1 করিন্থীয়10
1নংগৌ, ও বিদা-ফংবায় আরৗ বিবো-বিনানাওফৗর আঙৗ নৗংছৗরখৌ জ্ঞান গৈয়ি জাজান লুবৈয়াখৈ, গৗসৗখাংহৗনৗ হাস্থায়ৗ, মোশিজৗং থাংফানায় জৗংনি আজৌ আজৈফৗরহা মা জাদৗংমৗন, বিছৗরৗ জৗমৈনি সিঙাও দংমৗন, আরৗ লৈথৗ গেজেরজৗং বাৎলাংদৗং মৗন।2জৗমৈয়াও আরৗ লৈথৗয়াও বাপ্তিস্মা হৗজানানৈ মোশিজৗং খৌছে জাদৗংমৗন।3বিছৗরৗ গাছৈবৗ আত্মিক আহারখৌ জাদৗং,4আরৗ গাছেনবৗ আত্মিকনি মৗনছে লৗংনায়খৌ লৗংদৗং মৗন; মানৗনা বিছৗরজৗং লৗগৗছে থাংফানায় ঈশ্বৗরনি হৗনায় জিউনি গেদেৎ অন্ঠাইনিফ্রায় বিছৗরৗ দৈ লৗংদৗং মৗন, আরৗ বি অন্ঠাইয়ানৗ খ্রীষ্ট মৗন।5অব্লাবৗ, বিছৗরনি বাংসিন মানসিফৗরনি ছায়াও ঈশ্বৗরা খুশি জায়াখৈ, বিনিখাইনৗ ঈশ্বৗরা বিছৗরনি মারু গৗরান ফৗথারবারিয়াও থৈগ্লুংহৗদৗং আরৗ বিছৗরনি মৗদৗমফৗরখৌ ফেৎসাদ্লাবাইদৗং।6বেফৗর গাছেনবৗ দৃষ্টান্ত বাদি জাদৗং, বিছৗরৗ গাজ্রি মাওদৗং মৗন, জৗংবৗ বিবাদি গাজ্রি জিনিসখৌ লুবৈয়ি বাদি।7বিছৗরনি গেজেরাও খাইছেফ্রা মূর্তিফৗরখৌ খুলুমদৗং, নৗংছৗরৗ মূর্তিফৗরখৌ দাখুলুম; শাস্ত্রয়াও লিৎনায় দং, “মানসিফ্রা জানায় লৗংনায়নি থাখৈ জিরাইবায়, উনাও জিখাংনানৈ রৗংগৌ থামাসা খৗলামনৗ লাই হৗয়ৗ।”8জৗঙৗ জিনাহারি খৗলামনৗ নাঙা, বিছৗরনি গেজেরাও ছৗরবা ছৗরবায়া জিনাহারি খৗলামদৗং মৗন-আরৗ সানছেয়াওনৗ বিছৗরনি গেজেরাও তেইশ হাজার মানসিফ্রা থৈদৗং।9জৗঙৗ খ্রীষ্টখৌ আনজাদ লানৗ নাঙা, বিছৗরনি গেজেরাও ছৗরবা ছৗরবা আনজাদ লাদৗং আরৗ জিবৌফৗরজৗং ছৌথাৎজাদৗং।10বিছৗরনি ছৗরবা ছৗরবা আপত্তি খৗলামনানৈ জেরৈ সিথাৎগ্রা আরফ'জৗং সংহার খৗলামজাদৗং, বেবাদি জৗঙৗ খৗলামনৗ নাঙা।11বেফৗর গাছেনবৗ বিছৗরনি থাখৈ দৃষ্টান্ত বাদি জাবায় আরৗ জৗংখৌ ফৗরৗংনৗ বিছৗরৗ বেফৗরখৌ লিৎনানৈ দৗনবায়, জাইফ্রা জৗবনায় যুগয়াও ঠাংনান দং।12বিনিখাইনৗ ছৗরবায়া গাওখৌ গৗমগৗমৈ গছংনান দং হৗন্নানৈ সানব্লা, বিয়ৗ গৗগ্লৈয়ি বাদি সাবধান থানাগৌ।13এরেই বাদি জেবৗ আনজাদ নৗংছৗরনিয়াও ফৈয়া জেয়া সাধারন বিবান ফৈয়ৗ। আরৗ ঈশ্বৗরা ফৗথাইসুলা, নৗংছৗর সৈনৗ হায়ি আনজাদখৌ বিয়ৗ নৗংছৗরনিয়াও ফৈহৗনায় অৗঙা। নাথায় জেব্লা নৗংছৗরৗ আনজাদ লাজায়ৗ, বিয়ৗ খাৎগনায়নি লামাবৗ নৗংছৗরনৗ হৗনায় জাহাথে নৗংছৗরৗ সৈনৗ হানায়।14বিনিখাইনৗ ও আংনি অনসুলা লৗগৗফৗর, মূর্তিফৗরখৌ খুলুমনায়নি ফ্রায় খাৎ।15নৗংছৗরখৌ সাননৗ গৗরৗং মানসিফৗর হৗন্নানৈনৗ আঙৗ বেফৗরখৌ বুংবায়; আং মা বুঙৗ বিচার খৗলামদৗ।