1 Samueli15
Wuribu hama Amaléküna
1Luagu aban weyu, aba lariñagun Samueli lun Saulu:—Óunaha lumutina Wabureme lun nanúadirunibu keisi lurúeite Ísüraeli, ha lumutuniña. Aganbabéi lubeiti le labusenrubei Wabureme lariñagun bun.2Lariñahare Wabureme Sunti gabafu: “Nasufuriragüdaaña Amaléküna luagu le hadügübei houn Ísüraelina, lugundun bayaraguatiña meha hémerirugu dan le hayabinbei Ehiptugiñe.3Beiba lubeiti ageindagua hama; günringuabaña lau sun hamegen, magudemen hamá bun. Áfaraguaba wügüriña, würiña, irahüñü hama figigiña, bágasu, mudún, kameyu hama burigü”.4Aba lóunahan Saulu hawagu Ísüraelina, aba labahüdüniña uburugu Telaimü: Bián-san-milu wügüriña ha eibu umutiña, hama diisi-milu Hudaana.5Lárigiñe aba lidin Saulu luburuguterugun Amalékü, aba lárügüdün ubaraü laru duna,6aba lariñagun houn Kenitana:
—Furí humá haganaguagiñe Amaléküna luéi nagünrinchagunün úara hama, ladüga huguya, buiti buga hóuseruniña Ísüraelina dan le hayabinbei Ehiptugiñe!
Aba hadireirun Kenitana hawéi Amaléküna.7Ábati lábürühan Saulu hawagun Amaléküna lúmagiñe Awilágiñe darí lubenari fulasu le gíribei Suru, le ligibugiñebei Ehiptu, aba láfaraguniña;8aba lanügüni Agagü le harúeite adaüra, aba láfaraguniña sun lisudaranigu tau eféin.9Gama lumoun Saulu hama lánigu, máfarun hamuti Agagü, máfaragun hamaña habuidun-agei mudún, ni bágasu wügüriña, ni bágasu ñǘbürigiña ha dibunetimabaña ni gábara, magünrinchagun hamuti giñe katei le burí gebegibei, luéidigia katei le burí meseriwínbei hagünrinchagubei.
Mabusenrúniwa lan Saulu kei urúei
10Ábati ladimurehan Wabureme lun Samueli, lariñaga lun:11—Lubá hǘrühali nun níchuguni buga Saulu urúeime, ladüga díreiha nuéi, ani mídinti lau le nubeibei.Aba laribadun laritagun Samueli, aba lerederun sun áriebu ligía ayumuragua lun Wabureme.12Larugan, aba saragia lan lun lidin lubaroun Saulu, gama lumoun aba lariñawagún lun luagu aningira lan Saulu Karüméli, luagu adügaali lan aban aritaguagülei ñein, lárigiñe lan legeyedagun aba lidin Gilügáli.13Ábati lidin Samueli le ñein lubéi Saulu, lariñaga Saulu lun:
—Binilabu Wabureme. Gúnfuli naali le lariñagubei Wabureme nun.14Lariñaga Samueli lun:
—Kati mini lan hamalali mudún hama bágasu le naganbubei?15Lariñaga Saulu lun:
—Hanügün numutuniña Amalékügiñe ígira wamaaña habuidun-agei mudún hama habuidun-agei bágasu wügüriña lun wadagaragüdün lun Wabureme le Bubungiute. Gama lumoun ha híbiri áfaragua wamá.16Lariñaga Samueli lun:
—Maniba, nariñagaali le lariñagubei Wabureme nun áriebu buga bun!
