Matthew3
1Sŭng khây năr nŏq, Yăng Bap-tit tât nhai tămti sŭng tamăn singot ntĕh Yu-đê,2pành: “Căh palâq vôq, mvăc Daq Cô Voq mơch tât en.”3Mvăc heq cồ tamun gĕh nhai tât a tiêng tri Ê-sai, pành: “Gĕh camvŭm tamun cuôl tayh sŭng tamăn singot: ‘Căh pơq sưndăc trong Cô Voq de, căh ôp an di sŏng khây trong Siđăch de.’”4Yăng heq chuq su ao a sinoq lạc đà, tăn vưt a ntô rawênh yĕq, hôm păch sa nĕh de cồ chap puq bây huch daq sưt nggô.5En con văl palây Yê-ru-sa-lem, lĕq ntĕh Yu-đê bây lĕq khây gatŭq rawênh phong Yô-đanh tât bây nĕh,6en sŭng lăm nhai lŭh bưn bap vơn de, khây nĕh gĕh Yăng Bap-tit ŭm vôq sŭng phong Yô-đanh.7Lăm deng sây gŏq tamun Pha-ri-si bây Sa-đu-sê tât payh ơ sinlơ ŭm vôq nơm de, Yăng nhai bây khây nĕh: “Ơ con sinau vĭh panim tĭq! Vu lây nhai an khây cô chĕq lôt tăm pôn ntrăch a sinlơ măq nuih mơch tât?8Canŏq mŏh, căh an lŭh play jo yăh dip bây nuih talaq palâq vôq,9En khây cô khoi vâng sinâng en nhai bây ndăng ganai: ‘Khananh gĕh un cô jây Ap-ra-ham.’ Mvăc ănh nhai bây khây cô pành Cô Voq ôp lŭh gĕh con sinau an Ap-ra-ham a khây tamô heq.10Cồ canŏq, sung lĕh gĕh chĕq mơch rayĕh tơm chhơ en. Canŏq, lĕq khây chhơ hê đăng an lŭh play yăh nŏq bị păh jưr en hwât lăp ŭnh.11Ănh ŭm vôq sĭq sinlơ palâq vôq an khây pôp ŏh a daq. Cồ canŏq, Candranh tât alưr ănh gĕh prơn gŭn vlơ ănh, sĭq Candranh nŏq ănh cồ tamun đăng yăh lôch chĕq văt sưnrôm Nĕh de. Nĕh nhâng ŭm vôq an khây pôp ŏh a Siđăch Wênh bây a ŭnh;12chhơ sơr Nĕh de u sŭng ti Nĕh, en Nĕh sơr lĕq va sŭng sân nơm de en vatom va Nĕh de lăp sŭng nâm. Cồ canŏq, nĕh sŏh lĕq mlo njôq a ŭnh cồ đăng lăm lây tangât gĕh.”13Lăm nŏq, Siđăch Yêsu saq a ntĕh Ga-li-lê tât phong Yô-đanh, vi Yăng gŭq, chĕq gĕh Yăng ŭm vôq an.14Cồ canŏq Yăng cơ du trong khăq Siđăch diêt, pành: “Ănh nhâng cơnh gĕh Cô ŭm vôq an, aheq lŭh Cô tât bây ănh?”15Cồ canŏq lăm âh sĭq vlâq, Siđăch Yêsu nhai bây nĕh: “Vrêq, ôp canŏq chĕq vŏq, mvăc canŏq nĕh dip an vơn chĕq ôp jôm ăp sinlơ yăh sŏng.” En Siđăch chĕq nĕh ôp.16Vrêq heq, lăm wŏq sinlơ ŭm vôq en, sŏng lăm nŏq Siđăch Yêsu hao ntrăch a daq, en sên tĭq, khây tăp trôq gĕh pơq lŭh an Siđăch, en Nĕh sây Siđăch Wênh Cô Voq de rŏh jưr dân ca sŭm vrăt, răp vlơ Nĕh,17en sên tĭq, du camvŭm nhai a khây tăp trôq pành: “Heq cồ Con Sinđach Ănh de. Ănh dip nuih u Con nŏq.”
FAR EAST BROADCASTING COMPANY