John13

1Xók achêk, kah ơi Bhiêk Jalơh, Chuôq Jê-su n'nal kơi jơ ưng Ađó ơi tơk, hơq đóng Ađó xooq tââq hóng katiêk ađô chô paleq Ama. Xók ơi nh'nhơr nôôq manưih mađó leq ađêi kalóóng hóng katiêk, nek Ađó nh'nhơr piđó đóng tơk xariêq parlưch.2Dyơq cha vaar blót, xong xók abhưi ơi tamót kalóóng lóóm Ju-đa Ich-ka-ri-ôôt, akóón padruuih ưng Si-môôn, đóng ađó baan Chuôq,3taai n'nal kơi Ama ơi pajaau kalóóng têi Ađó dyóp rau, lơq n'nal kơi Ađó bhral tââq Yaang Pleng lơq ravang val chô palơq Yaang Pleng.4Ađó yuur dyương tââq vaar cha, lôh aau nguôi. Lơq xong xók pei khan, Ađó pươr praang chak ađêi.5Xong ađek, Ađó n'toh đơơk leq bhôôk lơq tââp raau dyung ưng nôôq môôn-đô lơq dyuut góh palơq beq khan đu ađó ơi bâân pươr praang ađêi.6Kơi achêk hơq, Ađó tơk leq Si-môôn Phi-e-rơ. Phi-e-rơ móón palơq Ađó: “Chuôq ơơi, Amei raau dyung ưng aku kơi?”7Chuôq Jê-su ââi lóóiq lơq praaq palơq ađó: “Tarnêêng thêi dyơq têêng, xók đôk amei kah n'nal, bơơi tatun nôôq tarnêêng ađô amei e n'nal.”8Phi-e-rơ móón palơq Ađó: “Lalua dhakơi kah mơ chóóm amei raau dyung ưng aku.” Chuôq Jê-su ââi lóóiq ađó: “La thêi kah raau đóng amei, nek amei kah ve rau phơn palơq thêi.”9Si-môôn Phi-e-rơ móón palơq Ađó: “Chuôq ơơi, kah chapiên dyung aku giêl, hơq dyơq lưch têi lơq akoq aku dyơq.”10Chuôq Jê-su praaq palơq ađó: “Ngaai đu ơi bâân hóm aq nek yươq ve kơng kơi ađek, chapiên mưi raau dyung, dyơq ađó achêk bâân sek tabhơt, lơq adhi anó nek bâân sek bơơi eh rau tabhơt adhi anó.”11(Taai Ađó n'nal ngaai đu têêng tamôôp Ađó, taai kơi ađek Ađó praaq kơi ađô: “Eh rau tabhơt maar bâân sek.”)
12Kơi ađek, xók Ađó ơi raau dyung piđó xong lơq xơp aau nguôi ưng ađêi mót, nek Ađó tơơt chok leq lóóiq, praaq palơq piđó: “Adhi anó ve n'nal hau Aku tame têêng leq adhi anó kah?13Adhi anó đóók Aku nek ‘Thêi’, lơq nek ‘Chuôq’; adhi anó móón pâng bhlơng taai Aku alua nek kơi chêk.14Kơi achêk hơq, la Aku, nek Chuôq, lơq nek Thêi, ơi raau dyung ưng adhi anó, nek adhi anó kung phaai raau dyung ưng xóng ađêi.15Taai thêi ơi têêng xamil đóng adhi anó đóng adhi anó kung têêng i kơi thêi ơi têêng đóng adhi anó.16Alua, alua, Thêi praaq palơq adhi anó, dhơn ratơơq nek kah gamak lơh kala ađêi; đu đââng taruuih kung kah gamak lơh manưih đu kayua ađêi.17La adhi anó ơi n'nal nôôq rau ađô, nek adhi anó bâân phươk la kơi adhi anó têêng nôôq rau achêk.18Thêi kah dyơq praaq leq tabhơt adhi anó; thêi n'nal manưih đu thêi ơi chââih — bơơi đóng paraaq Bha-aar Yaang Pleng bâân tajaap: ‘Đu cha beng palơq aku hayuur takơm ađó jơl lóóiq aku.’19Tââq bhêêl ađôk, thêi praaq đóng adhi anó xók loom tarnêêng yuur vaaih, đóng xók ađó yuur vaaih, adhi anó ve chóóm huuiq kơi thêi Taluôn Ve.20Alua, alua, thêi praaq palơq adhi anó, ngaai yaauq n'đó manưih đu thêi kayua nek yaauq thêi, lơq ngaai yaauq thêi nek yaauq Yaang đu ơi kayua thêi.”
21Xók ơi praaq xong nôôq rau achêk, Chuôq Jê-su ranguôq rangóót kalóóng lóóm kanóq, hayơq Ađó đơơp n'nal lơq praaq: “Alua, alua, thêi praaq palơq adhi anó, mưi nak dhiq m'pơng adhi anó e têêng tamôôp thêi.”22Nôôq môôn-đô tarlêi xóng piđó, kah n'nal Ađó dyơq praaq ngaai leq.23Xók achêk, mưi kalóóng nôôq môôn-đô Ađó, manưih đu Chuôq Jê-su nh'nhơr, dyơq tơơt tóór baang cha, ganương leq tadhưa ưng Chuôq Jê-su.24Taai ađek, Si-môôn Phi-e-rơ kamêch đóng manưih ađô tamóh lêi, “Manưih đu thêi dyơq praaq tơk nek ngaai dhơq?”25Taai kơi achêk nek hayơq, xong xók pacheeng achak tóór tadhưa Chuôq Jê-su, manưih ađek móón palơq Ađó: “Chuôq ơơi, ađek nek ngaai?”26Chuôq Jê-su ââi: “Ađek nek manưih đu xong xók tươm paleh beng ađô, Thêi e nia ađó lơq pađơơp leq manưih ađek.” Kơi achêk hayơq, tươm paleh beng achêk xong, Ađó pađơơp đóng Ju-đa akóón ưng Si-môôn Ich-ka-ri-ôôt.27Xong paleh beng achêk, nek bhêêl ađek Sa-taan bóq leq ađó. Kơi ađek hơq, Chuôq Jê-su móón ađó: “Rau amei ravang têêng, nek têêng pađâh aq.”28(Xók achêk, kah ngaai dyơq tơơt dhiq baang chóóm n'nal taai ng'kơi Chuôq praaq palơq ađó kơi ađek.29Taai bơơr pe nak bhiêk ngóq, taai Ju-đa jư chadhung jêên, hơq Chuôq Jê-su yua ađó: “Phaai kơl nôôq rau kơng vech đóng ganah bhiêk,” môôiq buôn nh'xóóng đóng m'bưưiq ve rau leq manưih ngeeo.)30Kơi achêk nek, xók ơi đơơp paleh beng, ađó n'drươh vôôiq gluh. Xók achêk, pleng ơi blót.
31Kơi ađek, xók ađó ơi vôôiq lơh, Chuôq Jê-su praaq: “Xók ađôk, Akóón Manưih ơi bâân bhi haanh, lơq Yaang Pleng ơi bâân bhi haanh dhiq Ađó.32Hayơq Yaang Pleng e bhi haanh Akóón Manưih kalóóng chênh Ađó, lơq Ađó e bhi haanh Akóón Manưih n'drươh ađek.33Nôôq akóón paniên ơơi, thêi tơơt palơq adhi anó mơ maxưưiq dyơq giêl. Adhi anó e chêk thêi, lơq kơi thêi ơi móón palơq nôôq manưih Jo Thaaiq kơi: ‘Leq aku vôôiq, nôôq pe kah chóóm bâân vôôiq,’ xók ađôk, thêi kung praaq kơi ađek palơq adhi anó.34Thêi đóng leq adhi anó mưi gani pachóóm tame, buôn đóng adhi anó ve chóóm tanhơr xóng ađêi; kơi thêi ơi nh'nhơr adhi anó, đóng adhi anó kung ve chóóm tanhơr xóng ađêi.35La adhi anó ve lóóm tanhơr đóng xóng ađêi, nek taai ađek, dyóp nak e n'nal kơi adhi anó nek môôn-đô ưng thêi.”
36Si-môôn Phi-e-rơ móón palơq Ađó: “Chuôq ơơi, n'leq Amei vôôiq?” Chuôq Jê-su ââi bóóp ađó: “Leq aku vôôiq, xók ađôk adhi anó kah chóóm ting đuôh aku, bơơi tatun ki, adhi anó e ting vôôiq.”37Phi-e-rơ móón palơq Ađó: “Chuôq ơơi, taai ng'kơi aku kah chóóm ting Amei đuôh n'drươh bhêêl ađôk? Aku e đơơp chêt parmông aku taai Amei.”38Chuôq Jê-su ââi: “Amei e đơơp chêt parmông amei taai thêi? Alua, alua, thêi praaq palơq amei, lalua dhakơi atưưch gôông kah takar patơk xók amei dyiin thêi pe chu.”

FAR EAST BROADCASTING COMPANY

https://app.library.bible/content/15a813fef7fefb05