ICAYA63
Loc pa Rwot ikom rok ducu
1Apenyo ni, “Man anga ma bino ki i Edomi, ki i Bojra ma oruku bongo makwari, ma oruku ruk me deyoni, kun tye kanyate ki twon tekone maditi?”Ci Rwot ogamo ni, “Meno an enu ma atye katito lok me loyo kop, pien an atek, atwero laro dano.”2Dok apenyo ni, “Pingo kono bongoni ma irukuni kwar, kun nen calo bongo pa ngat ma nyono olok me biyo pige?”3Ci Rwot gamo ni, “Anyono rok ducu calo nyig olok i bur me biyo pige an kena, kun ngat mo peke ma obino kakonya. Anyonogi woko lirwacrwac ki akemo adada; ci remogi okir ikoma omiyo bongona ducu onywane woko marac.4Pien nino me culu kwor onongo tye i cwinya, mwaka me koko jona bene dong oromo.5Aneno piny, ci anongo ni pe tye ngat mo matwero konya; angiyo piny, ento onongo pe tye ngat mo maromo miya teko; meno omiyo cing an kikoma aye oloyo loc, akemona aye omiyo anongo teko.6Ceng anyono rok mapol woko ducu piny ki kinigana, akemona omiyo anginyogi woko, dok aonyo remogi omol piny i ngom.”7Abitito pi mar pa Rwot ma pe loke,kun apake pi gin ducu mabeco ma en Rwot otimo pirwa,ki twon ber madit ma en onyutu bot jo Icraelma en otimo botgi pi kicane,kun lubu bene mar mere madwong ma pe loke.8Rwot owaco ni, “Adada, gin jona, lutino ma pe bibwola.” Ci en odoko Lalargi9i can gi ducu en bene oneno iye can, en kikome aye olarogi, pe lakwenane mo nyo kadi ki lamalaika mo. En okokogi pi mar mere ki pi kicane; en obedo kagwokogi nino ki nino cake wa ikare mayam con.10Ento gin gujemo woko ikome, omiyo kiniga omako Rwot, Cwiny mere maleng okumu tutwal. Pimeno en oloke odoko lakworgi, omiyo en kikome olwenyo ikomgi.11Dano dok wigi opo pi kare macon, ikare pa Moses ma latic pa Rwot, ci gupenyo ni, “Ngat mayam okwanyo lukwat romine ki i nami mono tye kwene? En ngat ma oketo Cwiny mere maleng ikin gi kono tye kwene?12Rwot kong tye kwene, en ngat mayam omiyo twer me deyone bot Moses? En yam omiyo pii opoke i dul aryo inyim jone ci omiyo guwok gukato ki i dye nam. En otiyo man wek enong nying ma rii nakanaka.”
Rwot otelogi kangolo nam, gin gubedo calo aguragura ma woto i tim, pe gubedo kagate kadi ki acel.14Cwiny pa Rwot omiyo botgi yweyo, calo dyangi ma guo i nota kulu. En otelo jone kumeno, wek enong kwede nying me deyo.15Ai Rwot, kul wangi ki i polo inen piny i lobo, inen piny ki i kabedoni maleng me deyo. Arimani ki teki kono dong tye kwene? Mar meri ki kicani kono tye kwene? In dong ityeko kwanyogi woko ki botwa.16Pien in aye i Wonwa, kadi bed Abraim pe ngeyowa, dok Icrael bene pe paro pirwa; in Rwot giri aye ibedo Wonwa, dok ibedo lakokwa cake yam con.17Pingo imiyo wangak woko ki i yoni, ai Rwot? Pingo imiyo wadoko jo ma lujemo ma pe gilwori? Dwog cen botwa pi jo ma gitiyo piri, pi kaka ducu ma gubedo meri kikome.18Joni maleng gubedo i kabedoni maleng pi kare manok mo tutwal, lukworwa koni dong gunyono kabedo man ki tyen gi gubalo woko.19Dong wadoko calo jo mayam in pe iloyogi, wadoko calo jo ma pe kilwongogi ki nyingi.
Bible Society of Uganda