Hobu34
Libiaman liyanun Eliú
1Huguya chu tau, aganba huméi nererun.3Aganba lumuti arigeirugu dimurei, ítara kei lóuchuni iyumulugu éigini.4Ítara giñe, ariha waméi kesi, lun warihin ka lan buídutimabei lun wadügüni.5Lariñahare Hobu: «Au maduruntina, gama lumoun máhati Bungiu líchuguni niricha nun.6Ánhana ánhara luagu gadurun nan, neyeehaña hamuga; mareidagunti nisandi lau sun madügün nan figóu».7Úati ni aban kei Hobu! Adaaguati bula lau Bungiu kei latuniwa duna;8hínsiñeti lun lun lóundaragun hama wuribatiña, lun léibugun hama gürigia wuribatiña.9Lariñahare luagu magañeirun lan gürigia ni kata lau láfaagun líchugun ugundani lun Bungiu.10Gama lumoun, gürigia saminatiña buidu, aganba humana. Maritagua humá luagu adüga lan Bungiu Suntigabafu wuribani odi marichaü!11Fayei lumuti kada aban según le ladügübei; rulei le ladünabei kada aban lun.12Lidan linarün katei, madügünti Bungiu Suntigabafu ni kata le wuribati odi le lan marichati;13Kagia íchugubalin ubafu lun Bungiu? Kagia adügübei lun lagumadiruni ubóu?14Anhein lagidara habagari gürigia, sun hagía hóunweguba, ábayame hagiribudun lidoun múa.16Anhein samina bubéi buidu, aganbabána, tenibá lun nererun.17Lun hamuga iyereegu lan irichaü lun Bungiu, siñati hamuga lagumadihan. Ida lubagia basiadiruni le wéirigubei lidan richaguaü?18Anhein wuriba habéi urúeigu hama wügüriña wéirigutiña lariñagubei Bungiu houn hagibuagun.19Míchaagunti lungua luéigiñe hóubadina agumadihatiña, ua ligía fulesei lániña ha rísibaña sügǘ hau ha gudemebaña ladüga ligía adügübaliña súngubei.20Hilatiña gürigia lidan murusun dan lamidangua áriebu; chagaguatiña gürigia aba hagumuchagun; gumuguatiña ha gabafubaña maguurúnga hawagu.21Aríagu liña Bungiu lun lamufurun kada gürigia, ani subudi lumuti sun lánhingichun.22Úati lanarime luburiga lun gayara lan laramudagun lau aban adügüti wuribani.23Míridunti Bungiu aban dan lun gürigia lun liabin lumoun lun laguserun.24Memegeirunti lálügüdahan lun larariragüdüniña ha wéinamubaña lun líchuguni habara houn amu.25Subudi lumuti Bungiu le hadügübei, áriebu aba liabin, aba lagünrinchaguniña.26Bei lumutiña keisi gáfarahatiña hagibugiñe súngubei,27ladüga hamahan houdin lau le lubeibei, maha hagía habagaridun kei labusenrun.28Adügatiña lun lachülürün hagúarahan gudemetiña ligibugiñoun Bungiu, ani aba laganbuniña.29Gama lumoun anhein ámanicha Bungiu, kábagia gayara lasiadiruni? Anhein laramuda ligibu kábagia gayara larihini? Lábugiñeñanu laríaahan Bungiu gürigia luma burí fulasu30lun marúeihan lan aban gürigia wuribati fulasurugu luéi leyeeduniña lílana fulasu.31Ariñagaadibu funagia lun Bungiu: «Ígiraguagüdaadina nungua lun neyeedún; ani madügündigiaadina figóu.32Arufudabéi nidurun le marihin nubéi nun. Anhein adügaadina lubéi katei mabuidunti, madügündigia naali?»33Busentibu funagia lafayeirunibu Bungiu kei babusenrun, lau sun bamaharun lun? Kei buguya lubéi ariñagubalin le lunbei ladügǘn, mama au, ariñagabéi le basubudirubei woun.34Wügüriña chu tau ha aganbubalina hama gürigia gunfurandatiña, hariñaguba nun:35«Ladimurehaña Hobu ibidiñounga lun; málati le ladimurehabei.36Ariaahoualá lisaminan Hobu buidu, lugundun lóunabagüle gürigia wuribati lóunabagülebei!37Mama gafigounrügüti Hobu, maganbaditi giñe; adaaguati bula lau Bungiu wagibugiñe, asigeneha ligía luma».Bible Society of Honduras