Akpa Ñwed Yọọn5
Mbuọdidem ke Ayịn Abasi
1Afịd awo se inịm ke Yisọs ado Krais, ado se Abasi abon, ndin awo akeedodo a-amaaha ete ama ayịn amọ ñko.2Ntom ke ñnyịn idat idiọọñọ ke ñnyịn imima nditọ Abasi, ke ñnyịn adima Abasi, ñnyʌñ nnịm mme mbed amọ.3Ke akpanikọ, ima Abasi ado adinịm mme mbed amọ. Ndin mme mbed amọ idoppoke,4sia, afịd awo se Abasi abon e-ekan ederimbod. Mbuọdidem ñnyịn ado adikan a-kanna ederimbod.5Anie ndin ado awo a-akanna ederimbod? Ibọhọke anye a-anịmme ke Yisọs ado Ayịn Abasi.6Ami ado anye a-akesañake ke mmọọñ ye iyiib adi, kpa Yisọs Krais. Anye ikisañake ke mmọọñ ikpọọñ idi, akesaña ke mmọọñ ye iyiib. Ndin Sịbidịd ado anditie ntiense, sia Sịbidịd ado akpanikọ.7Ntiense ita eba:8Sịbidịd, mmọọñ ye iyiib, ndin naña ita ami etañ uyio keed.9Ñnyịn imibọ ntiense awo, ado ntiense Abasi akpon akan sia ami ado ikọ ntiense Abasi, a-anye atieghe abaña Ayịn amọ.10Awo akeedodo a-anịmme Ayịn Abasi ke akpanikọ a-anie ikọ ntiense ami ke esịd amọ. Awo i-imiinịmme anye ke akpanikọ, a-anam Abasi ado asʌhọ nsu, sia anye imiinịmme ikọ ntiense a-atooho inua Abasi a-abañake Ayịn amọ ke akpanikọ.11Ikọ ntiense ami ado ami: Abasi inọ ñnyịn nsi-nsi uwem, uwem ami anyʌñ aba ke Ayịn amọ.12Awo akeedodo a-anieghe Ayịn, anie uwem; awo i-imiinieghe Ayịn Abasi inieghe uwem.Akpatre Ikọ
13Ami ñwet mme ñkpọ ami inọ ndufo e-enịmme anyịñ Ayịn Abasi ke akpanikọ nọ ndufo ediọọñọ ke mmimọ iminie nsi-nsi uwem.14Uko a-ñnyịn inieghe adisaña ñkpere Abasi ado ke adieke ñnyịn ibeeñeke ñkpọ akeedodo asañake akekem ye uduak amọ, anye ayaanam.15Ndin adieke ñnyịn idiọọñọke ke anye a-akop mme ebeeñe ñnyịn, se ibebịp, ñnyịn imidiọọñọ ke ñnyịn imibọ se ibeeñe.16Adieke awo ndomokeed akịtte ayịnete amọ naña anam idiọọkñkpọ i-imiisuuhọke ke ñkpa, yak anye abọñ akam abo Abasi anọ anye uwem. Ami ntañ mbaña idiọọkñkpọ i-imiisuuhọke ke ñkpa. Idiọọkñkpọ a-asuuhọke ke ñkpa mmọdo. Ami ndiyakka ebọñ akam ebaña anye a-asuuhọke ke ñkpa.17Afịd nnamndue ado idiọọkñkpọ, ado aba idiọọkñkpọ i-imiidooho idiọọkñkpọ a-asuuhọke ke ñkpa.18Ñnyịn imidiọọñọ ke awo akeedodo A-Abasi abonno ikemeke ika iso ke idiọọkñkpọ. Ayịn Abasi a-akebonno ado andikpeme ammọ, ndin andidiọọk ikemeke inam anye idiọọkñkpọ.19Ñnyịn imidiọọñọ ke ñnyịn ido nditọ Abasi ñko ke afịd ñkpọ ke iso isọñ asịne ke ukara andidiọọk.20Imidiọọñọ ñko ke Ayịn Abasi a-adi anyʌñ inọ ñnyịn ifiọk nọ ato do ñnyịn ikan idiọọñọ anye a-adooho akpanikọ. Ndin, ñnyịn idʌñ ke andido akpanikọ, kpa ke Ayịn amọ Yisọs Krais. Anye ado Abasi akpanikọ ye uwem nsi-nsi.21Mme ndima nditọ, isịññe idem ndufo ikpọñ ukpono ndem.Biblica, Inc.