1 SAMUEL20
Yonatan Ɔbuai David
1Ne David ɔrui ɔtere i Nayot i Rama ɔkɛlɛ Yonatan kɔrɛ ɔsɛ ɔ̃akarɛ wũ sɔ, "Be lobara? Be nɖe iranyanyariã nɛ lobara? Nda kowũ loɣɛrɛ fɔ ɔse ɔso ɔto ɔbie sɔ ɔɖoe me?"2Yonatan ɔtã mmuai sɔ, "Kuiyikuiyi, aito aakpi! Tete iisɛ ɔbara kuira, ikosoi iɖe oo ɣee isiare iɖe sɔ ɔ̃isɛ ɔtã me lotsue. Be ɔso ɔsu nnɛgbe ɔkɔla me? Iiɖe ngbɔ iɖe!"3Ɣɛɛ David ɔkã ndamu i Yonatan anɔ ɔɣɛ sɔ, "Fɔ ɔse ɣe sɔ wũ ara ɔbo-ɔ anɔ ne ɔɣere so sɔ, 'Iikote sɔ Yonatan aatsue nnɛgbe si iiɖe ngbɔ ne ɔto ɔ̃amararã so.' Ɣɛɛ ne, lokã sɔ ayi kumɛgɔ i Bosate pia ngbã fiɛ fɔ wũ apia ngbã ne, loisidzorogu kukpi."4Yonatan ɔɣere David sɔ, "Irabiara nɛ abie sɔ lobara ne, loabara lotã-ɔ."5Ne ɔso David ɔt a Yonatan mmuai sɔ, "Nyɔ, kɔrãkaɖe boto boaɖe Ɔgbaleti Ɣɛtɛ iyiɖea , fiɛ ilɛ sɔ loaɖe ara ku igara, ɣɛɛ tã losɛ loawɛrɛ i karɔ̃ iso gbɔgbɔɔgbɔ kɔrãnɔwɛ̃ ku kutsuɛ.6Si fɔ ɔse ɔkarɛ nnɛ ɔso lioba ne, ɣere wũ sɔ, "David ɔkarɛ ɔri sɔ si ɔpɛsiwa ɔkɛlɛ ɔ̃ aɖe Betlehem, alasɔ ɔ̃ kalɛ ɔɖuɖu to masɔrɛ ma ikɔ biara ara i mmɔ.'7Si ɔɣɛ sɔ, 'Ilɛ kukaakɔ,' ne iyɔ fɔ ɔɖabo ba kaɣɔ. Ɣɛɛ si ɔna sikpã ne, iyɔ si atsue gbaã sɔ ɔɖo teteree sɔ ɔ̃abara me iraboa.8Fɔ ɣɛɛ ne, bara fɔ ɔɖabo kayiribielea, alasɔ miɔkã ndamu mitã so i Bosate anɔ. Si loɣɛrɛ ne, iyɔ ɖoe me fɔ mɔmɔ! Daaɖi me atã fɔ ɔse!"9Yonatan ɔtã mmuai sɔ, "Kuiyikuiyi! "Aɣe sɔ si loɣe ira kɛkɛĩ losegu tete iso sɔ ɔɖo teteree sɔ ɔ̃aɖoe-ɔ ne loaɣere-ɔ."10David ɔkarɛ Yonatan sɔ, "Nna loaɣere me si fɔ ɔse ɔtã-ɔ mmuai ku sikpã?11Yonatan sɔ, "Ba, tã bonene bokɛlɛ karɔ̃ ame." Ne ɔso ma inyɔ ɔɖuɖu ɔkɛlɛ mmɔ.12Ne Yonatan ɔɣere David sɔ, "Lokã i Bosate, Israel Ɣaa iso sɔ loaɖe tete ika kɔrãnɔwɛ̃ lɛ ɔwi wɔgbe ame! Si ɔba adzuni sɛɛ i fɔ iso ne, loasese-ɔ kanya si aatsue.13Ɣɛɛ si tete ba adzuni sɔ ɔ̃abara-ɔ iraboa ne, si loiɣere-ɔ loɖi-ɔ ɔri i isobuɛ ame ne, Bosate si ɔkpadzɛ̃ Yonatan kutsue teteree ɔledza ikpadzɛ̃. Bosate si ɔwegu-ɔ lɛ kumɛgɔ ɔ̃ɔwegu wũ ɔse.14Ɣɛɛ nyɔ me nnya mɛ nna katuĩ lɛ Bosate kayiribielea awe ayi kumɛgɔ lopia ngbã, si maibaɖoe me.15Daaɖi fɔ kayiribielea i wũ iyomaturi iso - nane si Bosate ɔɔwɔra David matsirise biara ɔɖi i karɔ̃ iso kɔraa."16Ne ɔso Yonatan ɔkã nadmu ku David iyo ɔɣɛ sɔ, "Bosate si ɔwɔra David matsirise."17Ne Yonatan ɔtã David ɔledza ita isia i ɔ̃ kuɖɔɛ ndamu iso ɔta wũ, alasɔ Yonatan ɔɖɔɛ wũ lɛ kumɛgɔ ɔɖɔɛ ɔ̃ mɔmɔ.18Ne Yonatan ɔɣere David sɔ, "Kɔrãkaɖe nɖe Ɔgbaleti Ɣɛtɛ iyiɖea. Mato maanya sɔ ana i mmɔ, alasɔ fɔ kasɛkɔ̃ to kaase kakunu.19Kɔrãnɔwɛ̃ ne, ito ikɛlɛ kutsuɛ ne, kɛlɛ ngbegɔ asɛ aawɛrɛ ku ɔwi wɔ i imɔrɛ̃ nɛgbe ɔsɛ karɔ̃, si aya asia i ita nɛ marɔ sɔ Ezel kɔrɛ.20Nto loapɛ mirɛ̃ itɛ i ne kasɛ, lɛ iraɔ lonya nto lopɛ.21Iyɔ loapia ɔporoporoi i mmɔ loɣere wũ sɔ, 'Kɛlɛ abie mirɛ̃.' Si loɣere wũ sɔ, 'Nyɔ, mirɛ̃ se i fɔ kasɛ gagbe ne; su me bɔ i ngbe ne,' iyɔ si abɔrɛ aba, alasɔ ayi kumɛgɔ i Bosate pia ngbã ne, apia i kaɣɔ ame, itikpi kuiwɛ̃ na.22Ɣɛɛ si loɣere ɔporoporoi sɔ, 'Nyɔ, mirɛ̃ se i fɔ katɔ̃ igu ame ne,' iyɔ si arui mala, alasɔ Bosate ɔɔtã sɔ arui.23Ise i itɔ̃me nɛ bo gu-ɔ ɔɣɛ iso ne, nyigi sɔ Bosate nɖe aɖansiɛ i bo gu-ɔ ndɛ̃ ɖaa."24Ne ɔso David ɔwɛrɛ i karɔ̃ iso, gɔ Ɔgbaleti Ɣɛtɛ iyiɖea ɔba ne, igara ɔsɛ i karɔ̃ ɔɖe ara.25Ɔsɛ i ngbegɔ ɔsɛ ɔsɛ i ibere kɔrɛ i Yonatan kanɔsɔ̃, fiɛ Abner ɔsɛ i igara kɔrɛ, ɣɛɛ David kasɛkɔ̃ ɔse ikunu.26Saul iiɣɛ kuira ku ikpɛnɛ nɛmɔ, alasɔ ɔbu sɔ, "Iraɔ kokooko lobara David gɔ itã sɔ ɔ̃isekele i kubarara kanya - gbaã ɔ̃isekele."27Ɣɛɛ kaɖesɛã ne, iyi nyɔare i kuwa ame David kasɛkɔ̃ ɔse ikunu ana. Ne Saul ɔkarɛ ɔ̃ ɔbi Yonatan sɔ, "Be ɔso fiɛ Yese ɔbibirɛrɛĩ iiba aɖera kaɖekɔ̃ ku kɔmakaɖe ɣee nɔme?"28Yonatan ɔtã mmuai sɔ, "David ɔtã me iti ɔkarɛ ɔri sɔ si ɔkɛlɛ Betlehem.29Ɔɣɛ sɔ, 'Tã lokɛlɛ alasɔ bo iyomaturi to mabara isɔrɛ i ɔmagɛ̃ ame, fiɛ wũ ɔnyiibirɛrɛĩ ɔkpere me sɔ ikote sɔ loawe i mmɔ. Si