2 Kọrint10
Pọl Owut Unen Esie
1Ami Pọl mmekpe mbufo ubọk ke ifure ifure ido nte emi Kraist ke idem esie akpanamde. Ami emi ndide owo nsuhọde idem ke iso mbufo, kini ndude ye mbufo, ñnyuñ nsọñde inua ke ñwed kini ami mmenduhọ ye mbufo.2Ami mmekpe mbufo ubọk nte ekunam mi nsọñ ido ye mbufo kini ndidide, koro mebiere nditiñ ikọ uko uko ye mme mmọ oro edọhọde ete ke ñnyin inam ñkpọ ke ido obukidem.3Okposuk edi emi ñnyin idude ke ererimbot, ñnyin iñwanake ekọñ ke ido ererimbot.4Ñkpọ ekọñ emi ñnyin idade iñwana ekọñ, idighe ñkpọ ekọñ ererimbot, edi, edi ọkpọsọñ ñkpọ ekọñ Abasi emi ñnyin idade ibiat mme ñkpọsọñ ebiet. Ñnyin ibabiat mme nsu nsu eneni.5Ñnyin iwuri kpukpru ñkpọ ubiọñọ ntañidem emi emenerede ndida mfuk ifiọk Abasi; ñnyin isin kpukpru ekikere esit owo ke ufin inyuñ inam enye osuk ibuot ọnọ Kraist.6Ñnyin ima ikut nte mbufo esukde ibuot enọ Kraist ofuri ofuri, ñnyin iyedu ke mbeñeidem ndien ndimia mme mbon nsọñibuot ufen.7Mbufo ese ñkpọ emi enyọñ enyọñ. Edieke owo ọdọhọde ete ke imọ idi eke Kraist, yak enye ekere ikaba ete ke ñnyin ñko idi eke Kraist kpa nte enye edide.8Ami ndikopke but, edieke ami ñkpanamde nam inua mbaña odudu emi Abasi ọnọde ñnyin, odudu ndinam mbufo ekọri, idighe ndinam mbufo eduọ.9Ami ñyomke etie nte ami ññwana ndisin mbufo ndik, oto ke ñwed emi ami ñwetde nnọ esọk mbufo.10Ndusuk owo eyedọhọ ete, “Mme ñwed emi enye ewetde enyene udobi onyuñ enyene odudu, edi ini emi enye odude mi ye ñnyin ke idem esie, enye edi owo mmemidem, ndien mme ikọ esie iwọrọke ñkpọ ndomokiet.”11Yak utọ owo emi ọfiọk ete ke ukpuhọde ndomokiet iduhọ ke se ñnyin iwetde ke mme ñwed ñnyin ke ini emi ñnyin miduhọ do ye se ñnyin idinamde ke ini ñnyin ididude do ye mbufo.12Ñnyin iyomke ndidomo idem ñnyin, mme ndibat idem ñnyin nsin ke otu mme mmọ emi etorode idem mmọ. Kadaña emi mmọ edade idem mmọ edomo ye idem mmọ, enyuñ edade ubonñkpọ idem mmọ etebe idem mmọ ikpe, mmọ inyeneke ọniọñ.13Ñnyin idinamke inua ibe adaña; edi iyenam inua nte asañade ekekem ye idaha udeme utom emi Abasi ekenimde ọnọ ñnyin, utom emi asañade esim mbufo.14Ñnyin idikaha anyan ikaha ke unam inua ñnyin nte ekpedide edieke ñnyin misimeke mbufo, koro ñnyin ima isaña añyan usuñ emi idisim mbufo ye Eti Mbuk Kraist.15Ñnyin ibehe adaña ñnyin ke ndinam inua mbaña utom emi mme mmọ efen enamde. Edi imodori enyin ite nte mbuọtidem mbufo akade iso ndikọri, utom ñnyin ke otu mbufo ayatara eti eti.16Man ñnyin ikeme ndikwọrọ Eti Mbuk emi ke mme ikpọ obio efen emi oyomde usuñ ye mbufo, koro ñnyin iyomke ndinam inua mbaña utom emi ema ekenanam ke itie utom owo efen.17Edi, yak owo emi anamde inua anam inua kabaña utom emi Ọbọñ anamde.18Koro idighe owo emi otorode idem esie ke ebat ke eti, edi owo emi Ọbọñ otorode.Biblica, Inc.