Aromayi4
A la aɓəma kpma Ibrahim ya dna n gaiciyaganunui
1To, yi ɓa gna ge Ibrahim, əyi zakwoyi, ɓə gye knyiɓei nu əwye ntu ɓəye ɓo a?2Ngye ɓəhnihni nu ge n atnutnui nu n Ibrahim ɓəi ɓwa ɓəgyikpmaya, akpəge wo n ɓəhoi lo ń wo ɓa gbma ntu kwo ɓo; ama toge gnyi n Shekwoyi abye m.3Nyakagyigyiyi kwa gna nge nanu a? Nge, “Ibrahim ɓə ga Shekwoyi gaiciya, jesnu aa kwo ba dna wo ge ɓəfyecezhni.”4Nsaiye, əza n wa zhni tnutnu, a ta gba wo tnutnu gyiwye ngye nyaga nu m, ama a gba wo əta nu.5Dudulonu, əza ń wo to zhni tnutnu m, ama wa kpema ń Shekwoyi nu, n wo kpma atnashekwoyi dnawoyi aɓoya nyi, a ɓa ba əwo gaiciyaga dna nge ɓəfyecezhni nu.6Dawuda ɓə da əɓo gbmanyigbmanyi nu əsa ń wo ɓə da anabəlika ɓo ntu əza ń Shekwoyi ba ɓəfyecezhni dna wo, toge ntu tnutnuzhni ɓo m:7“Anabəlikada nu n aza yiin a kwu əɓa aleifyi zo,n a kwu əɓa aleifyi pwuanya,8Anabəlikada nu n əzain Dagayi taa ba əwo leifyi tu n əwo tukwo m, kpeekpe.”9Anabəlika ɓwa ye, n ɓwasnu lo, tu ń anyaznuyi ɓo nu, kwo n atnanyaznuyii ɓədo a? Yi zhi lo yii da nge Ibrahim gaiciyaga; a ɓə la kwo ba dna wo nge ɓəfyecezhni.10A ɓə ba kwo dna wo ntu knyiɓei nu a? A ɓə ba kwo dna, ai kwu nyaznu zhni wo nu, kwo to ai zhni wo nyaznu nu ma?11A ɓə ga wo nyaznu n zhni əznù nu, tuzè ɓəfyecezhni nya, ń wo ɓə kwu zhni dna n gaiciyaga woi ye gnyi n tnanyaznui. Ntulonu nsaiye, əwo nu zhni dada aza vnyanya nya ń ɓa ga gaiciya, ama to ɓai gwo nyaznu m, nabai n a ɓaa ɓəfyecezhni ba fyi ɓa.12Nlonu, Ibrahim nu zhni anyaznui dada, toge ntu əɓa nyaznu ɓo gbmanyi m, ama ntuge ɓa znazna fyilo ń gaiciyaga apitaɓwi n əyi dada ɓə ncei, ai kpe wo nyaznu nyi.13Kwo to ɓə nyi nge ntu owa ɓo nu ń Ibrahim ɓədo n əwo aɓyii ɓə gwo ɓəgbeshi, nge wo ɓə la zhni əgwúda anyì nya m, ama dna ń ɓəfyecezhni nu ń kwo ɓe n gaiciyagai nyi.14Ntuge ngye aza yi n ɓa shi owa ɓwa nyi, əɓa nu zhni əgwúda, a gye gaiciyaga to ye n apmai lo m, jesnu ɓəgbeshi kwo la zhni ənya gbəloi,15ntuge owa ɓe n minagyi napyeii. Jesnu aba n owa to lo m, aleifyizhni to lo n ɓo m.16Ntucenu ɓəgbeshi ɓe n gaiciyagai nu, nabai n a ɓa myi a shi kwo dna n shebmyashi jesnu ń a ɓaa əkwo ɓo wnashi ga Ibrahim aɓyi vnyanya; to ɓwasnu ntu aza yi ɓo nu, n ɓa zhni owa nya nyi m, ama ntu aza yi ɓo cè, ń ɓa n Ibrahim gaiciyagai lo. Əwo nu zhni əyi dada vnyanya.17Ngye shi kwo kafyilo: “Mi la ho zhni dada abye bəgyé nya.” Əwo nu zhni əyi dada ń Shekwoyi awyeba, əza n wo n gaiciyai ga n əwo nu; Shekwoyi n wo ga afyífyiyi wyewyeyi jesnu nyi, woi yi anya ń ɓa to ɓə shnisnusnu m, ɓa kwnuɓe ngye ɓa ɓə shnisnu.18Aba n awyetu ɓəə kwu ɓwuwye shaasha, Ibrahim dna n awyetu, waa gaiciya ga, ntulonu waa zhni dada abye bəgyé nya, n ɓwasnu she a ɓəə kwu gna wo nyi, “Nlonu ń əho aɓyi ɓə kwu zè.”19Ntna kalagbagba dna ń əwo gaiciyaga, waa kpetu n kwo, kwo shikwonyi, əwo nayi ɓə gnyi ngye kwo la fyí; shikwonyi wo ɓəə kwu aye ɓwa ngye tagyi, jesnu nge Saratu aɓyimaba ɓə fyífyii ce.20Dudulonu wo to ɓə shnashna dna ń tnagaiciyaga n ɓəgbeshi n Shekwoyi ɓə shi wo nyi m, ama wa ɓwa kalá dna ń əwo gaiciyaga jesnu woi ga Shekwoyi latu.21Kwo ɓə n woi kwnuawye kwnukwnui nge Shekwoyi n ikwoi lo wa zhni əɓo n wo ɓəə la shigbe nyi.22Cenu ɓə zhni “aa kwo ba dna wo nge ɓəfyecezhni.”23Aɓədagbma, “aa kwo ba dna wo,” to ɓwasnu n əwo gbmanyi ɓo nu m,24ama ntu əyi ɓo cè, aza n Shekwoyi ɓə kwu yi kwuaje fyi n ɓəfyecezhni; əyi n yi kwu gaiciyaga fyi n wo, ń wo ɓə lá Yeisu əyi Dagayi kala ń əfyi nyi.25A ɓə la wo taya ga əfyi ntu əyi aleifyi ɓo jesnu a la wo kala n əfyi ntu əyi pmyapmya ɓo.Biblica, Inc.