2 Lúrudu28
Abiniruni houn ha gaganbadibaña
1Lariñaga Moisesi houn:—Ánhabu gaganbadi lun Wabureme le Bubungiute le gumuti, adügabéime le lariñagubei lugumadin le uágubei nariñaga bun uguñe, líchugubadibu Bungiu hóugiñe sun gürigia ha ubouagubaña.2Ani lábürühaba sun abinirúni le buagun ladüga badügüni le lubeibei Wabureme le Bubungiute.3Babinirúba uburugu luma áraabu.4Habinirúba giñe birahüñü luma sun balubahan hama bilügüniña bágasu, mudún hama sun híbiri bibiñanigu.5Labinirúba bufaniñen tuma boulu to ñein lubéi bañoundagua fulúaru.6Ani babinirúba giñe lidan sun badüga.7—Lederegerubaña Bungiu báganiñu búhaburugun danme hageindagun buma. Lídanme Hayabin buagun afileiheina haba luéigiñe aban üma, gama lumoun héibaaguba buéi wararügueina.8—Bungiu le Wabureme labinirubadibu lidan sun le lunbei badügüni líchuguba saragu türigu hun, darime lun labuinchun hareidagüle éigini, ani labagaridagüdübadibu lau ugundani lidan ageiraü le lunbei líchuguni bun.9—Anhein bagunfulira lugumadin Bungiu falabéime lémeri, lanügübadibu Wabureme Bungiu kei aban ageiraü le deregeguati lungua lun, ítara kei láfiñuruni.10Ábame hasubudiruni sun gürigia ha ubouagubaña luagu lánigu humá Bungiu ábame hanufudedun buéi.11Larufudubei Bungiu lareini bun lau líchugun saragu irahüñü bun, gibe hagíame harahüñü bibiñanigu luma saragu alubahani lidan múa le meha uágubei láfiñura houn bagüchagu luagu líchugubei lan bun.12Ani daraléime lirisin-agei le siélubei bun, lun líchugun huya, le lemegeirubei bumúan; ani lawanseragüdübei sun buadigimari. Gayaraabei bafuredeihan houn saragu néchani, ánheinti buguya mamuriahanbadibu furedeiti luma ni aban.13Líchugubadibu Bungiu lidan furumiñeti ubaraü, mámabadibu lidan lagumuhóun; súnwandan hóugiñebadibu lan híbiri, mámabadibu hábugiñe, anhein bagunfulira lugumadin Wabureme le Bubungiute, le uágubei nariñaga bun uguñe lun bagunfuliruni,14madireirunga buguyame luéi lun basigirun amu búngiugu lun báhuduragun houn.
Le lanügübei maganbadi
15—Gama lumoun ánhabu maganbadi lun le lubeibei Wabureme le Bubungiute, ani madügünbeime sun lugumadin ni lúrudu le ariñaga náalibei bun uguñe, liábinba sun íñarawaguni le buagun ani lárügüdübadibu:16—Bíñarawaguba uburugu luma áraabu.17—Líñarawaguba bufaniñen tuma boulu to ñein lubéi bañoundagua fulúaru.18—Híñarawaguba birahüñü luma sun le lunbei balubahani, hama sun harahüñü bilügüniña bágasu harahüñü bilügüniña mudún hama sun bibiñanigu.19—Bíñarawaguba lidan sun badüga.20—Lóunahaba Bungiu íñarawaguni bulíeiguaü luma igarigu lidan sun le lunbei badügüni, ani lagumuchaguagüdübadibu sunsuinagubei lidan murusun dan, ladügame bígiruni luagu luriban bóuserun.21Lóunahaba Bungiu aban sandi buagun le lunbei lagumuchun bau lidan ubóu le ñéinhinba lubéi bebelura.22Lóunahaba giñe sandi gáfarahati buagun, abiruaü héreti, ilu, lanarime lárouga, lumabeigan hama igei lun héigini bitürigun-agei, sandi burí le lunbei léibaahanibu darí lagumuchaguagüdünibu.23Máhuyunbei huya bun siélugiñe; marandarun ligíame múa bun.24Lábürügüdüba Bungiu kaliki luma sagoun buagun leweñegua huya, darí bagünrinchagun,25ladügüba Bungiu lun hagañeirunibu báganiñu. Bawanseruba habaroun lídangiñe aban üma, gama lumoun banurahaba