احبار9
1ٲٹھ دوٚہہ پتہٕ أنؠ موسیٰؔ ہن اسرائیلٕکؠ زِٹھؠ ناد دِتھ۔2پتہٕ ووٚن تمؠ ہارونؔس، "اکھ دانٛد نیہ یُس ژےٚ پننیٚن گناہن باپتھ نذرانہٕ پیش ہیکھیکھ کٔریتھ تہٕ اکھ کٹھ یُس ژےٚ قربان گاہس پؠٹھ ہیٚکہ ہِن سورے زٲلتھ، یِم دوٚنوے گژھن نۅقصہٕ ورٲے آسن تہٕ کرُکھ تِم یہُوواہسؔ پیش۔3پتہٕ ووٚن تمؠ اسرائیل کٮ۪ن لوٗکن، "اکھ ژھاوُل کریو پننیٚو گناہو خٲطرٕ قربان۔ بیٚیہِ نیو کُنہِ نۅقصہٕ ورٲے اکھ وُژھ تہٕ اکھ چھرٕ، یِم توٚہؠ قربان گاہس پؠٹھ ہیکیو پوٚرٕ پٲٹھؠ زٲلتھ۔4بیٚیہِ نیو اکھ دانٛد تہٕ اکھ کٹھ یہُوواہؔ سنٛزِ سلامتی خٲطرٕ بیٚیہِ گژھِ تتھ سٟتؠ ٲٹِس سٟتؠ زیتون تیٖل رلٲویتھ نذرانہٕ تہٕ آسُن۔ یہِ کریو تکیازِ از چُھ یہُوواہؔ توٚہہِ برونٛہہ کنہِ ظٲہر سپدن وول۔"5موسیٰؔ سٕنٛدؠ ہدایات اسرائیل کٮ۪ن لوٗکن دِنہٕ پتہٕ تِمو منٛز أنؠ کینٛژو تِم چیز تہٕ سپدؠ مقدس خٟمکِس آنٛگنس منٛز جمع۔ پتہٕ آیہِ سٲری لوٗکھ نکھٕ سپدؠ یہُوواہسؔ برونٛہہ کنہِ استادٕ۔6پتہٕ ووٚن موسیٰؔ ہن، "یہِ چُھ تہِ یتھ پؠٹھ توٚہہِ یہُوواہنؔ عمل کرنُک حکم دِیتُمُت چُھ یُتھ زن تمؠ سنٛز شان توٚہہِ برونٛہہ کنہِ ظٲہر سپدِ۔"7پتہٕ ووٚن موسیٰؔ ہن ہارونسؔ، "قربان گاہس پؠٹھ گژھِ تہٕ پننؠن کٔرؠ مِتین گناہن ہنٛزِ معٲفی خٲطرٕ کر جانور سنٛز قۅربٲنی پیش۔ بیٚیہِ ان سُہ جانور یُس ژےٚ سورے قربان گاہس پؠٹھ زالہن۔ یمو نذرانو سٟتؠ بخشایہِ خدا چٲنؠ تہٕ لوٗکن ہنٛدؠ تِم گناہ یِم توٚہہِ کٔرؠ متؠ چُھو۔ تِم چیز کریو یِمن ہنٛد حکم یہُوواہنؔ توٚہہِ دِیتُمُت چُھ۔"8لہٰذا ہارونؔ گوٚو قربان گاہس پؠٹھ تہٕ کوٚرُن پننؠن گناہن ہنٛدِ خٲطرٕ اکِس ؤژھس خش۔9ہارون سٕنٛدیو نیٚچیو اوٚن تمؠ سُنٛد خوٗن اکِس بانس منٛز۔ تمؠ ترٲوؠ پننٕؠ انگجؠ خوٗنس منٛز تہٕ متُھن قربان گاہ کؠن کُنن نِشہ ہنگن پؠٹھ۔ باقی خوٗن تراون قربان گاہ کس پٲیِس تل۔10تمؠ زول چرب سُہ ہٮ۪تھ یُس بوقوچن تہٕ جگرس ؤلتھ اوس، یتھٕ پٲٹھؠ یہُوواہنؔ تمس حکم دِیتُمُت اوس۔11پتہٕ دراو ہارونؔ ڈیرٕ نیٚبر تہٕ باقی زٲجن تاتہِ باقی ماز تہٕ بستہٕ۔12پتہٕ کوٚر ہاروننؔ جانورس خش یُس سُہ سورے قربان گاہس پؠٹھ زالن وول اوس تمؠ سٕنٛدیو نیٚچیو دِیت تمس بانس منٛز خوٗن، تہٕ تمؠ چُھکھ سُہ خوٗن قربان گاہس ساروے انٛدو۔