Petro 11
1Petro nɛ ji Yesu Kristo Manye Munyu ɔ fiɛlɔ ɔ, ngma womi nɛ ɔ ya ha Yuda bi Kristo se nyɛɛli ɔmɛ nɛ a fie kɛ je Yerusalem, nɛ a gbɛ fia Ponto, Galata, Kapadokia, Asia kɛ Bitinia a.2Mamimɛ, Tsɛ Mawu ɔ hla nyɛ kɛ je blema lokoo, nɛ e le kaa nyɛ ma plɛ e bimɛ. Mumi Klɔuklɔu ɔ ngɛ ni tsue ngɛ nyɛ mi, nɛ e kɛ Yesu Kristo muɔ ɔ tsukɔ nyɛ he konɛ nyɛɛ sa e hɛ mi. Mawu dloomi kɛ he jɔmi nɛ ba nyɛ nɔ babauu.
Wa he nɔ kami
3A je Mawu yi, wa Nutsɔ Yesu Kristo Tsɛ ɔ, lɛ nɔ nɛ fɔ wɔ ehe ngɛ e mɔbɔ nami babauu ɔ nya a. E ngɔ wɔ kɛ wo lɛ nitsɛ e weku ɔ mi, konɛ wa na he nɔ kami kɛ ha neneene wami ngɛ Yesu Kristo si nɛ e te kɛ je gbeje ɔ he.4Mawu to neneene wami nɛ ji nɔ́ke nɔ nɛ he tsɔ, nɛ puɛ we, nɛ tsakee we hulɔ ɔ kɛ ha e bi ɔmɛ ngɛ hiɔwe.5Nɛ ngɛ Mawu he wami ɔ nya a, nyɛ maa su lejɛ ɔ kɛ manye konɛ nyɛ nine nɛ su nɔ ngɛ hemi kɛ yemi ɔ nya. E maa pee nyɛ nɔ ngɛ nyagbe ligbi ɔ nɔ, nɛ nɔ tsuaa nɔ maa na.6Lɔ ɔ he ɔ, nyɛ na tsui, ejakaa bua jɔmi agbo ko ngɛ ha nyɛ hwɔɔ se; tse be ɔ, nyɛ ngɛ nɔ nae ngɛ hiɛ ɔ amlɔ nɛ ɔ.7A ngɛ nyɛ kae nɛ a hyɛ ha kaa nyɛ hemi kɛ yemi ɔ mi wa nɛ e he tsɔ lo. Ejakaa sika tsu tete ɔ, a kɛ woɔ la mi nɛ a tsuɔ he. Enɛ ɔ he je ɔ, e sa nɛ a ka nyɛ hemi kɛ yemi nɛ he jua wa pe sika tsu ɔ, konɛ e hi kɛ pi si. Ja a pee enɛ ɔ loko nyɛ nine maa su yi jemi kɛ anunyami kɛ bumi nɔ ngɛ Yesu Kristo bami ligbi ɔ nɔ.8Nyɛ suɔ lɛ, tse be ɔ, nyɛ nɛ lɛ hyɛ. E ngɛ mi kaa nyɛ nɛ lɛ hyɛ mohu se nyɛ he e nɔ ye, nɛ nyɛ na bua jɔmi babauu nɛ a be nyɛe maa kale.9Nɛ nyɛ nine maa su nyɛ klaa amɛ a yi wami hemi ɔ nɔ, ejakaa nyɛ he e nɔ ye.10Gbali ɔmɛ ngma kikɛmɛ a yi wami hemi nɛ ɔ he womi mohu, se a nui sisi bɔ nɛ sa, nɛ a bi nɛ a le nɔ nɛ e ji.11A nui nɔ nɛ Kristo Mumi ɔ nɛ ngɛ a mi ɔ ngɛ tsɔɔe ɔ sisi, ejakaa e de mɛ nɛ a ngma níhi nɛ ba Kristo nɔ ɔ, e amanehlu kɛ anunyami agbo nɛ e na ngɛ se ɔ. Nɛ a hla nɛ a le be, kɛ nɔ nɛ nɔ nɛ ní nɛ ɔmɛ tsuo maa ba.12Nyagbe ɔ, a