hawéi luéigiñe sedü üma, lébunabadibu anufudei houn lílana sun fulasu.26Héigibei dunuru hama animaalugu gáñitiña búgubu danme hilaadibu úouga kaba lan abugaña.27—Lasufuriragüdübadibu Bungiu lau guméi kei ladüga houn Ehiptuna, luma lau tumoru, lélehan uraü luma tiña, ani siñabei bareidagun lídangiñe sandi burí ligía.28Lasandiragüdübadibu giñe lau lílülün aau, marihini luma bulíeiguaü,29ábame béibugun árüharügü kei marihinti lidan luburiga. Úabei badüga asaliruti bun buidu, badariraguba bungua lidan lidere dan súnwandan, ani úabei ni aban ñǘbuinti íderaguabu.30Gadaradunbadibu lun bamarieidun gama lumoun ámuba wügüri arounra tuma badari; bábunuba aban buban gama lumoun maganóunbadibu tidan, bábunaguba beibei-agei gama lumoun meigin bubóun tin,31lafarúba bilügün bágasu bigibugiñe, gama lumoun méiginbadibu lidan; lagidarúba bilügün burigü buéi, michugúnhalime bun lárigoun; hanügübaña báganiñu bilügüniña mudún, ani úabei íderagutibu lun bagidaruniña hawéi.32Hederegerúba birahüñü houn gürigia terencha aríagu buguyame lun, sunme oura babusenrúña barihiniña, gama lumoun siñabei badügün ni kata.33Héigibei gürigia ha ibidiñetiña bun balubahan luma sun le líchugubei buadigimari, báfaguba amudirawaguni luma luriban ouserúni súnwandan.34Danme barihini sun burí katei le, ábame lálülüdün bau.35Lasufuriragüdübadibu Bungiu lau guméi gáfarahati luagu bigachürügü, biyada luma luagu sun búgubu, ani siñabei bareidagun.36—Ladügüba Bungiu lun banügǘn buguya luma burúeite hadoun gürigia ha ibidiñebaña bun, ni houn bagübürigu. Beseriwiduba houn amu búngiugu ñein ha láutiña wewe luma dübü,37lébunabadibu anufudei, ariñawagúni luma bula lidan sun fulasu le ñeinhin lumuti lanügabu Bungiu.38Bábunaguba saragu ilaü gama lumoun míbebei balubahan lugundun héigibei chagagaru.39Bábunaguba beibei-agei, góunigibeime, gama lumoun mátunbadibu diwéin lídangiñe, malubahanbounme tin lugundun héigiboun héweraü.40Ganadüribadibu oliwu bumúanrugu, gama lumoun máhurudagun bubéi tagüle ladüga tachagaruba tin.41Gasaanigubadibu, gama lumoun meredebaña buma lugundun hanügǘba adaürǘwa lidoun burí amu ageiraü.42Sun tídibu wewe luma tin le bumúanrugubei héigibei chagagaru.43Gabafutimarügübaña terencha ha bageirabaña, anhein buguya, eferidireina luba bubafu.44Gayaraabei hafuredeihan bun, ánheinti buguya, lubaragiñe lira úabei ni kata buma lun bafuredeiruni; hagíaba lau furumiñeti ubaraü, buguyame lau lagumuhóun.45—Lábürühaba sun íñarawaguni le buagun, léibaahabadibu ani lárügüdübadibu darí lagumuchun bau, lugundun bumahan badügüni le lubeibei Wabureme le Bubungiute maha buguya bagunfuliruni lugumadin luma lilurudun.46Sun burí lamiselu ábanbei seini magumuchaditi luagu bei lánibu Bungiu hama sun badügawagun,47ladüga máhuduragun ban lun Wabureme le Bubungiute lau ugundani luma inarüni lárigiñe rúhali lan saragu buiti bun.48Beseriwiduba houn áganiñu ha lúnbaña lóunahaniña Wabureme le Bubungiute buagun; báfaguba ilamaü, mágürabu, temegeirun daüguaü luma sun luwuyeri gudemei. Lasufuriragüdübadibu Bungiu keisi idamuni darime bagünrinchawaguniwa.49Lóunahaba Bungiu néchanigu buagun lídangiñe lidise-agei fulasu ubouagu ha úabei gunfurandabani hererun, hachülürüba furese bumoun