EZEKIEL2
Makpere Ezekiel
1Ne silɔ ɔɣere me sɔ, "Ɔturi awune ɔbi, ta ya i fɔ ngba iso si loaɖe-ɔ ika."2Gɔ ɔɖeika ne, Siwarã ɔbo i wũ ame ne sikɔlɛ me siɣedza i wũ ngba iso, ne lonɔ ɔto ɔɖe me ika.3Ɔɣɛ sɔ, "Ɔturi awune ɔbi, nto losese-ɔ Israel mabi kɔrɛ, i kaɖe ga mba atsuele fiɛ mata maya me iso. Ma gu ma mawa ɔɔta maya me iso iba iapɛ nɔme iyi.4Maturi ma kɔrɛ nto losese-ɔ ba atsuele fiɛ mainɔ ara. Ɣere ma sɔ, 'Nnɛgbe i Bosate Wɔ Nsiguso to ɔɣɛ ne.'5Ne si makãatsue ɣee maikãatsue ne - alasɔ kaɖe ga mba atsuele maɖe - mato maatsue sɔ Ɣaa kanyaɖidze ɔwɛ̃ ɔɔwe i ma ndɛ̃.6Ɔturi ɔwune ɔbi, ɣɛɛ fɔ ne, daanigã ma ɣee daanigã ma atɔ̃me. Daanigã kɔraa atoasɔ miyu gu kuposɛ̃ ɔki alɔ-ɔ fiɛ asi i siboitɛtɛ ndɛ̃. Daanigã ala nnɛ mato maɣɛ ɣee daati akpakpa ala ma ɔso, atoasɔ maɖe kaɖe ga mba atsuele.7Ikote sɔ aaɣere ma wũ atɔ̃me, si masɛ makãatsue ɣee maisɛ makãatsue ala maɖe matsuelese ɔso.8Ɔturi awune ɔbi, ɣɛɛ fɔ ne, kã nnɛ nto loɣere-ɔ atsue. Daawe atsuele lɛ kaɖe ga mba atsuele. Busi kanya si aɖe nnɛ nto lotã-ɔ."9Kere ne lonyɔ, ne lonya kɔrɔ̃ ɔbɔrɛ kusɔ̃ me. Ɔko pia i kɔ̃ ame,10ne ɔwarɛ wũ i wũ katɔ̃. I kusɛ kunyɔ ɔɖuɖu iso ne matsɛrɛ sipini gu isoma gu ndzo itã atɔ̃me masia iso.The Seed Company