2 Corinthians2
1Taai aku ơi chamet lêi rau ađô nek liêm đóng chênh ađêi buôn óóq tơk palơq adhi anó machu dyơq kalóóng lóóm kanóq ka-ai ranguôq.2Ơi la kala achak aku têêng adhi anó ka-ai ranguôq, hơq ngaai nek manưih têêng đóng aku bhuui marhaal, la eh rau manưih bâân aku têêng đóng ka-ai ranguôq?3Lơq aku ơi xaraq palơq mưi rau nô kơi, buôn lơh xók bhral, aku yươq mơk pâng rau ka-ai ranguôq tââq nôôq manưih hơq đaang nek aku phaai bhuui marhaal, taai ơi patơơt rau huuiq dhiq pabhơt adhi anó kơi rau bhuui ưng aku nek rau bhuui ưng tabhơt adhi anó.4Ơi vaaih gluh tââq garnhuh nhok ranguôq pabhlơng lơq taket luônh lóóm, aku ơi xaraq đóng adhi anó, palơq bơk đơơk mat, eh rau buôn adhi anó bâân ka-ai ranguôq, bơơi nek buôn adhi anó ve chóóm đơơp n'nal lóóm tanhơr hơq aku ve đóng leq adhi anó mưi kơi xưa bhlaai lơh.5Bơơi la ngaai manưih ơi têêng ka-ai ranguôq, nek manưih ađek ơi têêng ka-ai ranguôq eh chapiên đóng aku, hơq dyơq dhiq mưi phơn n'đó ađek, praaq kơi achêk nek buôn aku yươq tagơơn ganưi haleng dhiq pabhơt adhi anó.6Tanóóm janah achêk đóng leq manưih kơi achêk tââq phơn bơk adhi anó nek dyóp aq,7kơi achêk hayơq, palâh lóóiq nek adhi anó kơng lơơi lơt lơq bhơơl pahêêl ađó ađek nek n'jang, e kakhin tơk mơ ađek tôôh, manưih kơi achêk ve chóóm bâân chip klêch kalóóng ka-ai ranguôq kuôq lalơh ưng ađêi.8Kơi achêk hayơq, aku bhơơl pahêêl adhi anó pajal lóóiq kanóq lóóm tanhơr nek palơq manưih ađek.9Alua, aku kung ơi xaraq ơi taai ađôk: buôn aku ve chóóm bâân n'nal palơq kanal lalua dhalam dhiq adhi anó, bơơi adhi anó ve xâng bóóp kalóóng dyóp rau tarnêêng môôiq kah.10Mat lââng, nek palơq manưih hơq adhi anó lơơi lơt mưi rauriq ađek, nek aku kung kơi achêk, ơi chênh tơk aku, nek palơq manưih hơq aku ơi lơơi lơt (la aku ơi lơơi lơt mưi rauriq ađek), achêk nek taai malơơi đóng leq adhi anó dhiq toom mat Chuôq Paq Manưih,11hơq đóng nôôq he yươq bâân Sa-taan kapươk, ơi eh rau nôôq he kah n'nal rau leq nôôq kanóq mangê ưng ađó.12Bơơi, lơh xók vôôiq tơk Trô-et, lơq dhơ mưi beq palóng đóng Taruuih Liêm ưng Chuôq Paq Manưih ơi bâân yuur lóng đóng aku kalóóng Chuôq,13bơơi aku ơi kah ve rau hangơơiq hangiil kalóóng lóóm karnóq ađêi, taai aku ơi kah bâân lum Tiit, manưih adhi anó ưng aku. Dhơ kơi ađek, xong xók chap yayar piđó, aku yuur vôôiq tơk Ma-xê-đoan.14Kơi achêk hayơq, ma-ơơn Yaang Pleng, nek Yaang taluôn luôn kađââng nôôq yi vôôiq tóói kơi bâân bhuui yayar kalóóng Chuôq Paq Manưih, lơq tapâng dhiq nôôq yi, yuur pakah n'naq thum leq rau bâân n'nal Ađó tơơt dyóp dhiq.15Ơi kơi palơq Yaang Pleng, nôôq yi nek n'naq thum ưng Chuôq Paq Manưih m'pơng nôôq manưih bâân paq lơq m'pơng nôôq manưih hư bil,16dhơ nek palơq nôôq manưih ađô, nek n'naq gluh tââq rau chêt buôn malóóm tơk rau chêt, bơơi nek palơq nôôq manưih lââng, nek n'naq thum yuur vaaih tââq rau mamông buôn malóóm tơk rau mamông. Ngaai dyóp praan đóng nôôq rau ađôk?17Ơi nôôq yi kah thê kơi bơk ngaai dhaloong baan paraaq Yaang Pleng taai mayưưm malơơi, bơơi kơi tââq bhơt lóóm dhalam sek chadhah, kơi ngóq tââq Yaang Pleng, nôôq yi truuih đuui toom mat Yaang Pleng kalóóng Chuôq Paq Manưih.
FAR EAST BROADCASTING COMPANY