de mɛ ke ni nɛ ɔmɛ be bae ngɛ a hɛ nɔ, se mohu hwɔɔ se lokoo ngɛ a se. Jehanɛ ɔ a fiɛ Manye Munyu nɛ ɔ paa ngɔ tsɔɔ wɔ tsuo. Nɛ a fiɛ ngɛ Mumi Klɔuklɔu ɔ nɛ a tsɔ kɛ je hiɔwe, nɛ tu munyu kɛ tsɔɔ mɛ ɔ he wami nya. E ngɛ nyakpɛ saminya kaa hiɔwe bɔfohi tete hlaa kaa a maa le e he sane.13Lɔ ɔ he je ɔ, nyɛ dla nyɛ he ngɛ nyɛ susumihi a mi nɛ nyɛɛ pee kpoo. Nyɛɛ ngɔ nyɛ hɛ kɛ fɔ Mawu dloomi nɛ nyɛ ma na ngɛ Yesu Kristo bami be ɔ nɔ.14Nyɛɛ bu Mawu tue, ejakaa e bimɛ ji nyɛ. Nyɛ ko di nyɛ sa akɔnɔ ni ɔmɛ a se, kaa bɔ nɛ nyɛ ba nyɛ je mi be mi nɛ nyɛ li Mawu ɔ.15Kaa bɔ nɛ nɔ nɛ tsɛ nyɛ ɔ ngɛ klɔuklɔu ɔ, nyɛ hu nyɛɛ pee nyɛ he klɔuklɔu ngɛ nɔ́ fɛɛ nɔ mi.16Ngmami ɔ de ke, “Nyɛɛ pee nyɛ he klɔuklɔu, ejakaa i ngɛ klɔuklɔu.”17Akɛnɛ Hiɔwe Tsɛ ɔ nɛ nyɛ sɔleɔ kɛ tsɛɔ ɔ hyɛ we nɔ hɛ mi ngɛ kojomi mi, se mohu e kojoɔ nɔ tsuaa nɔ ngɛ e ni tsumi nya he je ɔ, nyɛɛ ba nyɛ je mi saminya.A wo nyɛ yi hiɔ
18Nyɛ le klɛdɛɛ kaa tsa pi níhi kaa sika hiɔ loo sika tsu nɛ puɛɔ ɔ nɛ Mawu kɛ kpɔ nyɛ kɛ je nyɛ tsɛmɛ a yakayaka je mi bami nɛ nyɛ kase ɔ mi.19Se mohu e kpɔ nyɛ kɛ Kristo muɔ nɛ he jua wa kaa to bi nɛ kpa ko be e he ɔ.20A hla lɛ kɛ ha ni tsumi nɛ ɔ loko a bɔ je ɔ, se be nɛ ɔ mi loko ji a je lɛ kpo ngɛ nyɛ he.21E nɔ nɛ nyɛ gu kɛ he Mawu, nɔ nɛ tle lɛ si kɛ je gbeje, nɛ e wo e hɛ mi nyami ɔ nɔ nɛ nyɛ ye. Nyɛ pee enɛ ɔ bɔ nɛ pee nɛ nyɛ hemi kɛ yemi, kɛ nyɛ hɛ nɔ kami nɛ hi Mawu ɔ pɛ nɔ.22Jehanɛ ɔ, akɛnɛ nyɛ tsukɔ nyɛ klaa amɛ a he ngɛ anɔkuale ɔ tue bumi mi konɛ nyɛ na nyɛmimɛ a suɔmi he je ɔ, nyɛɛ kɛ tsui mi jɔmi nɛ suɔ nyɛ he.23Ejakaa a fɔ nyɛ ehe, pi nyɛ tsɛmɛ a mi nɛ e je, se mohu wami nɛ puɛ we ɔ mi a je kɛ fɔ nyɛ. Kikɛmɛ a wami he nɛ ɔ ji Mawu wami Munyu ɔ, nɛ e ngɛ daa.24Nɛ kaa bɔ nɛ Ngmami ɔ de ɔ, “Adesahi kulaa ngɛ kaa nga, nɛ a hɛ mi nyami ɔ ngɛ kaa mɔmɔ. Nga gbliɔ, nɛ mɔmɔ kplɔɔ.25Se Nutsɔ ɔ munyu ɔ ngɛ daa.” Enɛ ɔ ji Manye Munyu ɔ nɛ a fiɛ ngɔ tsɔɔ nyɛ ɔ nɛ.Biblica, Inc.