Ediyarade22
Akpainyañ Mmọñ Uwem
1Enjel oro ama onyuñ owut mi akpa mmọñ uwem, emi emireñde nte nsem nsem akrasi, emi otode ke ebekpo Abasi ye eke Eyen Erọñ,2ndien efehe ọsuhọde ekebe ke ufọt efak akwa obio oro. Eto uwem ama ada ke ñkpakañ edem iba akpa emi, emi oñwumde mfri ikoduopeba ke isua, inikiet ke ọfiọñ; ndien mme ikọñ esie edi se edade ekọk udọñọ mme idut.3Baba ñkpọ kiet emi odude ke idak isuñi Abasi owo idikwe ke akwa obio emi.4Mmọ eyekut iso Esie, ndien eyewet enyiñ esie ke ọkpọiso mmọ.5Okoneyo ididuhọ aba, ndien mmọ idiyomke utueneikañ mme uñwana eyo, koro Ọbọñ Abasi edidi uñwana mmọ. Ndien mmọ eyekara nte ndidem ke nsinsi nsinsi.6Ndien enjel oro ama ọdọhọ mi ete, “Mme ikọ emi edi akpanikọ; owo ekeme ndibuọtidem ke esit. Ndien Ọbọñ Abasi emi ọnọde mme Asiak Uduak Esie Spirit, ama ọdọñ enjel Esie okowut mme asañautom Esie se iditibede ke esisit ini.”7Jisọs ọdọhọ ete, “Sese, Ami ñyesọp ndidi! Ọfọfọn ọnọ mme mmọ oro esukde ibuot enọ mme ntiñnnim ikọ ke esit ñwed emi!”8Ami Jọn, mma ñkop ñnyuñ ñkut kpukpru mme ñkpọ emi. Ndien ke ini ami mma ñkekure ke ndikop ye ke ndikut mmọ, ami mma nduọ ke ukot enjel oro emi okowutde mi mme ñkpọ emi ndituak ibuot nnọ enye.9Edi enye ama ọdọhọ mi ete, “Kunam ntre! Ami ndi nsaña utom kiet ye afo, ye eke mme nditọ ete fo mme Asiak Uduak Abasi, ye eke kpukpru mme mmọ emi esukde ibuot enọ mme ikọ emi esinede ke ñwed emi. Tuak ibuot nọ Abasi!”10Ndien enye ama ọdọhọ mi ete, “Kudip mme ikọ emi eyararede ke ñwed emi, koro ini emekpere emi mme ñkpọ emi ediwọrọde isu.11Yak anam idiọkñkpọ aka iso ndinam idiọk ñkpọ, ndien yak owo mbubiam akaka iso ke mbubiam esie, owo emi edide eti owo yak enye akaka iso ndinam nti utom esie, yak owo emi edide edisana, akaka iso edi edisana.”Ami ke Ndi Idibighike!
12Jisọs ọdọhọ ete, “Kpañ utọñ! Ami ke ndedi idibighike! Ami ñyeda mme utib Mi ndi ndinọ owo kiet kiet ntiene nte enye anamde.13Ami ndi Alfa ye Omega, akpatre, ntọñọ ye utit.”14Ọfọfọn ọnọ mme mmọ emi eyetde mme ọfọñidem mmọ asana, man enyene unen ndidia mfri eto uwem, ye ndibe ke mme inuaotop nduk ke akwa obio emi.15Edi mme andida ke añwa edi mme mbubiam owo, ye mme ebre idiọñ, mbon use, ye mme owot owo, ye mme mmọ emi ekponode se ubọk owo obotde, ye mme osu nsu ke inua ikọ ye; ke edinam.16“Ami Jisọs mma ndọñ enjel mi editiñ mme ñkpọ emi ọnọ mbufo ke mme ufọk Abasi. Ami ndi Oruñ emi otode ubon Defid; Ami ndi ntantaọfiọñ ñkpọ usen emi ayamade.”17Spirit ye ñwan ndọ edọhọ ete, “Di!” Ndien yak owo ekededi emi okopde ikọ emi ọdọhọ ete “Di!” Owo ekededi emi okopde nsat itọñ, yak enye edi, ndien owo ekededi emi amade, yak enye ọbọ mmọñ uwem ke mfọn.18Ami Jọn ke ata ukpono, mmọnọ kpukpru owo emi ekopde mme ikọ ediyarade emi edude ke ñwed emi item, nte, edieke owo ndomokiet adiande ñkpọ ke mme ikọ emi, Abasi eyedian mme idiọk udọñọ emi edude ke ñwed emi ke ufen esie.19Ndien, edieke owo ndomokiet osiode sio ndomo ñkpọ ndomokiet efep ke mme ikọ ediyarade emi edude ke ñwed emi, Abasi eyebọ enye udeme esie ke mfri eto uwem, ye udeme esie ke Edisana akwa obio emi etiñde añwaña ke ñwed emi.20Enye emi ọnọde ikọ ntiense abaña kpukpru ñkpọ emi, ọdọhọ ete, “Ke akpanikọ edi ntre! Ami ke ndedi ke esisit ini.” Yak edi ntre, Di, Ọbọñ Jisọs!21Yak mfọn Ọbọñ Jisọs odu ye kpukpru ikọt Abasi. Amen.Biblica, Inc.