Nu-kɛ̀ʼ-bə5
1Ndʉʉmɛ, mɔ nɔ kə nyíɛ ŋwɔʼnə kwiimɔʼnə wo ndə ɔ kə yétə ndəŋ mbʉ kəyetə, bə nyɔ̀ʼ fɔbə chɔ ndəŋ viabə inchəŋ kíatə, lyʉ́ʼ nə mbəʼ-mʉə-bə təkwiitia.2Mɔ nyíɛ wontəŋkwɛʼtəŋNyii ndə ɔ tíi nə gyʉʉ dədə ghɔ̀ŋ mbɔ, “Bɛ nda ndə ɔ kʉ̀ʼnə ndə məbɔ̀ʼtə mbəʼ-bəmʉə-bə-ɔ̄ŋ bɔŋleʼ yɔ̀ʼtə ŋwɔʼnə-ɔ̄ŋ?”3Bɔŋ təmə wo bɛ ghɔ yuo byuunɔ kəchisê byuunɔ mu sê ndə ɔ kʉ̀ʼnə ndə məyɔ̀ʼ mbʉ ŋwɔʼnə, lɛ́nə mu-i fɛ.4Mɔ chʉ́ʉhə kə́ gwía nə ghʉəʼkə bʉʼka wo kə bɛ ghɔ ndə ɔ kʉ̀ʼnə ndə məyɔ̀ʼ mbʉ ŋwɔʼnə byuunɔ lɛ́nə mu-i fɛ.5Mbyu ntəŋbəshʉ ghəŋ imɔʼ ndə ɔ kie kuŋhə gìe tʉ mɔ mbɔ, “Kə a mə leʼ gwía fɛ. Nyíɛ, bʉʼ ndə ɔ lɔ̀ hə kəlɔŋ Juda, lyʉʼʉ ŋgwie Dɛbi, nɔʼ yú mbʉ chɔ̂, mbɔ ɔ chʉʼ kie ghʉəʼkə ndə məbɔ̀ʼtə mbʉ bəmbəʼ mʉə təkwiitia, yɔ̀ʼ mbʉ ŋwɔʼnə.”6Ntəŋntəŋ mbʉ kəyetə ghɔŋbə fɔ-ŋɛnə-bə-īŋ kwi le, leʼnə ntəŋntəŋ mbʉ bəntəŋbəshʉ ghəŋ ndə bɔ̂ŋ kie kuŋhə le, mɔ nyíɛ Vaabinjyʉʉ kə́ tə́nə chɔ, fi nə bə nɔʼ gwía ɔ. Ɔ kie ndʉʉhə təkwiitia, leʼnə shʉtə təkwiitia ndə bɛ lyʉʉhə-Nyii-bə təkwiitia ndə bə nɔʼ tə́ŋ wɔ̀ʼhə ndəŋ yəŋbə inchəŋ kəchisê.7Mbʉ Vaabinjyʉʉ gɛ̀ fí mbʉ ŋwɔʼnə kəghɔ-ɔ kwiimɔʼnə mbʉ wo ndə ɔ yétə ndəŋ mbʉ kəyetə.8Ndʉʉ ndə ɔ nɔʼ kə fí mbʉ ŋwɔʼnə, mbʉ bəfɔ-ŋɛnə-ghɔ̄bə kwi ghɔŋbə mbʉ bəntəŋbəshʉ ghəŋ ndə bɔ̂ŋ kie kuŋhə njuɔ kwi nə wuŋ bûu le bʉ́ʉnə sê bəshʉ mbʉ Vaabinjyʉʉ. Wotəmiyɔŋ mu bɔŋ kie ŋkyitə kəghɔ-ɔ, leʼnə bəbaŋ ndə bə chìi nə goo, i kə́ bɛ i lə́ŋtə nə lyiikə ndə bɛ məgháaNyii bʉə-Nyii.9Bɔ̂ŋ yùɔ lyuu fefe kə́ ghɔ̀ŋ mbɔ,“A nɔ kʉ̀ʼnə ndə məlʉ̀ mbʉ ŋwɔʼnəbɔ̀ʼtə mbəʼ-bəmʉə-bə-i,Bʉʼka bə nɔ kə gwìatə a, a chʉ̀ʼ tʉ-bʉə-kə tʉ Nyii nə fɔbʉəkə-a,bʉə ndə bɔ̂ŋ lɔ̀ hə ndə lɔŋbə inchəŋ, lɔ̀ hə ndə ŋgie-bətə̂ŋ-bə inchəŋ, lɔ̀ hə ndə bie-bʉə-hə inchəŋ, leʼnə lɔʼ-bətə̂ŋ-tə inchəŋ.10A nɔʼ chìi bɔŋ, bɔ̂ŋ bɛ lɔʼɔ kətə̂ŋ bɔŋleʼ bɛ bʉə ndə bɔ̂ŋ tʉʼ fɛ̀ʼndɛŋ tʉ Nyii-yaʼ, ndə bɔ̂ŋ bu yi leʼ sɔ́ʼ chisêkə.”11Mɔ bìʼ lɛ́nə, yʉ́ gyʉʉ bʉəntəŋNyii chɔ yɔ́ŋyɔ́ŋ, i bɛ buŋmbibuŋmbi təmə bə mə súu fɛ, i bɛ ŋkɔŋŋkɔŋhə, bɔ̂ŋ kə́ tə́ŋtə yə̀ŋ mbʉ kəyetə leʼnə mbʉ bəfɔ-ŋɛnə-bə-īŋ, leʼnə bəntəŋbəshʉ ghəŋ ndə bɔ̂ŋ kie kuŋhə le,12kə́ gìe nə gyʉʉ dədə mbɔ,“Vaabinjyʉʉ ndə bə kə gwìa ɔ,nɔ kʉ̀ʼnə ndə məkie ghʉəʼkə ndə məsɔ́ʼ bʉə, kie fʉʼkə, kie mukətʉ-súunə, fí ghʉəʼkə, kie kuŋhə, kie məgʉ́ə, b̈ə bɔŋleʼ chʉ̀ʉ ɔ.”13Mɔ bɔŋleʼ yʉ́ fɔ-ŋɛnə-bə inchəŋ ndə Nyii chìi ndə i bɛ mu yuo, kəchisê, wʉʉnəmbikə ndə i bɛ tɔʼɔ kəchisê leʼnə mu muu leʼnə nə fɔbə inchəŋ ndə i bɛ mu bɔŋ kə́ ghɔ̀ŋ mbɔ,“Bə nɔ kie ndə məchʉ̀ʉ mbəŋ-ɛŋ ndə ɔ yétə ndəŋ mbʉ kəyetə leʼnə mbʉ Vaabinjyʉʉ, kɔ́ kuŋhə, kɔ́ məgʉ́ə leʼnə ghʉəʼkə tʉ bɔŋ təmə liʼ-i ghɔ fɛ.”14Mbʉ bəfɔ-ŋɛnə-ghɔ̄bə kwi ghɔ̀ŋ mbɔ, “Ï bɛ haʼ nɔ!” Mbʉ bəntəŋbəshʉ ghəŋ ndə bɔ̌ŋ kie kuŋhə bʉ́ʉnə sê lə̀ʼtə Nyii ghɔŋbə mbʉ Vaabinjyʉʉ.
Wycliffe Bible Translators, Inc.