16ফৗরবুনি ভজনি সমাও ঈশ্বৗরখৌ ধন্যবাদ হৗনানৈ খুরৈনিফ্রায় জৗংনি লৗংনায়া খ্রীষ্টনি মৗদৗমনি থৈনি সহভাগিতাখৌ রানজ্লাইনানৈ লানায় জায়া না? আরৗ সিঠাওখৌ জৗঙৗ বৗফ্লেনানৈ জানায়জৗং, জৗঙৗ খ্রীষ্টনিয়াও সহভাগিতাও খৌছে, বেখৌ দিন্ঠিয়া না?17জৗঙৗ গৗবাংব্লাবৗ মৗনছে বান মৗদৗম, মানৗনা গুরছে বান সিঠাও, আরৗ জৗং বয়বৗ বে গুরছে সিঠাওখৌনৗ রান্নানৈ জায়ৗ।18ইস্রায়েল মানসিফৗরখৌ সান্নানৈ নায়: বিছৗরনি গেজেরাও জাইফ্রা দাও দাও খৗলামবায় বিন্দৗয়াও বলি বাওনায়খৌ জায়ৗ, বিছৗরৗ বিন্দৗনি গাছৈয়াওবৗ ভাগৗ লাজ্লাইয়া নামা?19অব্লা আংনি বুংনায়নি অৗংথিয়া মা জাখৗ, মূর্তিনৗ বলি বাওনায়াও মাবা মৗন্নায় দং না এবা মূর্তিফ্রানৗ নংগুবৈ ঈশ্বৗরফৗর না?20গৈয়া, আংনি বুংনায়া বেনৗ, মূর্তি খুলুমগ্রাফৗরনি বিন্দৗয়াও বলি বাওনায়া ঈশ্বৗরনি অৗঙা, মৗদাইফৗরনৗছৗ বাওনায় জায়ৗ আরৗ আঙৗ নৗংছৗরখৌ মৗদাইফৗরজৗং লৗগৗ লাফানায়খৌ লুবৈয়া।21নৗংছৗরৗ ফৗরবুনি খুরৈয়াও লৗংনানৈ মৗদাইফৗরনি খুরৈয়াও লৗংফানৗ হায়া, আরৗ ফৗরবুনি টেবিলাও সহভাগিতা লানানৈ মৗদাইফৗরনি টেবিলাও লাফানৗ হায়া।22বেফৗরখৌ মাওনানৈ জৗঙৗ ফৗরবুখৌ হিংসা খৗলামহৗনৗ হাস্থায়ৗ? বিনিখ্রুই জৗং বৗলৗগ্রাসিন না?23বিছৗরৗ বুঙৗ, “জৗং গাছৈখৌবৗ মাওনৗ হায়ৗ,” বে নংগৌ নাথায় গাছেনবৗ মৗজাংজৗব, বে অৗঙা। “জৗং গাছেনবৗ মাওনৗ হায়ি” নাথায় গাছেনবৗ হেফাজাবমাও ফৈয়া।24রাওবৗ গাওনি মৗজাংখৌ বান দানাগিৎথৗং, নাথায় গুবুনফৗরনি মৗজাংনি থাখৈবৗ।25বিবেকআও জেবৗ সৗংথি খৗলামামাৎনিন নৗছৗরৗ হাঠাইয়াও ফান্নায় বিদৎফৗরখৌ বাইনানৈ জাদৗ।26মানৗনা “বুহুমাও আরৗ বেহা দংনায় মানিয়ানৗ ফৗরবুনি।”27খ্রীষ্টখৌ ফৗথাইয়িফৗরনি ছৗরবা নৗংছৗরখৌ জাহৗনৗ হাংখ্রাইব্লা, আরৗ নৗংছৗরৗ থাংনৗ লুবৈয়ৗ, জেবৗ সানখাংগ্রা বিবেকআও সৗংথি সান্নামাৎনিন নৗংছৗরনৗ জেখৌনৗ হৗয়ৗ বিখৌনৗ জাদৗ।28নাথায় “বে জানায় মৗঙায়া মূর্তিফৗরনৗ বাওনায়ছৗ হৗন্নানৈ,” ছৗরবা নৗংনৗ রাইঠিদৗংব্লা, মৗনৈনি থাখৈ জাই সাছে মানসিআ খৗথাদৗং আরৗ বিবেকআও সান্নায়নি জুনৈ বেখৌ দাজা।29নৗংনি বিবেকনি থাখৈ অৗঙা, আঙৗ গুবুননি বিবেকনি থাখৈছৗ বুংদৗং। আংনি গৗসৗ বাদি মাওনৗ হাগৌয়াও আং মানৗ গুবুনফৗরনি বিবেকআও বিচারাও গৗগ্লাইনৗ?30আংনি জানায় মৗঙাফৗরনি থাখৈ আঙৗ ঈশ্বৗরখৌ ধন্যবাদ হৗন্নানৈ জানায়াও, আং জানায়খৌ মানৗ নিন্দিজানৗ?31বিনিখাইনৗ নৗংছৗরৗ জেখিয়া জা এবা লৗং, গাছেনখৌবৗ ঈশ্বৗরনি মহিমানি থাখৈ খৗলাম।32যিহূদিয়ারিফ্রা এবা গুবুনহারিফৗর এবা ঈশ্বৗরনি মন্ডলীখৌ পাপনি কারণ দাখৗলাম।33আঙৗ জেরৈ বয়খৌবৗ খুশি খৗলামনৗ হাস্থায়ৗ নৗংছৗরবৗ বেবাদিনৗ খৗলাম। বিছৗরৗ বাছাইজানায় বাদি, আংনি মৗজাংনি থাখৈ মাওয়ালাবানৗ গুবুননি মৗজাংনি থাখৈছৗ মাওয়ৗ।
The Seed Company