1 PETELO2

Kûkûla mu mwanda gwa Kabesha Mpûngû

1Kwanansho muleke bûbê bonse, bumpi, nfika; bûkwa no mianda gya kwambêlêsha nagikabiko byonka,2nagwe nansilya baana balûkeke, mube no kiwêwê kya kwikubila mabele gasoga ga mwanda gwa Kabesha Mpûngû, kyaba kyamulê mukwikubila shamumone kûkûla no kûhandibwa.3Monka mwisambile Lusinto Lûlûmbûlûke: “Mwamona kwana Kolo wabûntû.”
4Nfulo mumugêle Kolo Yesû, gee ûbwe lipoo libengilwe no bantû mone kûgêbwa kwa Kabesha Mpûngû nibwe lisololwe nolia kitûngo kikata.5No benywe nagwe mabwe gepoo, lekela muimpwe kûba nsese gya kimutêma, no kûba bûlambwili bûlûmbûlûke, kwa kuimia milambû gya kimutêma gitabisibwe mbelê gya Kabesha Mpûngû kwa ndjêla gya Yesû Kilisitu.6Kibalo Lusinto Lûlûmbûlûke lwalisamba:“Lola nansolola bwee lya kitûngo lyandê kabêka kû Sayuni nagwe ni bwee lya enfuko;Muntû wêkelitabêsha lilyo bwee hakamona nsoni.”
7Kwamulê benywe betabêshe, bwee lilyo lyakeminyemia; mone kûbalya basi betabêshe:“Bwee lyababengile bahimpiAli bwee lya nsulo.”
8Byonka lusinto lwalisamba:“Bwe lilyo ni bwee lyakwikukala,Ntandalwala gya kûgwêsha bantû.”Balikukala kibalo habetabêshe gûlya mwanda; no ûbyo byabahangilwe kûbambêla mubambo.9Mone benywe mwimusoo gûsololwe, balambwili ba Kolo, musoo gûlûmbûlûke, bantû bage Kabesha Mpungû mwine, musololwe kûsahûla bilongwa bikata bya Kabesha Mpûngû wimitile kuima mu kidjo, wimitwelishe mumugenge gwage gûkata.10Kala benywe hamubele bantû ba Kabesha Mpûngû, mone ano benywe amwi bantû bage; kala hamumwenwe lûsa kwê Kabesha Mpûngû, mone ano walimimwena lûsa.

Bengili ba Kabesha Mpûngû

11Balûnda bane, na nimisasa benywe omwena bageni, no batini! Hano akandje, mulekele ntêma gya mubêle gyakûlwsêha mutêma.12Mube no lwendo lûsoga mubûkata mwaba shantaila, kûba no habalê kemiambêlêsha kwana mwalonga bibê banyonghone kusingûlûla bilongwa byenyu bisoga nonansho bamutûmbêke Kabesha Mpûngû sigi lya kûsha kwage.
13Nfulo mwibêke kû nsê gya kitenta kyonse kya kimuntû, kibalo kya Kolo: mukokele Kolo wêko mubêkali mukûlû,14no kûba babêkali bamwalo kwana batuminwe kwêbaûla banonga bibê, no kwêbatûmbêka bakûlonga bisoga.15Bilya Kabesha Mpûngû byale mukampwa kwana mulonge biswagale, mumone kûûta tûnya twa babidje, basi bamanya no basi basingûlûle beno maniga gabe ga bûbidje.16Mwikane bi bantû ba bwana abo; mone namukengili bwanaabo bwenyu, kubisika bûbê, nambo mwikane nagwe bengili, ba Kabesha Mpûngû.17Mwibanyemeke bantû bonse, mukampwe balûndanenyu betabêshe, mumutûmbeke Kabesha Mpûngû, mumunyemeke kolo.

Lûkêndê lwa masûsû ga Kilisitu

18Benywe bengili bamunsese mwibanyemeke no kwebakokela bakûlû benyu, bale basoga ao babe.19Mone kiyenene kwakûlêndêla masûsû gamusi bayenene, kibalo mwakampwa kumukokela Kabesha Mpûngû.20Ni ntûmbo kêê gya mwakamona kwakûlêndêla masûsû ga bûbe bwenyu? Mone ntê mwalêndêla masûsû gano kibalo mwalonga bisoga, Kabesha Mpûngû wakemia kyabûntû.21Kikyo ukibalo kya mwitilwe, kibalo Kilisitu mwine ûdjembile kibalo kyenyu, wemisigêle lûkendê kûba mulonde ngêlo gyage.22Gee halongile bûbê no mwanda gwabûbembani, hagûtegelelwe kûkania kage.23Atukilwe gee hebwêlêlêshe malûmbû; hadjembile gee hatûdjwêle, nambo ubikile lûkûdjagêlo lwege, kwê Kabesha Mpûnû, mukalululi wa sitê.24Gee mwine ûtwalile bûbê bwetû kumubêlê gwage egûlû lya mutê gwa mpênga mpêtya, tûkye kû bûbê notwêkane musitêê. Kwa kûûlwa kwage betwe twahandibwa.25Benywe mubele nagwe mikoko gisimine, mone byonka mwamwibwêlêla muempi no mulwegeleli wamitêma gyenyu.

The Word for the World International

https://app.library.bible/content/2fb0a3820c83cd7b