Luke15
1एक दिन, बड़ी चुंगी लेवे वालन आउर दोसर लोग जेकरा धार्मिक अगुवा पापी मानऽ हलन यीशु भीर ओखनी के शिक्षा देते सुने लागी आ रहलन हल।2जखनी फरीसियन आउर यहूदी व्यवस्था के गुरुअन ई देखलन तऽ ओखनी कुड़कुड़ा के एक दोसरा से कहे लगलन। ओखनी कहलन, “ई आदमी तऽ पापियन के इज्जत करऽ हे आउर ईहाँ ला कि ओखनी साथे खाना भी खा हे।” ओखनी सोचलन कि अईसन कर के यीशु अपने आप के असुद्ध कर रहलन हल।3येहिगुने यीशु ओखनी के ई दृष्टान्त बतईलन:4मान लऽ कि तोहनी में से केकरो भीर 100 गो भेड़ हे आउर तोहनी ओकरा में से एगो के भूला दे हऽ। तऽ जरुर तोहनी ऊ दोसर 99 गो भेड़ियन के जंगल में छोड़ के आउर जा के ऊ भुलायेल भेड़ के तब तक खोजते रहवऽ जब तक ऊ तोहनी के मिल नऽ जाय। 5आउर जखनी ऊ तोहनी के मिल जायेत, तऽ खुशी से ओकरा ओकर घर तक जाय लागी अपन कन्धा पर उठा लेवऽ।6फिन जखनी तोहनी घरे पहुँच जईवऽ, तऽ तोहनी अपन दोस्तवन आउर बगल में रहेवालन के बोला के कहवऽ कि, हमर साथे खुशी मनावऽ, काहेकि हमर ऊ भेड़ मिल गेल हे जौन हेरा गेल हल!7तोहनी जान लऽ कि अईसहीं, जौन स्वर्ग में हथन ओखनी के बीच खुशी मनावल जा हे जखनी एगो पापी अपन पाप से मन फिराव करऽ हे। ऊ खुशी ऊ बड़ी लोग पर करल गेल खुशी से कहीं जादे हे जौन पहिले से ही परमेश्वर के साथे सही हे आउर जेकरा पछतावा करे के जरुरत नऽ हे।8चाहे मान लऽ कि एगो औरत भीर चाँदी के दसगो दामी सिक्का हे बाकि ऊ ओकरा में से एगो के भूला देतन। तऽ जरुर ऊ एगो दीया बार के घर के भुईयाँ के बहाड़तन, आउर तखनी ला गौर से खोजतन जबले कि ऊ ओकरा मिल नऽ जायेत।9जखनी ऊ ओकरा मिल जायेत, तऽ ऊ अपन दोस्त आउर पड़ोसियन के एक साथे बोला के ओखनी से कहतन हमरा साथे खुशी मनावऽ, काहेकि हमर ऊ सिक्का हमरा मिल गेल हे जौन भूला गेल हल!10हम तोरा बतावऽ ही कि, अईसहीं, परमेश्वर के स्वर्गदूतवन के बीच में ढेर खुशी मनावल जा हे जखनी एगो पापी अपन पाप से पछतावा कर के लौटऽ हे।11फिन यीशु एगो आउर दृष्टान्त भी बतईलन, एक समय एगो आदमी हलन जिनकर दूगो बेटा हल।12एक बार एक दिन छोटका बेटा अपन बाबूजी से कहलन, 'हे बाबूजी, कृपा कर के हमरा अपन दौलत के ऊ हिस्सा के दे दऽ जेकरा हम तखनी लेम जखनी तोहर मौत होत। येहिगुने बाबूजी अपन दौलत के अपन दूनो बेटवन में बाँट देलन।13कुछ दिन के बाद, छोटका बेटा अपन सभे कुछ जमा कर के एगो दूर देश के तरफ यात्रा करलक। ऊहाँ ऊ देश में ऊ अपन समूचे धन के मूरख जईसन बेगर मतलब के आउर गलत जिनगी जीये में खरचा कर देलक। 14ऊ अपन समूचे धन खरचा कर देला के बाद, ऊ पूरा देश में ढेर भारी अकाल पड़ल। जल्दी ही ओकरा भीर जिन्दा रहे ला कुछ भी बचा नऽ रहलन।15येहिगुने ऊ, ऊ देश में रहे वाला एगो आदमी भीर गेल आउर उनका से भाड़ा में रखे ला विनती करलक। येहिसे ऊ आदमी ऊ अपन खेत में ओकरा अपन सूअर के चरावे लागी भेजलन।16ऊ एतना भूखा गेल कि ऊ, ऊ सेम के फलियन के खाय ला चाहलन, जेकरा सूअर खा हल, तईयो ओकरा खाई लागी कुछ भी नऽ देलक।