kei táhamahan aban ágila.50Hanarimebaña gürigia hagía, minebenbaña wéiyaaña mutu houn, magudemehabu hagíame houn irahüñü.51Héigibaña harahüñü bibiñanigu luma lin binadürigu, darime hígirunibu sin ni kata. Mígirunbaña türigu, ni diwéin, ni garaba, ni harahüñü bilügüniña bágasu, ni harahüñü bilügüniña mudún, ábame bounwen bilama.52—Hegeyedagubei sun burí buburugute ábame hageindagun buma, darime léiguadun baríeiru le íñutimabei le góunigiwatimabei le yebe uágubei bíchigei bemenigin; inarüni, hegeyedagubei ani ageindagua hameime sun burí uburugu le líchugubei Wabureme le Bubungiute bun.53Danme hageindagun báganiñu luma buburugute, wéiribei bilama darime lun béiginiña birahüñü guánarügü ha líchugubaña Bungiu bun.54Íbini wügüri létima matirinhabei, le areidabei haganagua, larihuba wuriba luagun líbiri o lúmari to hínsiñeboun lun, luma hawagun hasaanigu ha añaheinguabaña hama,55luéi líchugun houn hádangiñe lirahüñü ha lúnbaña léiginiña. Úabei éigini danme lábürühan ágani luagun uburugu lúmame lanarime idiheri le lunbei lasufuriragüdünibu lidan sun buburugute.56Íbinime würi to fínutimaboun hidan, le lueirin matirinha tan darí lun meha maha tan ladagarun tugudi múarugu mageidinga, tarihuba wuriba luagun túmari le hínsiñebei tun luma hawagun tirahüñü,57luéi tíchugun houn hádangiñe tirahüñü dan le tagaraüdün luma tídangiñe aabaü to áfuriduboun turageirugugiñe; téigibei sun lira aramudaguarügü, ladüga úabei éigini sun anihán lan ágani ageindagua luma buburugute.58—Anhein madügün ban sun le lariñagubei arufudahani le bürüwañubei tidan líburu to, mineben ligíame luéirigun liri Wabureme le Bubungiute bun,59lóunahaba lanarime burí igei buagun luma hawagun badügawagun luma burí sandi le máraninati.60Ladügüba lun hagiribudun sun igei ha Ehiptuna buagun, ha anufudedagüdübalibu saragu ani gásume báfaguniña aban lárigi aban.61Lóunahaba giñe amu burí sandi hama igei ha miridúntiña tidan líburu to, to lánina arufudahani buagun, darime hagumuchun bau.62Huguyati Ísüraelina, huguya meha le gíbebei kei waruguma ha siélubaña, hamibeduba, ladüga midin humá lau le lubeibei Wabureme le Hubungiute.63Ítara kei buga lagundaarun Bungiu adüga buiti hun luma agibedaguagüdaün, guentó lagundaaruba agünrinchaguaün, hahulúba lau anarimeni lídangiñe ageiraü le lunbei hibihini.64Lachagarubadün Bungiu hadoun sun néchanigu lúmagiñe aban lígirugu ubóu lumoun le aban, háhuduraguba houn amu búngiugu ñein, búngiugu láutiña wewe hama ha láutiña dübü, ha meha ibidiñetiña hun ni houn hagüchagu.65Sunme aünha lan aganawa haganagua néchanigu hagía, madarangilanbadün, memeraagun, lugundun ladügüba Bungiu lun louñu humá súnwandan, lau hagu híruñu buin lau idiheri.66Lídanbei denchaü hibagari súnwandan, hanufudebadün wéyuagu áriebu; ani machoururunbei hibagari.67Hanarimebei hanufude luma burí katei le lunbei harihini, darime lun hariñagun binaafin: “Áriebudügühaali hamuga ma!” Hariñagame áriebu: “Wéyuagudügühaali hamuga ma!”68Ani lau sun ariñaga lan Bungiu hun luagu magiribudúnyaadün lan luéigiñe lémeri Ehiptu, lagiribudagüdübadün ñeinhin tidan ugunei, ábame lalugurunün keisi idamuni houn háganiñu; gama lumoun úabaña abusenrutiña hagañeihanün.Bible Society of Honduras