1Taie ioudo Iesu Tarena Urio ro goto se duriomoro to aise gewedei Satani ro iato owaibirio rie.2Nou goto se duriomoro ato ohona kiho tato duwo sirio saiki sirio neito imidirotiti. Taie nou auna sogoi ro nato gorobai.3Tuturu to owamo pua iedi kowaibirio dubu ro nou ro gereredea-ro nou owaibirio ri. Nou ro ibo, ‘Oro Godi mere ie, nedi nadi sirio ro ma-dimowapotai dokou to mararapoi-mo.’4Iesu ro Satani ibo gemowameai, ‘Tarena Buka ato owera keba se ibo ta-gisioidiro-rimo, Urubia dubu keremiro ohona kiho ato se owamo pua. Kaupoti Godi matagoro rido beda owera ro osuwodutiti-dumo, morobise keremiro nato towamo.’5Taie Iesu ina Satani ro aise gemowameai-ro tarena sabowa to imese gowou. Iesu nou ro Tarena Moto koikoi ato aise gowotobowa.6Satani ro ibo, ‘Oro Godi mere ie, neido ma-derepeduai. Mabu Tarena Buka ato owera keba se ta-gisioidiro-rimo ibo, Godi sowake urio sirio ama-itiodorai-ri, oro neio ro amadimo-orobidiro-ri mea mino to amadimo-owororuwo-ri. Oro sairo nadi ato iteamoidiro-ri pua.’7Iesu ro Satani ina ibo gemowameai, ‘Ibose Tarena Buka ato owera kebase ta-gisioidiro-rimo ibo, Modobo pua Abera Naramu Godi oro ro kowaibirio.’8Taie Iesu Satani ro ina aise gowioro ohu ia podo to, nou ro nato gemowawuti duriomoro sirio. Nou ro ibo, ‘Ma-diraroweauti, meamea duriomoro sirio ro iamo-die. Oro namadi-iroborea-ri mo aboto, ina mo namadi-emowabu-ri, nedi awawo duriomoro sirio ro oro mo ro anama-emapoi-ri.’10Iesu ro ibo, ‘Satani mo aboudo neido daragare! Mabu owera Tarena Buka ato kebase ta-gisioidiro-rimo ibo, Oro ro modobo ie Abera Naramu Godi nou se kemowabu, ibose nou ubi tanaro se kisioidiro.’11Taie iato Iesu Satani ro aise gemeserai, tuturu to owamo pua sowake urio sirio ro gou-rimo, Iesu neio ro aise gowarebai-rimo.
Iesu Keriso kimowauti woko na-gitamuai
12Iesu ro na-girorowai ibo Ioane dibura to ta-gedea-dumo, taie nou Gariri duriomoro to aise gorowameai-ro.13Nou kebase Nasareta sabowa to gou, ina Nasareta sabowa na-gemeserai nou ioudo aise gou-ro Kapeniama sabowa to, taie nou iato nani komi ie. Kapeniama sabowa Gariri obo paruo bara ato owamotiti. Nedi sabowa ro Seburuni ra Napatari ra duriomoro teibo neitiro abato owamotiti.14Keba se Godi ipusu owera dubu Aisaia ro edi owera ro na-gisioidiro Tarena Buka ato, tanaro morobise to noti gororosioidiro-dumo ibo,15Owera neito ma-dirowidiro-rimo! Nio etio ro orowomidiro Seburuni duriomoro ato ibose Napatari duriomoro ato, owera ibo ie nio sapuwo to. Nio gabo ie buru oromo to kohau ato, ibose Iodeni oromo sapuwo to kiabudiro. Nio nedi Gariri duriomoro ato na-irowomidirotiti, Iu owera karo tato urubia ibose bato irowomidirotiti, nedi owera ro nio aboto ie.16Neio duwoduwo maumo ato ta-irowomidirotiti, ina abora auna woroworo pina neio ro ta-gowea-dumo. Io morobise ie, nedi urubia ro neio ro kebase korowaburo tere auna se ematiti-mo, abora auna woroworo pina ta-gorowapotai-die neio aboto.17Taie iedi tau ro nato Iesu ro urubia mea owera kimowauti aise gatamuai. Nedi mea kimowauti owera ro ibo ie, ‘Ubauba aboudo ba-derewesegerai-mo! Mabu Godi ro kiwaboi tanaro nimo aboto aupise ta-gosiomai-die.’
Iesu ro keba kowasoro urubia giaubai
18Ata tau Iesu Gariri obo paruo bara ato na-gadoro-ro, nou ro naramu ra neama ra nato giwia-ma, Saimoni, ata masiro Pita, nou neama mutu Enduru. Neitiro neti gidobi-rido, mabu neti kidobi neitiro woko ie.19Taie Iesu ro ibo, ‘Dou-rido mo dowasoro-rido! Nitiro ro nakere beda sosoro irobotiti-do, ina mo ro anama-itamudiro-mari urubia kirobo beda sosoro ra.’20Taie iato neitiro ro nedi owera ro na-girorowai-rido, neti neitiro ro egenabo gibedidiro-rido, Iesu saro rido imese gowasoro-rido.21Iesu ina ioudo egea mere se giaubai-ro, nou ro ina naramu ra neama ra nato giwia-ma, Iemisi ra Ioane ra neitiro Sebedi mere teibo ie. Neitiro abera mutu pe ato neti gimotuputi-birimo odobia rie. Iesu ro nato girumai-ma, ‘Dou-rido, mo dowasoro-rido.’22Taie neitiro ro nedi owera ro na-girorowai-rido, neitiro abera Sebedi pe ato neti mutu aise gemeserai-rido, Iesu saro rido imese gobodoro-rido.
Iesu ro urubia Gariri duriomoro ato gitamudiro
23Iesu Gariri duriomoro ato na-goroho, nou ro Iu urubia simara karadabu moto ato itamudirotiti. Nou ro ibose mea owera Godi ro kiwaboi tanaro sapuwo to urubia ta-imowautiti. Nou ro awawo ia temeteme urubia, ibose erere temeteme ra mutu urubia, nou aboto ta-giworoho-rimo, meana aise giwaititi.24Nou ro edi tanaro ro na-gisioidiro, nou sapuwo to owera Siria duriomoro gebari ato nato gorobodorouti. Taie neio ro ina erere temeteme ra mutu urubia nato giworoho-rimo. Urubia abato ubauba urio na-gorowomidiro, nakara se kerebesiouti urubia, togiri urubia, beda mutu ubauba temeteme urubia ra, neio Iesu ro meana aise giwaititi.25Ina auna dubu patu nato gou-rimo Gariri duriomoro rido, 10 sabowa bato giamo iedi duriomoro ro neido, Ierusarema sabowa rido, Iudia duriomoro rido, ibose Iodeni oromo sapuwo rido. Iedi urubia sirio ro Iesu neio ro saro rido aise gobodoro-rimo.