wũ ara ɔbo-ɔ anɔ ne, tã me ɔri si losɛ loanya wũ manyiibirɛrɛĩ.' Nnɛgbe ɔso fiɛ ɔ̃iba igara ɔpɔrɔ̃ katukɔ̃ ne."30Saul ɔfugu sikpã gbaã i Yonatan iso ne ɔɣere wũ sɔ, "Ɔrɔ̃go ladze gu ɔtsuelese ɔbi aɖe! Loɣe sɔ aɣɛ i Yese ɔbibirɛrɛĩ kama gɔ iɖe fɔ mɔmɔ kunuarɛ gu ɔnyi wɔ loɣe-ɔ kunuarɛ.31Ayi kumɛgɔ i Yese ɔbibirɛrɛĩ pia ngbã i karɔ̃ gagbe iso ne, fɔ oo, fɔ sigarakaɖekɔ̃ oo, iibaya. Kiniɔ ne sese ɔturi si ɔsɛ ɔ̃akɔ wũ ɔbɔ me alasɔ ikote sɔ ɔ̃akpi!"32Yonatan ɔkarɛ ɔ̃ ɔse sɔ, "Be ɔbara? Be ɔso maaɖoe wũ?"33Ɣɛɛ Saul ɔfuĩdza ifele si ɔɖoe wũ. Kere ne Yonatan ɔtsue sɔ ɔ̃ ɔse ɔbara adzuni sɔ ɔ̃aɖoe David.34Ɔgbaleti Ɣɛtɛ iyiɖea ikpɛnɛ nyɔare nɛmɔ ne Yonatan ɔna sikpã teteree gɔ ɔta i ɔpɔrɔ̃ katukɔ̃, ɔ̃isiɖe ara, alasɔ ɔmarã so i ɔ̃ ɔse kunuarɛ nsɛgbai i David iso.35Kaɖesɛã kaya ne, Yonatan ɔbɔrɛ ɔkɛlɛ karɔ̃ ame si ɔ̃asarɛgu David. Yonatan ɔkɔ kaporoporoi ɔsɛgu.36Ne ɔɣere kaporoporoi sɔ, "Tere si asɛ anyɔnyɔ mirɛ̃ mɛ lopɛ." Gɔ ɔtere ɔto ɔkɛlɛ ne Yonatan ɔpɛ ɔrɛ̃ ɔɖegu wũ katɔ̃.37Ɔwi wɔ i kaporoporoi ɔsɛ ngbegɔ i Yonatan mirɛ̃ ɔkpase ne, Yonatan ɔkpere wũ sɔ, "Sirɛ̃ se i katɔ̃ igu ame."38Kere ne ɔlakulu ɔɣɛ sɔ, "Pɛsiwa! Sɛ mala! Daatuĩ!" Kaporoporoi ɔsu mirɛ̃ ne ɔkpese ɔba i ɔ̃ sate kɔrɛ ne.39(Kaporoporoi iitsue kuira i nwagbe ɔɖuɖu iso; Yonatan gu David kere nɣe.)40Kere ne Yonatan ɔsu ɔ̃ akpakpɛ̃ra ɔtã kaporoporoi ne ɔɣere wũ sɔ, "Su wã si akpese akɛlɛ ɔmagɛ̃ ame."41Gɔ kaporoporoi ka kakpa ne, David ɔbɔrɛ i ngbegɔ ɔwɛrɛ i ita kɔrɛ kala isɛ. Ne David ɔbɔitikarɔ̃ ikpɛ itɛ, ɔfu anɔ i karɔ̃ ɔtã Yonatan. Ne kama ka mapɔrɛ so mapia so fiɛ mabie kaku ma inyɔ ɔɖuɖu, ɣɛɛ David ɔbiɛ ɔɖo Yonatan.42Yonatan ɔɣere David sɔ, "Kɛlɛ i isobuɛ ame, alasɔ bokã ndamu i bo kulaa ipia ame botã so i Bosate iyere ame. Boɣɛ sɔ, 'Bosate nɖe aɖansiɛ i bo gu-ɔ ndɛ̃, gu fɔ ɔɣekparɛ gu wũ ɔɣekparɛ ndɛ̃ ɔwi daaro.' " Ne David ɔrui fiɛ Yonatan ɔkpese ɔkɛlɛ ɔmagɛ̃ ame ne.The Seed Company