Hobu32
1Dan harihin ǘrüwa lumadagu Hobu luagu anihaméme lan ariñaga luagu madurun lan, aba lerederun hasigenehan luma.2Gama lumoun ñeinñein aban wügüri gíriti Eliú, le liráü Barakéli le Busita, hádangiñe ladügawagun Ramü. Ábati lagañidun Eliú luma Hobu, ladüga merede lan lariñagun luagu madurun lan, ani lariñaga Bungiu lan gadurunbei.3Gama lumoun gáñiti giñe hama ǘrüwa lumadagu Hobu, ladüga kei ibidiñe lan houn ida luba lan hóunabuni, aba hígiruni Bungiu wuriba.4Keiti Eliú lan nibureintimagilibei hádangiñe súngubei, aba lagurabun lásurun hadimurehan ha híbiri lun Hobu;5gama lumoun dan larihin luagu ibidiñeeli lan houn ida luba lan hóunabuni Hobu, aba lásiñarun lágüdaagun lungua ani aba lagumeserun adimureha.
Furumiñeti liyanun Eliú
6Kei nibureingidina lubéi, ani gürigia wéiyaaña huguya, mabusenruntina yebe nariñaguni naritagun.7Aba nasaminarun: «Lumalalilá le winwan láalibei katei adimureha, arufudaléi saragu irumu lichú lau».8Lau sun lidan lan linarün katei, sun gürigia gunfurandatiña, ladüga ru lumuti Suntigabafu lani sífiri hadoun.9Machuuragüdünti liibe irumu lau ni aban, manügünti giñe ídiumaü aban gunfurandaü úaraguati lúmagua.10Ligía lubeiti nariñagunbei: «Guentó, aganba hamana, lugundun anihein giñe katei lunti nariñaguni».11Aganbaha naali ani teni au lun sun le hariñagubei, ariha naadün áluahei lubuidun-agei burí dimurei,12ani ariha naali giñe luagu ua lan ni aban hídangiñe óunabuti Hobu lidan lubudubu.13Lun manaagun humá hungua kamá chu tau, mámaba aban wügüri óunabaün, Búngiuba óunabaün.14Gama lumoun ni Hobu madimurehangili nun, ni au móunabun nubéi giñe kei huguya.15Hobu, bulíeiguatiña ǘrüwagubei ha, ani mégeiti dimurei houn lun hóunabunibu;16gama lumoun maritaguabá luagu námanichuba lan ladüga hámanichun, lugundun rédeitiña móunabunga hamabu.17Nádaragua nungua lidoun katei le ani nariñagaali le lunbei nariñaguni.18Buin niña lau dimurei darí lun siñá lan nágüdaagun nungua;19yarafaadina lun nafaünchün kei diwéin to lídantu gueru iseri.20Gasu nadimurehan lun nawaragun, gasu níchugun aban óunabagülei bun.21Mídinbadina lúmagiñe ni aban; ábanbei labu nóuseruniña súngubei.22Lidan linarün katei, méchuntina íchiga gúnfuli ni ka un; anhein nadüga ítara, labeichuñadina hamuga Nubungiute furese!Bible Society of Honduras