1 Akworentiyi12
Zafnu anyagaga
1Nsaiye, əmi azaje azanugbai n anyikwozai, ntu n anyaga Zafnu nya ɓo, mi to ncei pmalo fya kwu zhi ntna ɓəyekpe m.2Fye kpəlo nge əsa n fye ɓə ye zhni ashnagbayi nyi, n azokwo ho, a ɓə la fye pmyiawye lo ashna aba n ɓa ta daɓo m.3Ntucenu mi ncei pma fya kwu kpe nge əzaho to lo n wo daɓo dna n Shekwoyi Zafnu, n wo gna, “Yeisu zhni knyituyi nu m.” Njesnu əzaho to lo n wo ɓa gna, “Yeisu zhni Dagayi nu m,” akpəge n Zafnu Gyigyiyii.4Anyaga lo n afyei gbowogbowo, ama Zafnu gbmanyi nu gná ɓa.5Atnutnu lo n afye-afyei gbowogbowo, ama Dagayi gbmanyi nu.6Atnutnuzhni lo n afyei gbowogbowo, ama fyi n əɓa vnyanya jesnu dna n zahozahoyi n ɓa Shekwoyi gbmanyi nu zhni tnutnu.7Nsaiye, ntu n tnutnu Zafnu nya ɓo, n zahozahoyi la gwo nyi, a n kwoi ga ntu aza vnyanya apma ɓo nu.8A ga əzaho, dna n Zafnu ɓədatnu wyemwa nya, ga əzado ɓədatnu ɓəyekpe nya dna n Zafnu gbmanyigbmanyi,9ga əzado gaiciyaganunui dna n Zafnu gbmanyigbmanyi, ga əzado anyaga kágna nya dna n Zafnu gbmanyigbmanyi,10ga əzado ikwo atuzè nya, ga əzado aɓəwowoi atnutnu, ga əzado sheɓəgwogna, ga əzado azafnu tnuya n aje, ga əzado ɓədada n anyitalai afyei gbowogbowo, dudulonu ga əzaho anyitala bmapmyi.11Zafnu gbmanyigbmanyi nu zhni atnutnu ye vnyanya, jesnu wo gná ɓa ga zahozahoyi shi wo ncei pma.Nayi gbmanyi n agai gbowogbowo
12La ɓədogbe ń nayii, kwo shikwonyi kwo zhni gbmanyi nu, ama kwo n agai fyilo n mwa bəgyé, jesnu əkwo aga bəgyé fyilo n nayi gbmanyi nu. To, kwo ɓwa wulo nlonu dna n Kirisiti.13Ntuge a ɓə zhni yi batizima vnyanya n Zafnu gbmanyi nu, nabai ya kwu zè nayi gbmanyi; kwo Ayahudiyi nu kwo Abyedo, afyenu kwo aza loloiya; jesnu əyi vnyanya a ɓə ga yi Zafnu gbmanyi nu ya sni.14Ntuge kwo nayi, a to n kwoi zhnignyi n əgai gbmanyi nu m, ama n agai n mwa bəgyé.15Nsaiye n pitabwada ɓa gna, “Ntuge mi to zhni əɓwa nu m, mi to zhni nayi nya nu m,” ntu ɓəye ɓo kwo taa kpma kwo əga zhnizhni ɓo dna n nayi m.16Njesnu n tnubwa ɓa gna, “Ntuge mi to zhni əwye nu m, mi to gyi n nayi nu m,” ntu n ɓəye ɓo kwo taa kpma kwo gyigyiɓo n nayi m.17Ngye nayi vnyanya ɓəə zhni əwye nu, a ɓə ɓa ɓwa əga ɓəwo nya n nanu a? Ngye nayi vnyanya ɓəə zhni tnubwa nu, a ye wo ənya asni n wuna a?18Ama ɓəhnihnii, Shekwoyi ɓə kwu aga kwuaje fyi n nayi, waa dəhodəhoi dna n aba n wo ɓə ncei pma kwa dna, ngye shi wo ɓə ye ɓa kwu fyi ń wu.19Ngye ɓa ɓə zhni əga gbmanyi nu, nayi ye ɓə gnyilo n nanu a?20Ngye shi kwo lo, aga n mwa bəgyé lo, ama nayi gbmanyi nu.21Əwye taa gna əɓwa, “Mi to n əho apmai lo m!” Njesnu tukwo taa gna apitabwada, “Mi to n əho apmai lo m!”22Gbowo n dəye, aga yi n ɓa fyilo n nayi n a gye nge ɓa zhni akalágbai nyi, a taa myi ntna ɓa m,23jesnu aga n yi zhninubwo nge ɓa to kwnuawye kwnukwnui lo m, yi zhni ɓa ɓo n mwamwagai. Njesnu aga n ɓa to dá awyeshi m, yi wnaɓakna n du aje,24ado ce n ɓa da awyeshi, ɓa ta ye n aknawna knyiknyii hoi n shnasnu m. Ama Shekwoyi wo la nayi yeɓədo woi ga aga mwamwa yaakwo n ɓa ɓəə gyi mwamwa əsna nyi,25nabai n a taa ɓwa ajegna dna n nayi m, ama nge n əkwo aga ɓa gye əɓa nuwna n ajei dəidəi.26Ngye əga gbmanyi gyeazhnì lo, əga dəhodəhoi gyeazhnì lo n kwnusnu n kwoi; ngye əga gbmanyi ɓwa mwamwa lo, əga dəhodəhoi nya agbmada lo n kwnusnu n kwoi.27Nsaiye, əfye nu zhni Kirisiti nayi, jesnu zahozahoyi n əfye wo zhni əkwo əga nu.28Njesnu Shekwoyi wo kwu aza fyi n Ikilisiya, kpmisnuyi atnutnuloyi, baayi asheɓəgwognayi, taayi anyawuyi, nlonu aɓəwowo, nlonu anyaga kágna nya, bmazhi nya, zokwo dna nya, n anyitala gbowogbowo nyai.29Ɓa zhni atnutnuloyi nu vnyanya? Aza vnyanya nu zhni sheaɓəgwognayi? Aza vnyanya nu zhni anyawuyii? Aza vnyanya nu zhni aɓoawowoi zhniyi?30Aza vnyanya nu n anyaga kágna nyai lo? Aza vnyanya nu daɓo n anyitalai? Aza vnyanya nu pmyi aɓəda bma?31Nsaiye fye la wyenyi dna pwawo anyaga dudui nya. A taa myi n tna yeye mNjesnu nsaiye mi ɓa du ma wu fye zokwo duduyi vnyanya.
Biblica, Inc.