Lariñaga Saulu lun:
—Badimureha.17Lariñaga Samueli lun:
—Ma buga bariñahare luagu ni kata ban? Lau sun lira ñǘbuinhadibu lun hábutime hani Ísüraelina türibu, ani anúadira laadibu Wabureme keisi lurúeite Ísüraeli.18Guentoti, anhein óunaha lubalibu Wabureme lau dimurei deregüdati lun bagünrinchaguniña Amaléküna gafigountiña ha, luma lun báfaraguniña darí hagumuchagun,19Kagia uagu badüraagunbalin le lubeibei, aba banügüni le hagidarubei hawéi háganiñu, adüga wuribati ligibugiñe Wabureme lau lira?20Lariñaga Saulu:
—Au adüga numuti le lubeibei Wabureme, ani gúnfuli numuti le lariñagubei nun lun nadügüni: Barǘ numuti Agagü le lurúeite Amalékü adaüra, günringuanaña Amaléküna.21Gama lumoun aba herederun súdaragu hau habuidun-agei mudún hama bágasu wügüriña hádangiñe ha yebe lúnbaña hagumuchawaguagüdün, lun hadagaragüdüniwa Gilügáli lidan liri Wabureme le Bubungiute.22Ábati lariñagun Samueli:
«Gúndatimati Wabureme lau ladügǘn le lubeibei sügǘ lau lichugún idewesei luma adagaragüdüni gudawarügüti lun; gebegitimati gaganbadiwa lan lun luma letenirun lun sügǘ lau lichugún adagaragüdüni luma hagüle mudún lun».23Aban labu lafigouhan le agarabaagubei luagun Wabureme, kéigubeirügü le garíaahadibei; ítara liña le áhuduragubei houn guáriua, kei le mídinbei lau le lubeibei. Keiti mabusenrun ban badügüni le lubeibei, mabusenrun láadibu giñe kei urúei.24Ábati lariñagun Saulu lun Samueli:
—Anha, afigouhaadina ladüga madügün nani le lubeibei Wabureme luma bererun; gama lumoun nadügünbalin ítara, ladüga nanufude hawéi ha númabaña, aba nadügüni le hamuriahabei.25Gama lumoun ayumuraguatina bun lun ferudunabani nifigoun, luma lun bagiribudun numa lun náhuduragun lun Wabureme.26Lariñaga Samueli lun:
—Magiribudúnbadina buma, lugundun dürügua baali lugumadin Wabureme, guentoti dürügualá giñe Wabureme arúeihani buéi.27Dan le lagararaagun Samueli lun lidin, aba lárügüdün Saulu luéigiñe taru tidáü ladaüragun, aba laheiridagunu.28Ábati lariñagun Samueli lun Saulu:
—Ítarameme liña giñe laheiriduni Wabureme arúeihani búhaburugugiñe uguñe. Gidala buéi lun líchuguni lun aban bupaisanun le gadünatima lumuti buéi.29Ladüga Bungiu, le luéirigun Ísüraeli, meyeehanti, masakürihan, lugundun mama ligía wügüri lun lasakürihan.30Ábaya lariñagun Saulu:
—Afigouhaadina. Gama lumoun ayumuraguatina bun lun ninebedun bun keisi aban urúei hagibugiñe ábutigu Ísüraeli luma hagibugiñe sun Ísüraelina. Giribubá lubeiti numa lun woudin áhuduragua lun Wabureme le Bubungiute.31Ábati lagiribudun Samueli luma Saulu, aba láhuduragun Saulu lun Wabureme.32Lárigiñe aba lariñagun Samueli:
—Barǘ huméi Agagü le lurúeite Amalékü nun ñahoun.
Aba liabin Agagü lun Samueli lau darangilaü, laritagun yebe luagu sügüha lan denchaü le lánina aban óunweni gífiti lun.33Gama lumoun aba lariñagun Samueli lun:
—Ígiraadibu saragu würiña marahüñüga tau befeinte. Teredera giñe búguchu kei hagía.
Aba lapiisihani Samueli Agagü ligibugiñe Wabureme uburugu Gilügáli.34Lárigiñe aba lidin Samueli Ramá, aba lagiribudun Saulu lúbiñoun uburugun Gibeá le lani Saulu.35Ábati marihin laali lan Samueli Saulu, lau sun hiru lan saragu ladüga lasansiragun laritagun Wabureme luagu buga líchuguni Saulu lurúeiteme Ísüraeli.
Bible Society of Honduras