Akpa Ñwed Krọnikịd26
Mme Akpeme Inuaatob
1Ikpeghe ekebakkake mme akpeme inuaatob:Tọọñọ ke mbon Kora: Meselemia ayịn Kore, keed ke atu nditọ ideen Asaf.2Meselemia amaanie nditọ ideen: Sakaraiya akedo akpa ayịn, Yediayel ado udiana, Sebadaiya ado ayọhọ ita, Yatniel ado ayọhọ inaañ,3Elam ayọhọ ition, Yehohanan ayọhọ itiokeed ndin Eliehoenai ado ayọhọ itiaba.4Obed-Edom ñko amaanie nditọ ideen: Semaiya akedo akpa ayịn, Yehosabad ado udiana, Yoa ado ayọhọ ita, Sakaa ado ayọhọ inaañ, Netanel akedo ayọhọ ition,5Amiel ado ayọhọ itiokeed, Isaka ayọhọ itiaba ndin Peuletai ado ayọhọ itiaita. (Sia Abasi amaadiọñ Obed-Edom.)6Semaiya ayịn Obed-Edom amaanie nditọ ideen, e-ekedoññoke mme adaiwuod ke ubon ete ammọ sia ammọ ekedoñño ideen se inie ukeme.7Nditọ ideen Semaiya: Otni, Refeel, Obed ye Elsabad; mme nditọete amọ Elihu ye Semakia ekedoñño ñko ideen se inie ukeme.8Afịd ami ekedoñño ntịppe ubon Obed-Edom; ammọ ye nditọ ideen ammọ ye nditọete ammọ emaenie ukeme ye adudu adinam utom, ntịppe mbon ubon Obed-Edom ekedo awo ata mme iba ke afịd.9Meselemia amaanie nditọ ideen ye nditọete, e-ekedooho mme akop idem ideen duob mme itiaita ke afịd.10Hosaa awo Merari amaanie nditọ ideen: Akpa Simri (akpesʌkado anye imiikidooho akpa ayịn, ete amọ amaamek anye nte akpa),11Hilkia udiana, Tabalia ayọhọ ita ndin Sakaraiya ayọhọ inaañ. Nditọ ideen ye nditọete Hosaa ekedo duob mme ita ke afịd.12Mme ikpeghe mbon ukpeme inuaatob ami, a-atooho mme adadusʌñ ammọ, emaenie mme ubiọñutom adinam ke tembịd Abọọñ, ukem naña nditọete ammọ ekenie.13Ekesịn afia enọ afịd mme inuaatob keedekeed, akeene mme ubon ammọ, etʌk ye ikpọ ukem-ukem.14Afia ukpeme inuaatob ñkañ usakkautịn akeduọ anọ Selemia . Ndin emaesịn afia enọ ayịn amọ Sakaraiya, awo aniọñ, anọitem, ndin afia ake Inuaatob Adoro-adoro amaadʌk anọ anye.15Afia ñkañ Inuaatob Usuuk-usuuk amaadʌk anọ Obed-Edom, ndin afia ufọk ñkpoduoho amaadʌk anọ nditọ ideen amọ.16Afia mbeñ ñkañ Inuaatob Usobutịn ye Inuaatob Saleked ke anyọñ anyọñ efaak amaaduọ anọ Supịm ye Hosaa.
Mbon ukpeme emaenyʌñ eba ke itie ukpeme:17Mbon Lifai itiokeed ekeba ke ñkañ usakkautịn kwa usen, inaañ eba ke ñkañ adoro-adoro kwa usen, inaañ ñko eba ke ñkañ usuuk-usuuk kwa usen ndin iba ke ini keed eba ke ufọk ubonoñkpọ.18Amaado esob ñkañ usobutịn, inaañ ekeba ke usʌñ ndin iba eba ke esịd esob.19Mme ikpeghe e-ekebañake mme akpeme inuaatob e-ekedooho ntịppe ubon Kora ye Merari ekedo ami.
Mme Akamaakʌk ye mme Adaaha Mfen
20Emọ-emọ mbon Lifai ammọ ye Ahiya ekedoñño mbon se ikise ñkpọ ibaña itie unịm akʌk ye mme inie ufọk Abasi ye itie ubono mme asaña-asaña ñkpọ emaekediọñ.21Mme ntịppe ubon Ladan, e-ekedooho mbon Kesọn eto ke Ladan ñko e-ekedooho mme adaiwuod ufọk a-akenieghe Ladan awo Kesọn, ekedoñño Yehieli,22nditọ ideen Yehieli, Setam ye ayịneka amọ Yuel. Ammọ ekese ñkpọ ebaña mme itie unịm akʌk ke tembịd Abọọñ.23Tọọñọ ke ubon Amram, mbon Isaa, mbon Hibrọn ye mbon Usiel:24Subeel, awo ntịppe ubon Kesọm ayịn Moses, akedo adaaha akeseeghe ñkpọ abaña mme itie unịm akʌk.25Nditọete amọ e-eketooho Eliesa: Rehabia ayịn amọ, Yesaiya ayịn amọ, Yoram ayịn amọ, Sikri ayịn amọ ye Selomid ayịn amọ.26(Selomid ye nditọete amọ ekedoñño mbon se ise ñkpọ ibaña mme ubeed itie unịm mme ñkpọuto ake Adidem Defid amaakediọñ ye mme adaiwuod ufọk ekedooho mme adaiso ekọñ ke mme tọsịn (1,000) ye mme adaiso ekọñ ke mme ikie (100), ye mme adaiso ekọñ mfen.27Ubaak ñkpọ mbịme ekọñ ammọ emaeyaak enọ adiben ñkama ndiọñ itie tembịd Abọọñ.28Ndin afịd ñkpọ se Samwel abia ñkukịd akediọñ ye Sọọl ayịn Kisi, Abna ayịn Nee ye Yoab ayịn Seruya, ndin ye afịd mme asaña-asañañkpọ mfen e-ekenịmme akeba ke idak ukpeme Selomid ye nditọete amọ.)29Tọọñọ ke mbon Isaa: Emaenọ Kenania ye nditọ amọ ideen mme ubiọñutom a-mmiidooho ke itie tembịd, nte mme adaaha ye mme abiideikpe ke Isrel.30Tọọñọ ke Hibrọn: Hasabaiya ye nditọete amọ mme akop idem ideen ikie itiaba (700) ekese ñkpọ ebaña Isrel ñkañ edem usobutịn Yọdan ke afịd mme utom Abọọñ ye utom adidem.31Amaado mbon Hibrọn, Yeria akedo abọọñ ammọ akeene se ekewet ke ñwed ntịppe emana ubon ammọ. (Ke ayọhọ isua aba ake Defid akedaaha ukara emaeduuñọ mme ñwednnịm ikọ, ndin emaekịt mme akop idem ideen ke atu mbon Hibrọn ke Yasa ke Kilied.32Yeraiya akenie nditọete ikie edịb mme itiaba (2,700), ekedooho mme akop idem ideen ye mme adaiwuod ufọk, ndin Adidem Defid amaasịn ammọ adise ñkpọ mbaña mbon Rubịn, mbon Kad ye ubaak esiin Manase ke abaña afịd ñkpọ se ikibaña Abasi ye se ikibaña adidem.)Biblica, Inc.