Ditrọnọmi7
Ubịne mme Idịd Nsio
1Abọọñ Abasi ndufo amaiben ndufo ika isọñ a-ndufo eyemme edidʌk anyʌñ abịn mme uwak idịd asio: mbon Hed, mbon Keekasi, mbon Amọọ, mbon Kenan, mbon Peris, mbon Hif ye mbon Yebus, idịd itiaba ekponno enyʌñ enie adudu ikan ndufo2ndin Abọọñ Abasi ndufo amaayaak ammọ isịn ndufo ke ubọk, ndin ndufo ekan ammọ, ana ndufo esobo ammọ afịd-afịd. Ikiidʌk edioomo ndomokeed ye ammọ, ikiinyʌñ itua ammọ mbọm.3Ikiidudọiyọ ke atu ammọ. Ikiiyak nditọ ibaan ndufo edọ nditọ ideen ammọ, ikiinyʌñ idọ nditọ ibaan ammọ inọọ nditọ ideen ndufo,4sia ammọ eyaenam nditọ ndufo ewọññọ ekpọñ adiñkpono miin ekappa ekpono mme abasi mfen, ndin iyadesịd Abọọñ ayaafiop ye ndufo anyʌñ isobo ndufo usọp-usọp.5Se ana ndufo enam ammọ ado ami: Ibom mme akpokoro uwa ammọ, ibom ndisana itiad ammọ, ikpeeñe mme abai Asera ammọ inịm ke isọñ inyʌñ ifọp mme usọsọi ñkpọ ammọ ke ikañ.6Sia ndufo edo adisana ibon enọ Abọọñ Abasi ndufo. Abọọñ Abasi ndufo imek ndufo ke atu afịd mme awo ke iso isọñ nọ ndufo edo asaña-asaña ñkpọuto amọ.7Abọọñ ikimaaha ndufo inyʌñ imek ndufo sia emaewak ekan mbon mfen, sia ndufo ekesịp ekan ke atu mme idịd mfen.8Ado akedo sia Abọọñ amaima ndufo anyʌñ anịm enwọñọ a-anye akenwọñọke anọ mme eteete ndufo anam anye akisio ndufo ke akpọsọñ ubọk anyʌñ ifak ndufo asio ke isọñ ufʌn, asio ke adudu Fero adidem Iyib.9Idiọọñọ ndin ke Abọọñ Abasi ndufo ado Abasi; anye ado anam akpanikọ Abasi, anịm edioomo ima amọ tutu mme emana tọsịn mbon e-emaaha anye enyʌñ enịm mme mbed amọ.10Adombon esuaha anye, anye ayaasio ammọ utịb ke iso ammọ ke nsobo;Anye idiikpeeneke adisio usiene ye mbon e-esuaha anye ke iso ammọ.11Ke ntoro, ikpeme inyʌñ ikịt ke emenịm mme item, mme ewʌhọ ye mme mbed a-ami inọọhọ ndufo mfịn ami.12Adieke ndufo ekpañña utọñ enọọ mme mbed ami enyʌñ ekpeme adinam ammọ, Abọọñ Abasi ndufo ayaanịm edioomo ima ye ndufo, kpa naña anye akenwọñọ anọ mme eteete ndufo.13Anye ayaima ndufo anyʌñ idiọñ ndufo anyʌñ anam ndufo etọt ke ibad. Anye ayaadiọñ mfịd idịb ndufo, ñkpọ inwañ ke isọñ ndufo, abakpa ndufo, ufa ukọd ye adan ọlif, mme ñyịn enañ ke atu udịmenañ ndufo ye ñyịn edọñ ke atu udịmedọñ ndufo ke isọñ a-anye akenwọñọke anọ mme eteete ndufo adinọ ndufo.14Eyaidiọñ ndufo ekan afịd mbon mfen; ibaaha awo ke atu ideen me ibaan ndufo a-adiido ada, inyʌññọ iba ufene ndufo i-imiiduakka inie ñyịn.15Abọọñ ayaanam ndufo ebọkkọ afịd udọñọ. Anye idiiyakka ndiọi udọñọ isịm ndufo. Anye idiiyakka mme ndiọi udọñọ a-ndufo ekediọọñọke ke Iyib isịm ndufo, ado anye ayaanam mme ndiọi udọñọ ado abịne afịd mbon se isua ndufo.16Ana ndufo esobo afịd mbon se Abọọñ Abasi ndufo isịn ndufo ke ubọk. Ikiitua ammọ mbọm ikiinyʌñ ikpono mme abasi ammọ, sia adiido ñkpọ ñkpahaukod inọ ndufo.17Ndufo emekeme ibo idem ndufo ete, “Mme idịd emi e-ekop uko ikan ñnyịn. Ñnyịn idiinam die ibịne ammọ isio?”18Ado ikiibaak ammọ; itoiyo se Abọọñ Abasi ndufo akenam Fero ye afịd Iyib.19Ndufo emaekịt ke anyen ndufo mme akpọsọñ idomo, mme idiọọñọ ye mme utịppeñkpọ, ye akpọsọñ ubọk ye edinyan ubọk, A-Abọọñ Abasi ndufo akedatta isio ndufo. Abọọñ Abasi ndufo ayaanam ukem ado ye afịd mbon a-ndufo efegheke idahami.20Ke aboiyoke ado, Abọọñ Abasi ndufo ayaadọñ ataad abịne ammọ tutu mbon se idu uwem e-edịbeke ke iso ndufo ekpañña.21Ikiifeghe ammọ, sia Abọọñ Abasi ndufo, a-abaaha ke atu ndufo, ado ekamba ye anie ndịk Abasi.22Abọọñ Abasi ndufo ayaabịne mme idịd ado usʌk-usʌk asio ke iso ndufo. Idiifọnnọ ndufo edibịne ammọ nsịññe akañ keed, imiidooho ntoro mme ndiọi unam eyaikanna ndufo ekʌk.23Ado Abọọñ Abasi ndufo ayaayaak ammọ asịn ke ubọk ndufo, asịn ekamba ndutịme ke atu ammọ tutu esobo ammọ.24Anye ayaayaak ndidem ammọ isịn ndufo ke ubọk, ndin ndufo eyaesọọk anyịñ ammọ esio ke iso isọñ. Awo ndomokeed idiikanna ndufo; ndufo eyaesobo ammọ.25Ana efọp mme usọsọi abasi ammọ ke ikañ. Ikiisịn anyen ke mme silfa ye kold ke idem ammọ, ikiinyʌñ idat mme ñkpọ ado inọọ idem ndufo, imiidooho ntoro ayaado ñkpọ ñkpahaukod inọ ndufo, sia ado mbubiam ñkpọ anọ Abọọñ Abasi ndufo.26Ikiidat mbubiam ñkpọ isịn ke ufọk ndufo, imiidooho ntoro, ndufo ye ñkpọ ado, eyaekịt nsobo. Idat anye nte ataa mbubiam ñkpọ, inekke isua anye, sia esosio anye enịm enọ nsobo.Biblica, Inc.