VAGALATIA4
1Suwe, ndilonga ndeni, muhala peave mwana, seihela tofwauti na msutu ata ngita finu fyonda fyake.2Mwene ivecha panyi lya valelo vake vakumlolela mbaka chipindi chekivikilwe na daada vake pechifika.3Ndeni ndeni na nefwe petukali ngita vana, chipindi Kilisito peave kwacha, tukali vasutu va makani gya muinyi.4Ila chipindi kyekipangilwe na Nguluvi pechifikile, akamlagiliche Mwana vake yeakali munu ngita nefwe na akachidikile malagilicho gya Musa,5ili awese kuvakombola vala yevalongochwa na malagilicho neke nefwe tugitwe vana va Nguluvi.6Kwakuva nyenye ndi vana va Nguluvi, amulagiliche Muhe va Mwana vake munumbula chenu, Muhe yeivemba, “Aba,” Mana lyake ndi, “Daada.”7Suwe, veve semsutu kangi, ila veve ndi mwana, kwakuva veve ndi mwana dawiwanuka fyonda Nguluvi fyeavakile vana vake.8Dahila, pemukali semukumchela Nguluvi, mukali mkuvagumbanikila va valungulu se Nguluvi ndakyene.9Ila nondee, kwakuva mumchele Nguluvi awu tulonge muchelwa na Nguluvi, muwesa wuli kuwuya kangi kwa vala mihoka vahangala na vasosovafu ata kung'ang'wa kuvagumbanikila kangi?10Mwiginya lihungu mukigono na myechi na chipindi na miyaka!11Ndihogofya kuva kasi ngomi chendikagitile kwakuva lya nyenye chikali chihela kinu!12Vakolo vangu, ndikuvasuka muveche ngita nene, kwakuva nene ndivechile ngita nyenye. Semukandigitile lukani lunjanganifu.13Nyenye muchela kuva utamwa wendikali navo, nde kinu kyekinigavile muda va kuvadalikila nyenye Njowo Nofu, pamwandi.14Ata ngita pendikali mtamwa ndikavagaviye utatala, semukanibedile vala kunilema, ila mukaniwanuke ngita ndumindumi va Nguluvi, ngita fila Kilisito Yesu.15Mukahekelela, nondee luhekelelo lwenu lugehe kwiya? Ndiwesa kuvecha mswida kuva, kwa chipindi chila ngamuwesa ata kuhecha meho gyenu na kundigavila nene.16Wuli, nondee ndivechile mchwindama venu kwa kuvalongela undakyene?17Avo vawulanichi vaudesi vikela kuvakelesa nyenye, ila natilo chawo se nofu. Visaka kuvanenga na nene neke nyenye muvapulikiche vene.18Ndi unofu kuvagumbanikila vanu vangi mufinu finofu na se hela chipindi nene ndigehe pamwi na nyenye.19Vana vangu, ngita fila maye yeagehe na lusololo peigudika chipindi kya kubaba, nene ndigudika kangi kwakuva lya nyenye mbaka kyanda kya Kilisito yiwoneke mu kyanda kyenu.20Ndidoboka kuvecha pamwi na nyenye nondee, ngandiwese kulonga na nyenye kwa ufokomasi. Ndigehe na wogofi na nyenye!21Munilongele, nyenye yemusaka kuvecha panyi lya malagilicho ga Nguluvi, wuli, muchela gyegilongwa mumalagilicho?22Kwakuva isimbilwe kuva Ibulahimu akali na vana vavili, yumwi va mdala msutu na yungi va mdala yeseagehe msutu.23Ila mwana va mdala msutu akababilwe ngita vanu vangi pevababilwe na yungi akababilwe ngita Nguluvi pemjangile Ibulahimu.24Makani aga ngita mufanu, vamaye ava vavili ndi mufano va malagano gavili gegigitwe na Nguluvi na vanu vake. Hajili ndi ngita liagano lyeligitilwe na Nguluvi mukidunda kya Sinai. Liagano ilyo likavagitile vanu vaveche vasutu.25Suwe, Hajili awanine ngita kidunda kya Sinai, kyekigehe Alabuni na iwana ngita mwani va ku Yelusalemu ngita peugehe muinyi, kwakuva vana vake vagehe kuusutu mumalagilicho gyevagavilwe pakidunda Sinai.26Ila Sala, ikwima ngita Yelusalemu lya kuluhano kwa Nguluvi, ndi mdala yeagehe pekesu, mwene ndi maye vetu.27Kwakuva masimbo ga Nguluvi gasimbilwe, “Hekelele, veve yeugehe mgulumbafu, ubwate na lilumbililo kwa luhekelelo, veve seupatile lihingili lwa kubaba mwana, kwakuva vana va mdala yealekilwe ndi volofu, kuchumba va yula yeagehe na mgosi.”28Suwe, vakolo vangu, nefwe ndi vana va jangila lya Nguluvi ngita peagehe Isaka.29Ila mufigono fila, mwana yeababilwe ngita vanu vangi, akamgitiye ndeo yula yeababilwe kwa Muhe va Nguluvi, ndeni ndeni peigehe ata nondee.30Ila masimbo ga Nguluvi gasimbile liki? Gasimbilwe, “Muheche mdala msutu na mwana vake, kwakuva mwana va msutu seiwesa kuhala pamwi na mwana va yula mdala yegehe pekesu.”31Kwa ndeni vakolo vangu, nefwe sevana va mdala msutu, ila ndi vana yula mdala yeagehe pekesu.
The Word for the World International