17अन्त में ऊ साफ तौर से ई बारे में सोचे लगल कि ऊ केतना मूरख हल, बाद में, ऊ खुद से कहलक हमर बाबूजी के समूचे भाड़ा के दासवन के खाय लागी जरुरत से जादे भोजन मिलऽ हे, बाकि हम ईहाँ येहिगुने मर रहली हे काहेकि हमरा भीर खाय लागी रोटी भी नऽ हे!18येहिगुने हम ईहाँ से निकल के अपन बाबूजी भीर वापस जायेम। हम उनका से कहम, हे हमर बाबूजी, हम स्वर्ग में मौजूद “परमेश्वर के खिलाफ आउर तोर खिलाफ में पाप करली हे। 19हम ई जोग नऽ ही कि अब तूँ हमरा अपन बेटा समझऽ। दया कर के अपन भाड़ा के रखल दास में से एगो जईसन ही तूँ हमरा अपना ला काम करे दऽ।”20येहिगुने ऊ, ऊहाँ से निकल के अपन बाबूजी के घर वापस जाय लागी यात्रा शुरु करलक। बाकि जौन समय ऊ घरे से ढेर दूरे हल, ओकर बाबूजी ओकरा देख के ओकरा लागी ढेर दया आउर प्रेम देखईलन। ऊ दौड़ के अपन बेटा भीर गेलन आउर ओकरा अपन गला से लगा लेलन आउर ओकर गाल में चुम्बन लेलन।21उनकर बेटा उनका से कहलन, हे हमर बाबूजी, हम परमेश्वर के खिलाफ आउर स्वर्ग के खिलाफ पाप करली हे। येहिसे हम ई जोग नऽ ही कि तूँ हमरा अपन बेटा समझऽ।22बाकि ओकर बाबूजी अपन दासवन से कहलन जल्दी से जा आउर हमर सभे से बढ़ियाँ कपड़ा लेके आवऽ आउर ओकरा हमर बेटा के पेहनावऽ आउर साथही ओकर अँगुली में अंगूठी आउर गोड़ में जूता पेहनावऽ!23आउर ऊ मोटा बछड़ा के लेके आवऽ जेकरा हम खास भोज लागी मोटा करली हे आउर ओकरा मार दऽ, जेकरा से हमनी ओकरा खायेम आउर खुशी मनायेम!24हमनी के खुशी येहिगुने मनावे ला हे काहेकि हमर ई बेटा मरल आदमी जईसन हो गेल हल, बाकि अब ऊ फिनो से जी गेल हे! ऊ एगो भुलायेल आदमी के जईसन हो गेल हल, बाकि हमनी ओकरा फिनो से पा लेली हे! येहिगुने ओखनी खुशी मनावे लगलन।25जौन घड़ी ई सभे कुछ घट रहल हल, ऊ घड़ी ऊ बाबूजी के बड़ा बेटा खेतवन में काम कर रहल हल। जखनी ऊ अपन खेत के काम पूरा कर चुकल तऽ ओकर बाद, ऊ अपन घर के तरफ चल देलक। जखनी ऊ घर के सामने पहुँचल, तऽ ऊ लोग के गीत गईते आउर नाचते सुनलन।26ऊ दासवन में से एगो दास के बोल के पूछलन कि का हो रहल हे।27ऊ दास ओकरा से कहलन, 'तोर छोटका भाई घरे लौट अईलन हे। तोर बाबूजी हमरा से खुशी मनावे लागी मोटा बछड़ा के मारे ला बोललन हल काहेकि तोर भाई सुरक्षित आउर बढ़ियाँ से लौट अईलन हे।28बाकि बड़का भाई गोस्सा हो गेलन आउर ऊ खुशी में शामिल नऽ होवे ला चाहलन। येहिगुने उनकर बाबूजी बाहरी अईलन आउर ऊ भीतरी आवे लागी विनती करलन।29बाकि ऊ अपन बाबूजी के उतर देलक, 'सुनऽ! ई पूरा साल में हम तोरा लागी एगो गुलाम के जईसन सेवा करली हे। जौन कुछ भी आज्ञा तूँ हमरा करे लागी बोललऽ हम ऊ सभे घड़ी पालन करली हे। बाकि तूँ हमरा कहियो बकरी के बच्चा जेतना भी नऽ देलऽ जेकरा हम अपन दोस्तवन लागी एगो भोज के मेजवानी लागी इस्तेमाल कर सकम।30बाकि अखनी तोर ई बेटा, तोर धन के वेश्यावन पर उड़ाईला के बाद घरे वापस लौट अईलक हे आउर तूँ अपन दासवन से खुशी मनावे लागी मोटा बछड़ा के मारे ला बोललन हे!'31बाकि उनकर बाबूजी उनका से कहलन, 'हे हमर बेटा, तूँ तऽ सभे घड़ी हमरा साथे हऽ, आउर जौन कुछ हमरा ही हे ऊ तोरे तऽ हे।32बाकि हमनी ला खुशी मनावे ला आउर आनन्द रहे ला ही ठीक हे, काहेकि ई अईसन हे कि जईसन कि तोर भाई मर गेल हल आउर अब फिनो से जी गेल हे! ई अईसन हे जईसन ऊ भूला गेल हल आउर ऊ हमरा अब फिन से मिल गेल हे!
Bridge Connectivity Solutions Pvt. Ltd.