13پتہٕ دِیتُس تِمو جانور سُنٛد کٔلہٕ بیٚیہِ جانور سٕنٛدؠ ماز پھلؠ یِم تمؠ قربان گاہس پؠٹھ زٲلؠ۔14تمؠ چٔھلؠ جانور سٕنٛدؠ أنٛدرِم تان تہٕ زنٛگہٕ یِم تمؠ قربان گاہس پؠٹھ باقی جانورن ہنٛدین تانن پؠٹھٕ کنہِ زٲلؠ۔15ہاروننؔ أنؠ پتہٕ تِم جانور یِم سُہ اسرائیل کٮ۪ن لوٗکن ہنٛدِ خٲطرٕ قربان کرِہے۔ تمؠ أنؠ اکھ ژھاوج یمِس تمؠ لوٗکن ہنٛدین گناہن باپتھ خش کوٚر یتھٕ پٲٹھؠ تمؠ پننہِ خٲطرٕ ژھاوج قربان کٔرمٕژ ٲس۔16پتہٕ اوٚن تمؠ سُہ جانور قربان کرنہٕ خٲطرٕ یُس سورے زالنہٕ ییہِ ہے۔ تمؠ کوٚر تمس خش تہٕ کوٚرُن تمی اندازِ پیش یتھٕ پٲٹھؠ یہُوواہنؔ تمس حکم دِیتُمُت اوس۔17بیٚیہِ أنؠ تمؠ ٲٹِس بناونہٕ آمُت نذرانہٕ تِمہِ منٛزٕ تُجِن اکھ موٚٹھ تہٕ زٲجِن قربان گاہس پؠٹھ تِتھے پٲٹھؠ یتھٕ پٲٹھؠ تمؠ تمہِ دوٚہہ صبحس سُلے تمس جانورس کوٚر یُس تمؠ قربان کوٚرمُت اوس۔18پتہٕ کوٚر تمؠ دانٛدٕ بیٚیہِ کٹھٕ سُنٛد اکھ نذرانہٕ اسرائیل کٮ۪ن لوٗکن ہنٛزِ یہُوواہؔ سنٛزِ سلامتی خٲطرٕ پیش۔ ہارون سٕنٛدیو نیٚچیو دِیتُ تمس بانس منٛز خوٗن چھکن قربان گاہس ژواپٲرؠ۔19مگر تمؠ تُل دانٛدٕ تہٕ کٹھٕ سُنٛد چرب لٔٹین ہنٛد چرب ہٮ۪تھ یِم تمؠ تِمن شانن پتہ کِنؠ ژٹہ بیٚیہِ سُہ سورے چرب یُس بوٚقوچین تہٕ کرینہٕ مازس ؤلتھ اوس۔20تمؠ تھوؠ تِم تان جانورن ہنٛدین سینن پٹھٕ کنہِ تہٕ واتنٲین قربان گاہس پؠٹھ زالنہٕ باپتھ۔21موسیٰؔ سٕنٛدِ حکمہٕ مطٲبق تُلؠ تمؠ تِمن جانورن ہنٛدؠ سینہٕ بیٚیہِ کنگو یہُوواہسؔ برونٛہہ کنہِ ہیٚور کُن یہِ ہاونہٕ خٲطرٕ زِ تِم دوٚشوے جانور ٲسؠ یہُوواہؔ سٕنٛدؠ۔22ہاروننؔ تُلؠ پتہٕ لوٗکن کُن پننٕؠ اتھٕ تہٕ یہُوواہسؔ منٛجِن تہنٛدِ خٲطرٕ برکت۔ سارنےٕ نذرانن ہنٛز کٲم مکمل کٔرتھ ووٚتھ سُہ قربان گاہ پؠٹھ بوٗن۔23ہارونؔ تہٕ موسیٰؔ سٕپدؠ تمہِ پتہٕ مقدس خٟمس منٛز دٲخل۔ ییٚلہِ تِم کینٛژِ کٲلؠ تمہِ منٛز نیٚبر درایہِ تِمو منٛج یہُوواہسؔ لوٗکن ہنٛدِ خٲطرٕ برکت۔ تہٕ اچانک سُپد تمام لوٗکن پؠٹھ یہُوواہؔ سُنٛد جلال ظٲہر۔24یہُوواہسؔ سٕنٛدِ طرفہٕ گوٚو نار اظہار تہٕ قربان گاہس پؠٹھ زٲلین سارے قۅربٲنیہِ چرب ہٮ۪تھ۔ ییٚلہِ ساروے لوٗکو یہِ وُچھ تِمو دِژِ خوشی سٟتؠ کرؠکہٕ تہٕ یہُوواہسؔ عبادت کرنہٕ خٲطرٕ تراوکھ زمیٖنس پؠٹھ سٔجدٕ۔
Bridge Connectivity Solutions Pvt. Ltd.