga weni kulangiha lilaka lyaki kwa wala weni kughola mahakata.5Kwa nagha ni lasima kuwatundamila weni ulongosi, ng'ogha kwaikiva mnyokolu wa Sapanga, ila kwaikiva mngumanya yiwa mngupalwa kughola nagha.6Hai ndiwa kwaikiva mwenga mnguhipa kodi, ni kwaikiva hagha vilongosi wangutumila lipindi lyau lyogha kumtumikila Sapanga.7Mumpeghi kila mundu ghala mngupalwa kumhipa. Handa mngupalwa kuhipa kodi mhipi kodi, na ikiva usulu, mhipi usulu. Mumtundamili mweni kupalwa kutundamilwa.8Mkotoho kuwela na lideni na mundu yeyosi, ila muweli na lideni lya kupalana weka, kwaikiva yula mweni kumpala myaki, katimilisa selia.9Kwaikiva amuli hazi zya Sapanga zyeni kulonga, “Ukotoho kughola ngongola,” “Ukotoho kukoma,” “Ukotoho kuhija,” “Ukotoho kuwela na lumatamata” na amuli ghangi zyogha kwa pamonga zivikwa pamonga kuamuli hai ngulu imonga, “Yiwa umpali myako handa ujipala mweni.”10Mundu mweni kumpala myaki kangumgholela ng'ogha mahakata , hinu mundu mweni kuwapala wayaki angutimilisa selia.11Na mwenga mgholi havi, mkimanya lipindi tuwela hinaa. Lisaa lya kuyimuka kuhuma mulughonu litimila kala, kwaikiva hinaa ulokola wa twenga wapabehi nesu kupiti pala mtumbulo patukwinila.12Uhiku uyenda kala, na pamuhi kunguhika. Hinu tutaghi ghala matendu gha mlwisa na tuvali vindu vya kutovanila kumhana.13Machuwa hyogha tulikali kwa utundamilu vila ingupalwa kwaikiva tungulikala kumhana wa pamuhi, tukileka mihambu mihakata gha kulyegha nesu na ulowela, ndaka na ngongola, kutovana hilahila wifu.14Ila ngalilu gha mwenga ilongoswi na Yesu Kilisito, mkotoho kuliwachila vila mtetimilisa lumatamata lwa higha weni kuzyowelela sambi.
The Word for the World International